ანარეკლი
მიიყვანეთ ბავშვი სარკესთან და მისი ან თქვენი ანარეკლი "შენიღბეთ" - მიახატეთ ლომის ფაფარი, კურდღლის ყურები, ჭორფლი...
სარკის მიღმა
დააყენეთ ბავშვი სარკის წინ და შესთავაზეთ, თავის გამოსახულებას ხელი დაუქნიოს. შემდეგ ორი სარკე გარკვეული კუთხით დადგით ერთმანეთის მიმართ და ბავშვი მათ პირდაპირ დააყენეთ. ის დაინახავს, რომ მისი გამოსახულება ორივე სარკეში აირეკლა.
მრუდე სარკეები
აიღეთ პრიალა კოვზი და ბავშვი მის ჩაზნექილ და ამოზნექილ ზედაპირში ჩაახედეთ. პატარა დაინახავს, რომ ჩაზნექილ ზედაპირზე გამოსახულება დაპატარავდა, ამოზნექილზე გადიდდა, მერე უკუღმა გამოჩნდა... შეძლებისდაგვარად აუხსენით პატარას ამ ცვლილებების მიზეზი, უთხარით, რომ ამოზნექილ სარკეს ავტომობილებში ამონტაჟებენ, ჩაზნექილი სარკეები მოხერხებულია პარსვის, მაკიაჟის კეთებისას, გამოიყენება ლამპებში, პროჟექტორებში.
მომბაძე მე!
ეს თამაში შესანიშნავი ვარჯიშია. ის ხელს უწყობს მოძრაობათა კოორდინირებას. თქვენ და ბავშვი ერთმანეთის პირისპირ დადექით. პატარას შესთავაზეთ, თქვენი მოძრაობები და მიმიკა გაიმეოროს.
ურთიერთობის საშუალება
ასწავლეთ ბავშვს, აითვისოს არავერბალური ენა - მიმიკა და ჟესტები. ეტიუდები, რომლებსაც პატარა სარკის წინ შეასრულებს, გაამდიდრებენ მის ემოციურ სფეროს, პლასტიკურობასა და გრაციოზულობას შესძენენ მოძრაობებს. სთხოვეთ ბავშვს, ჟესტებით გიჩვენოთ შემდეგი საქმიანობა:
- ცხოველის მოფერება;
- მძიმე ჩანთის ტარება;
- ჩიტების ჭიკჭიკის მოსმენა;
- ცივ ქარში დგომა;
- ხატვა, ცურვა, კითხვა, ძილი.
ემოციების ვარჯიში
სთხოვეთ ბავშვს, მოიღუშოს, გაიღიმოს, გაბრაზდეს, განაწყენდეს, შეშინდეს და ეს ყველაფერი მიმიკით გვიჩვენოს.
ჯადოსნური სარკე
თამაში კიდევ უფრო საინტერესო გახდება, თუ ჯადოსნურ სარკეს გააკეთებთ. ამისთვის უნდა აიღოთ ჩვეულებრივი სქელი მუყაო, სპეციალური წებო, წვრილი მოსართავები (მძივები, ნიჟარები, პატარა ფიგურები), სარკე და ფლომასტერები. სარკე დააწებეთ მუყაოს, რომელიც სარკეზე დიდი ზომისა იქნება, მისი თავისუფალი კიდეები მორთეთ მძივებით, ნიჟარებით, პატარა ფიგურებით, დარჩენილი ადგილები კი ფლომასტერებით გააფერადეთ.
ჩრდილი
ბავშვებს ძალიან უყვართ ჩრდილებზე, მათ გადაადგილებასა და მოძრაობაზე დაკვირვება. აუხსენით პატარებს, როგორ წარმოიქმნება და რატომ მოძრაობს ჩრდილი.
დავხატოთ ჩრდილები
მოიმარჯვეთ მაგიდის ნათურა, სახატავი ქაღალდი, სკოჩი, ფლომასტერები. ფორმატი კედელზე დაამაგრეთ, ოთახი ჩააბნელეთ, შუქი ჩააქრეთ და ნათურა აანთეთ. ბავშვი მის წინ დააყენეთ და ფორმატზე აღბეჭდილ ჩრდილს ფლომასტერი შემოავლეთ. შეგიძლიათ, პატარა ისე დააყენოთ, რომ ფორმატზე მისი პროფილი გამოჩნდეს. ახლა ბავშვს სთხოვეთ, ნათურის წინ თითები აათამაშოს და დაანახეთ, როგორ მოძრაობს ჩრდილი.
ჩრდილების თეატრი
ჩრდილების თეატრის მოწყობა ძალიან ადვილია. საკმარისია თეთრი ფერის ნაწერი ფარდის მსგავსად დაკიდოთ და სულაც ღია ფერის ფარდა გამოიყენოთ. ოთახი, სადაც "მაყურებლები" სხედან, უნდა ჩააბნელოთ, ხოლო "მსახიობების" ოთახში ფარდიდან 3-4 ნაბიჯში ანთებული ელექტროლამპა დადგათ. ახლა მუყაოსგან გამოჭრილი ფიგურები ხის ჯოხზე დაამაგრეთ და ფარდის უკან ამოძრავეთ.
ჩრდილების ბრძოლა
ეს ძველი თამაში შეგიძლიათ მზიან ამინდში ეზოში ითამაშოთ. მისი არსი კი ის არის, რომ ბავშვები ცდილობენ, ერთმანეთის ჩრდილს "ფეხი დაადგან" ან ერთიმეორის ჩრდილში დაიმალონ.
მხიარული კონტურები
მიუხედავად სიმარტივისა, თამაში კონტურებით ძალიან სასარგებლოა. ის ხელს უწყობს ბავშვის კონცენტრაციის უნარის, მხედველობითი ყურადღების, მეხსიერების, მხედველობით-სივრცითი ორიენტაციის, წარმოსახვის, ლოგიკური და მხედველობით-მოტორული კოორდინაციის განვითარებას. გარდა ამისა, ბავშვს უყალიბდება ჯდომისა და შრომის ჩვევა.
ტრაფარეტები
თავდაპირველად ბავშვს აუხსენით, რა არის კონტური (ხაზი, რომელიც საგნის კიდეებს შემოსაზღვრავს), შემდეგ უჩვენეთ რამდენიმე საგნის (ვაშლის, ბურთის...) სურათი, სთხოვეთ, თქვას მისი სახელი და შესთავაზეთ, მის კონტურს ხაზი შემოავლოს. ახლა შეგიძლიათ, მუყაოსაგან სხვადასხვა საგნის ტრაფარეტი დაამზადოთ და ბავშვს მათი კონტურების დახაზვა სთხოვოთ.
ვისწავლოთ კოპირება
აიღეთ მარტივი სურათი, დააფარეთ თხელი ქაღალდი და ბავშვს სთხოვეთ, საგნების კონტურები მოხაზოს. ერთ ფურცელზე მოხაზეთ ყველაზე დიდი და ყველაზე მცირე საგნის კონტურები. ფურცლებზე მოხაზეთ ოჯახის წევრების ფეხსაცმელების კონტურები. ფლომასტერებით მოხაზეთ ხელების კონტურები.
მხიარული ანაბეჭდები
ბავშვს ძალიან გაამხიარულებთ, თუ ცოტა ხნით დაივიწყებთ, რომ დიდი ხართ და მასთან ერთად იცელქებთ. მაგალითად, შეგიძლიათ ხელისგული აკვარელის საღებავში ჩაყოთ და ქაღალდზე ანაბეჭდი დატოვოთ. ზაფხულში ანაბეჭდებისთვის სველი ქვიშაც გამოგადგებათ. პატარას გააოცებთ, თუ მას ცოტა ხნით ძველ შტამპს დაუთმობთ და საშუალებას მისცემთ, ქაღალდზე ბეჭდები დასვას. სხვათა შორის, ბეჭედი თავადაც შეგიძლიათ დაამზადოთ. ამისთვის საკმარისია, პლასტიკატისგან რაიმე ფიგურა გამოჭრათ და სპეციალური წებოთი ჩვეულებრივ ძაფის კოჭს დააწებოთ. ახლა მოიმარჯვეთ მუყაოს პატარა კოლოფში მოთავსებული ღრუბელი, ზედ მელანი დააწვეთეთ და ბეჭედი დააწეთ. ისღა დაგრჩენიათ, პატარას ფურცლები მიაწოდოთ და სთხოვოთ, "ბეჭედი დაარტყას".