დეპრესია და ალკოჰოლი
ადამიანები ვერ აცნობიერებენ იმას, რომ ალკოჰოლის მოქმედება, ადრე თუ გვიან, გაივლის, სრულდება, სასოწარკვეთილების გრძნობა კი ამის შემდეგ მხოლოდ ძლიერდება, ღრმავდება. ალკოჰოლი ნეგატიურად მოქმედებს ცენტრალურ ნერვულ სისტემაზე, შესაბამისად, კიდევ უფრო მეტად აღრმავებს დეპრესიას.
საზოგადოდ, ტვინზე ალკოჰოლის მოქმედების მოლეკულური მექანიზმი ჯერჯერობით ზუსტად არ არის განსაზღვრული, თუმცა ცნობილია, რომ მისი ზემოქმედება ააქტიურებს დოფამინერგულ ნეირონებს (დოფამინი ნეირორეგულატორია, რომლის მეშვეობითაც ხორციელდება კომუნიკაცია ნეირონებს შორის, დოფამინერგული ნეირონები კი ის ნერვული უჯრედებია, რომლებიც დოფამინის გამოთავისუფლებას უზრუნველყოფს).
დასუსტებულ, გადაღლილ და დაუძლურებულ პირებს ალკოჰოლის მცირე დოზაც კი ათრობთ, ხოლო ისინი, ვინც ფსიქიკური დაძაბულობითა და აგზნებადობით გამოირჩევა, სპირტიანი სასმლის დამათრობელ ზეგავლენას კარგა ხანს ვერ განიცდიან.
წესისამებრ, როდესაც არ ხდება მიღებული დოზის კონტროლი, ე.წ. „მკურნალობა ალკოჰოლით“ არ შემოიფარგლება მხოლოდ ერთი სასმისით. დეპრესიულ ადამიანებს ხშირად ალკოჰოლის ჭარბად მიღება უწევთ, რადგან ნაღველის გაქარვებას მცირე ულუფა არ ჰყოფნის. ამდენად, მეორე დღეს, ნაბახუსევს გამოვლენილი სიმპტომები – სისუსტე, თავის ტკივილი, სხეულის მტვრევა, დეპრესია – განსაკუთრებით გამძაფრებულია.
სასოწარკვეთაში ჩავარდნილი ადამიანები ცდილობენ მიიპყრონ სხვათა ყურადღება, სიბრალული და თანაგრძნობა გამოიწვიონ მათში. როდესაც ამ უკანასკნელს სათანადოდ ვერ იღებენ (დეპრესიულ ადამიანებს უმრავლეს შემთხვევაში ეჩვენებათ, რომ მათ მიმართ გულგრილები რჩებიან), დარდს ისევ ალკოჰოლით იქარვებენ. ამგვარად, მიიღება ჩაკეტილი, მანკიერი წრე, რომლიდანაც თავის დაღწევა ძალიან რთულია, ხშირად კი სპეციალისტის დახმარების გარეშე შეუძლებელიც კია.
ზოგიერთ შემთხვევაში დეპრესიის დროს ალკოჰოლმა შესაძლოა ტრაგიკულ შედეგამდეც კი მიიყვანოს ადამიანი. ვისაც არაერთხელ მოსვლია თავში სუიციდის აზრები, შესაძლოა მთვრალმა თავიც კი მოიკლას.
ალბათ, მკითხველს ისიც აინტერესებს, არსებობს თუ არა უკუკავშირი ალკოჰოლსა და დეპრესიას შორის. რა თქმა უნდა, არსებობს! ალკოჰოლი, რომელსაც ბევრი დეპრესიის „სამკურნალოდ“ იყენებს, თავად იწვევს დეპრესიის განვითარებას. დადგენილია, რომ ალკოჰოლი დიდ გავლენას ახდენს თავის ტვინის „ქიმიაზე“. ის ხელს უწყობს დეპრესიის აღმოცენებას. ცნობილია ისიც, რომ ალკოჰოლის რეგულარულად მომხმარებლებს ბევრი პრობლემა ექმნებათ – ხშირი კონფლიქტები ოჯახსა თუ სამსახურში, მეხსიერების გაუარესება, როგორც სექსუალური, ასევე ორგანიზმის ჯანრთელობასთან დაკავშირებული სხვადასხვა პრობლემა. ყოველივე ეს სტრესების მიზეზი ხდება, რასაც, თავის მხრივ, დეპრესიამდე მიჰყავს ადამიანი.
უნდა გახსოვდეთ – ალკოჰოლი არ არის მკურნალი და დეპრესიიდან გამოსვლის საშუალება. ალკოჰოლში ჩაძირვით თქვენ არა მხოლოდ ალკოჰოლზე დამოკიდებულების საფრთხეში იგდებთ თავს, საბოლოოდ ემშვიდობებით ცხოვრებისეულ სიამოვნებებსაც.