მიოკარდიუმის ინფარქტს ნერწყვის გამოკვლევით ავლენენ
მიოკარდიუმის ინფარქტი განვითარებულ ქვეყნებში სიკვდილიანობის ერთ-ერთ მთავარ მიზეზს წარმოადგენს. ამ დროს ადამიანი, წესისამებრ, გულმკერდის არეში ინტენსიურ, მძაფრ ტკივილს უჩივის, მაგრამ არის შემთხვევები, როდესაც ინფარქტისთვის დამახასიათებელი კლინიკური სურათი არ ვლინდება. ასეთ დროს ჰოსპიტალიზაციამდე გულ-სისხლძარღვთა დაზიანების გამოვლენა ძნელია, შესაბამისად, სამედიცინო დახმარება იგვიანებს. მიოკარდიუმის ინფარქტის დიაგნოსტირების ახალი ტესტი გაცილებით სწრაფი და ზუსტია. ამერიკელმა მეცნიერებმა ივარაუდეს, რომ სისხლის პლაზმაში არსებულ ზოგიერთ ცილას, რომელთა შემცველობის მატება გულ-სისხლძარღვთა დაავადებებზე მეტყველებს, შესაძლოა ნერწყვიც შეიცავდეს და მათ აღმოსაჩენად მიკრობიოჩიპები გამოიყენეს. მოლეკულების დონეზე დაპროგრამებულ ახალ მოწყობილობას ნერწყვში 32 ცილის დონის განსაზღვრა შეუძლია. გამოკვლევამ, რომელშიც 56-მა ინფარქტიანმა პაციენტმა და 59-მა ჯანმრთელმა ადამიანმა მიიღო მონაწილეობა, ახალი გამოგონების ეფექტიანობა დაადასტურა. ექსპერიმენტის შედეგების თანახმად, ინფარქტგადატანილებს ნერწყვში ცილა-მარკერების კონცენტრაცია მომატებული ჰქონდათ, ხოლო ჯანმრთელ ადამიანთა ორგანიზმში მათი შემცველობა ნორმის ფარგლებში იყო. გარდა ამისა, ნერწყვსა და სისხლში ცილების დონე ერთმანეთს შეესაბამებოდა. სავარაუდოდ, დიაგნოსტიკის ახალ მეთოდს სტაციონარის გარეთ გამოიყენებენ. ჯერჯერობით ახალი მოწყობილობა კლინიკური კვლევის სტადიაშია.