News - მკურნალი.გე

ნინო ჩარგეიშვილი

• ვარჯიშის დროს ცხიმი მომენტალურად იწვის

კაროლინის ინსტიტუტის თანამშრომლებმა ჟულიენ ზირატმა და რომენ ბარესმა დაასკვნეს, რომ ერთსაათიანი ვარჯიშიც კი გენებში ისეთ ცვლილებებს იწვევს, რომლებიც ცხიმების დაშლის პროცესის გააქტიურების საშუალებას იძლევა.

მეცნიერებმა გამოიკვლიეს ფიზიკური დატვირთვის დროს კუნთთა უჯრედებში მიმდინარე ეპიგენეტიკური ცვლილებები (გენებზე მეთილის ჯგუფის დამატება). ამ მიზნით მათ ნაკლებმოძრავი ცხოვრების წესის მიმდევარ რვა ადამიანს ვარჯიშის დაწყებამდე და ვარჯიშიდან ერთი საათის შემდეგ ბიოფსიურად აუღეს ბარძაყის კუნთთა უჯრედების ნიმუშები.

გამოკვლევამ აჩვენა, რომ ცხიმების მეტაბოლიზმში მონაწილე რამდენიმე გენი ვარჯიშამდე მეთილირებული იყო, ვარჯიშის შემდეგ კი კარგავდა მეთილის ჯგუფს. მსგავსი დემეთილაცია გენებს პროტეინების უფრო იოლად გამომუშავებაში ეხმარებოდა. ესე იგი ვარჯიშის შემდეგ წარმოიქმნებოდა ცხიმების გახლეჩაში მონაწილე უფრო მეტი პროტეინი. ექსპერტები გააოცა ამ ცვლილებათა სისწრაფემ. შესაძლოა, ამაში გარკვეულ როლს ასრულებდეს კალციუმი, რომელიც ვარჯიშის დროს კუნთოვან უჯრედებში წარმოიქმნება (კოფეინის დამატება ზრდის კალციუმის კონცენტრაციას, რაც ასევე დემეთილაციის პროცესის პროვოცირებას ახდენს).

• ბროკოლი კანს დამწვრობისგან იცავს

თურმე ბროკოლის ექსტრაქტის კანზე დადება მას ულტრაიისფერი გამოსხივების მავნე ზემოქმედებისგან იცავს. კომბოსტოს შემადგენლობაში შემავალი კომპონენტები ხელს უშლიან კანზე სიწითლისა და შეშუპების გაჩენას.

თაგვებზე წარმატებულად ჩატარებული ექსპერიმენტის შემდეგ ჰოპკინსის უნივერსიტეტის მეცნიერებმა გადაწყვიტეს, ბროკოლის ექსტრაქტი ადამიანებზე გამოეცადათ. გამოკვლევაში ექვსმა ჯანმრთელმა მოხალისემ მიიღო მონაწილეობა. მათ კანის არც ისე დიდ უბანზე უსვამდნენ სხვადასხვა კონცენტრაციის ექსტრაქტს, რის შემდეგაც ამ ადგილებს ულტრაიისფერი სხივების გამომცემი სპეციალური ნათურით ასხივებდნენ.

კვლევის ხელმძღვანელმა პოლ ტალალეიმ განაცხადა, რომ ექსტრაქტმა 37%-ით შეამცირა სიწითლე და დამწვრობის სხვა გამოვლინებები. მისივე თქმით, კვლევაში მონაწილეთა შორის ბროკოლის დამცველობითი მოქმედება არაერთგვაროვანი იყო. ეს ეფექტი შეიძლება აიხსნას ადამიანების გენეტიკური თავისებურებით, ასევე კვებითი ჩვევებისა და კანის მგრძნობელობის სხვადასხვაობით. მეცნიერმა ისიც აღნიშნა, რომ ბროკოლის ექსტრაქტი კანის ხანგრძლივ დაცვით ეფექტს უზრუნველყოფდა და მისი მოქმედება 3 დღის განმავლობაში გრძელდებოდა.

მეცნიერების აზრით, ბროკოლის დამცველობითი მოქმედება განპირობებულია მასში შემავალი კომპონენტ სულფორაფანით. ეს ნივთიერება უჯრედულ დონეზე ,,მუშაობს~. კერძოდ, კანში ასტიმულირებს პროტექტიული ცილების წარმოქმნას, რომლებიც რამდენიმე დღის განმავლობაში უზრუნველყოფენ მის დაცვას ულტრაიისფერი გამოსხივებისგან.

ტალალეიმ ხაზგასმით აღნიშნა, რომ სულფორაფანს არ აქვს მზის სხივების შთანთქმის უნარი და არ შეუძლია მზის დამცავი კრემების ჩანაცვლება. ულტრაიისფერი სხივები კანის კიბოს საკმაოდ ძლიერ რისკფაქტორს წარმოადგენს. მეცნიერები ვარაუდობენ, რომ ბროკოლის ექსტრაქტს შეუძლია არა მარტო მზის დამწვრობისგან დაცვა, არამედ კანის კიბოს განვითარების ალბათობის შემცირებაც.