ფიზიკური დატვირთვა საძილე აბების ნაცვლად - მკურნალი.გე

ნინო ჩარგეიშვილი

ბელარმინის უნივერსიტეტის სპეციალისტებმა გამოიკვლიეს 18-დან 85 წლამდე ასაკის 2600 ადამიანი და დაადგინეს: ღამით უკეთესად რომ გვეძინოს, ხოლო დღისით უფრო მხნედ ვგრძნობდეთ თავს, დღეში 150 წუთი მაინც უნდა დავუთმოთ ვარჯიშს.

გამოკითხვის შედეგად გაირკვა, რომ იმ საკვლევ პირებს, რომლებიც რეგულარულად ვარჯიშობდნენ, ღამით ღრმად ეძინათ, ხოლო დღისით არ უჩიოდნენ მოთენთილობას. მიღებული შედეგები მეტად მნიშვნელოვანია, ვინაიდან ქრონიკული დაღლილობისა და უძილობის ეპიდემიამ მთელი მსოფლიო მოიცვა.

გამოკვლევის ერთ-ერთმა ავტორმა, ორეგონის უნივერსიტეტის თანამშრომელმა ბრედ კარდინალმა, განაცხადა, რომ, ჩვეულებრივ, ფიზიკური ვარჯიში გულ-სისხლძარღვთა დაავადებების პროფილაქტიკისთვის ინიშნება, თუმცა ფაქტია, რომ ის გაცილებით ფართო და მრავალმხრივ გავლენას ახდენს ჯანმრთელობაზე. რეგულარულ ვარჯიშს შეუძლია საძილე აბების მაგივრობაც კი გასწიოს.

ადრეული დიაგნოსტიკა კიბოს პრევენციის საუკეთესო საშუალებაა

კიბო უკურნებელ სენად აღარ მიიჩნევა, თუ მისი გამოვლენა ადრეულ სტადიაში მოხერხდა. სკრინინგის (screen- ინგლ. გადარჩევა, გამოხშირვა) პროგრამებიც სწორედ იმისთვის არის დანერგილი მსოფლიოს მრავალ ქვეყანაში, რომ კიბოს გამომწვევი პათოლოგიური პროცესები ადრეულ სტადიაშივე გამოავლინონ - ამ შემთხვევაში განკურნების ალბათობა 100%-მდე იზრდება. ამავე დროს ხარჯიც გაცილებით ნაკლებია, ვიდრე კიბოს შორსწასული ფორმების მკურნალობისას.

ეკემბრის დასაწყისში სასტუმრო "ამბასადორში" ჟურნალისტები საქართველოში კიბოს სკრინინგის სახელმწიფო პროგრამის განმახორციელებლებს (ეროვნულ სკრინინგცენტრს) შეხვდნენ. შეხვედრის მიზანი გახლდათ საკომუნიკაციო გეგმის შემუშავება და საკომუნიკაციო კამპანიის განხორციელება დაავადებათა ადრეული გამოვლენისა და სკრინინგის სახელწიფო პროგრამისთვის საქართველოში.

მიზნობრივ პოპულაციებში სხვადასხვა ლოკალიზაციის კიბოს სკრინინგის პროგრამა მთელ საქართველოში მოქმედებს და ხელმისაწვდომია საქართველოს ნებისმიერი მოქალაქისთვის შემდეგი ასაკობრივი ჯგუფების გათვალისწინებით:

• ძუძუს კიბოს სკრინინგი - 40-დან 70 წლამდე ასაკის ქალებისთვის (2 წელიწადში ერთხელ);
• საშვილოსნოს ყელის კიბოს სკრინინგი - 25-დან 60 წლამდე ასაკის ქალებისთვის (3 წელიწადში ერთხელ);
• მსხვილი ნაწლავის კიბოს სკრინინგი - 50-დან 70 წლამდე ასაკის ქალებისა და მამაკაცებისთვის (2 წელიწადში ერთხელ);
• პროსტატის კიბოს სკრინინგი - 50-დან 70 წლამდე ასაკის მამაკაცებისთვის (წელიწადში ერთხელ).

ზემოთ ჩამოთვლილი ასაკობრივი ჯგუფებისთვის პროგრამით გათვალისწინებული გამოკვლევები უფასოა. თუ ადამიანი ჩართულია სკრინინგის პროგრამაში, მას დროული და თანამიმდევრული გამოკვლევებით შეუძლია: მშვიდად განაგრძოს ჯანმრთელობის კონტროლი; არ მისცეს დაავადებას ავთვისებიან სიმსივნედ გადაგვარების საშუალება; სავსებით განიკურნოს სიმსივნის ადრეული გამოვლენის შემთხვევაში.

უფასო სკრინინგის სახელმწიფო პროგრამაში (კიბოს სკრინინგის სახელმწიფო პროგრამა ხორციელდება საქართველოს პირველი ლედის პატრონაჟით) ჩართვის მსურველმა უნდა დარეკოს ნომერზე (032)2203535, რომელზეც მიიღებს ინფორმაციას იმ კლინიკების შესახებ, სადაც კიბოს სკრინინგის პროგრამა მოქმედებს. განურჩევლად საცხოვრებელი ადგილისა, მას შეუძლია აირჩიოს ტერიტორიულად ხელსაყრელი სამედიცინო დაწესებულება და გამოკვლევები იქ ჩაიტაროს.

სოდა - წამალი

ლონდონის სამეფო საავადმყოფოში ჩატარდა გამოკვლევა, რომლის საფუძველზეც მკვლევრებმა დაასკვნეს, რომ საჭმელ სოდას - ნატრიუმის ბიკარბონატს - უნარი შესწევს, ხელი შეუშალოს თირკმლის ქრონიკული დაავადებების განვითარებას. მეცნიერებმა თირკმელების შორს წასული და ნებაზე მიშვებული ქრონიკული დაავადებებისა და მეტაბოლური აციდოზის მქონე 134 ადამიანი გამოიკვლიეს. საკვლევი პირები ორ ჯგუფად დაყვეს. ერთ ჯგუფს უტარდებოდა ჩვეულებრივი, ტრადიციული მკურნალობა, ხოლო მეორე ჯგუფს ასეთივე მკურნალობის პარალელურად ყოველდღიურად აძლევდნენ მცირეოდენ საჭმელ სოდას.

სოდით ნამკურნალებ ავადმყოფებში თირკმლის ფუნქციის გაუარესება გაცილებით ნელა მიმდინარეობდა. დაავადების სწრაფი პროგრესირება დაუდასტურდა ამ ჯგუფის წევრთა 9%-ს, მაშინ როცა საკონტროლო ჯგუფში ამ მაჩვენებელმა 45%-ს მიაღწია.

აღსანიშნავია, რომ ორგანიზმში ნატრიუმის ბიკარბონატის შემცველობის მატებას არტერიული წნევის აწევა არ გამოუწვევია. მკვლევრები ამბობენ, რომ სოდა იაფი და ეფექტური საშუალებაა, რომელიც ხელს შეუწყობს თირკმელების ქრონიკული დაავადებების მკურნალობას, მაგრამ იქვე გვაფრთხილებენ, რომ სოდის მიღება აუცილებელია ექიმის მეთვალყურეობით, რომელმაც ზუსტად უნდა გამოთვალოს მისი დოზა თითოეული ავადმყოფისთვის.