ლალი ჩხიკვაძე

რა უცნაურადაც უნდა ჟღერდეს, ჩვეულებრივი სუნამოს ბოთლი დაგეხმარებათ დაავადების ადრეულ დიაგნოზში.

American Geriatrics Society-ს ჟურნალმა გა­მოაქვეყნა კვლევის შედეგები, რომელიც ადასტურებს, რომ დემენციის ადრეულ სტადიაზე პაციენტები კარგავენ გარკვეული არომატების ამოცნობის უნარს.

ექსპერიმენტის მონაწილეებს (57-დან 85 წლამდე ასაკის 3000 მოხალისეს) სთხოვეს ეყნოსათ და ამოეცნოთ სხვადასხვა სურნელის სპეციალური მარკერების სუნი. შედეგად, სუბიექტების 78% სწორად ცნობდა ხუთიდან ოთხ სურნელს. თუმცა დაახლოებით 14%-მა ამოიცნო ხუთიდან მხოლოდ სამი, 5%-მა მხოლოდ ორი სუნის დასახელება შეძლო, 2%-მა კი დაასახელა ერთი.

ხუთი წლის შემდეგ მკვლევარმა ჯგუფმა შეამოწმა მონაწილეთა ჯანმრთელობის მდგომარეობა.

თითქმის ყველა სუბიექტს, რომლებმაც ვერ ამოიცნეს ერთი სუნიც კი, დაუსვეს დემენციის დიაგნოზი, ხოლო მათგან თითქმის 80%, ვისაც შეეძლო მხოლოდ ერთი ან ორი სუნის ამოცნობა, ასევე განიცდიდა დემენციას.

როგორ უკავშირდება ერთმანეთს დემენცია და სუნის ამოცნობის უნარი?

ექსპერიმენტის ავტო­რები დარწმუნებულნი არიან, რომ ყნოსვას მჭიდრო კავშირი აქვს ტვინის ფუნქციონირებასა და ჯანმრთელობა­სთან. და, დიდი ალბათობით, სწორედ ეგრეთ წოდებული ყნოსვის ბოლქვები ხდება დემენციის პირველი მსხვერპლი – მანამდეც კი, სანამ გამოჩნდება უფრო ცნობილი სიმპტომები, როგორებიცაა: მეხსიერების დაქვეითება და სივრცითი სირთულეები.

რა სურნელი უნდა იგრძნოთ?

ექსპერიმენტის მონაწილეებს შესთავაზეს ხუთი არომატი:

• თევზის სუნი;
• პიტნის სუნი;
• ვარდის სუნი;
• ფორთოხლის სუნი;
• ტყავის სუნი.

რა თქმა უნდა, ამ არომატების ტესტი ექიმთან სრულ კონსულტაციას ვერ შეცვლის.

მაგრამ თუ შეამჩნიეთ, რომ ყნოსვა გაგიუარესდათ, შესაძლოა ღირდეს ნევროლოგთან ვიზიტი.