მაღალი ხარისხის სიმსუქნის მქონე მამაკაცებს მამობის იმედი ეძლევათ
ცნობილია, რომ სიმსუქნე ზრდის მამაკაცის უნაყოფობის რისკს, რადგან მეტაბოლური დარღვევები მნიშვნელოვნად მოქმედებს სპერმის ხარისხზე. თუმცა, დანიელი მეცნიერების მიერ ჩატარებული კლინიკური კვლევის შედეგები აჩვენებს, რომ სიმსუქნით მიყენებული ზიანი შექცევადია.
კვლევაში მონაწილეობდა მძიმე სიმსუქნის მქონე 56 მამაკაცი. მონაწილეთა ასაკი 18-დან 65 წლამდე მერყეობდა. პირველ ეტაპზე ყველა მონაწილე რვა კვირის განმავლობაში იჯდა დაბალკალორიულ დიეტაზე, რის შედეგადაც დაიკლო საშუალოდ 16 კილოგრამი. მამაკაცებში წონის ასეთი მნიშვნელოვანი დაკლების შედეგად, სპერმის ხარისხი მკვეთრად გაუმჯობესდა: სპერმატოზოიდების კონცენტრაცია სათესლე სითხეში გაიზარდა 50%-ით, ხოლო სპერმატოზოიდების რაოდენობა 40%-ით.
კვლევის მეორე ფაზაში მონაწილეები დაყვეს ჯგუფებად. მომდევნო ერთი წლის განმავლობაში, მამაკაცების ნაწილი აქტიურად იყო დაკავებული სპორტით, ზოგი კი ჩვეულებრივ ცხოვრებას ეწეოდა. ამავდროულად, ზოგიერთმა მონაწილემ მიიღო სიმსუქნის საწინააღმდეგო წამლები, ზოგმა კი პლაცებო.
ერთი წლის შემდეგ გაირკვა, რომ მხოლოდ იმ მამაკაცებმა, რომლებმაც კვლავ ვერ მოიმატეს ზედმეტი კილოგრამები, მოახერხეს წონის მკვეთრი დაკლების შემდეგ მიღწეული სპერმის ხარისხის გაუმჯობესების დონის შენარჩუნება. მათ შორის იყვნენ ის მონაწილეები, რომლებიც აქტიურად ვარჯიშობდნენ მთელი წლის განმავლობაში და ის მონაწილეები, რომლებიც, მიუხედავად იმისა, რომ არ იყვნენ ჩართულნი სპორტში, იღებდნენ სიმსუქნის საწინააღმდეგო წამლებს. იმ მამაკაცებში, რომლებმაც წონა ვერ შეინარჩუნეს, სპერმის ხარისხი ისევ დაეცა.