მეცნიერებმა შექმნეს სისხლის ტესტი ტვინის კიბოს ყველაზე საშიში ტიპის გამოსავლენად
კვლევის შედეგები The Journal of Neuro-Oncology-ში გამოქვეყნდა.
გლიომა არის სიმსივნე, რომელიც აზიანებს თავის ან ზურგის ტვინის გლიურ უჯრედებს. ეს არის ტვინის ყველაზე გავრცელებული, მძიმე და რთულად სამკურნალო პირველადი სიმსივნე.
ჩვეულებრივ, ექიმები იყენებენ MRI და CT მონაცემებს დაავადების პროგრესირების მონიტორინგისთვის, მაგრამ ძნელია იმის დადგენა, პაციენტის მდგომარეობა უკეთესდება თუ უარესდება. ამიტომ მნიშვნელოვანია სისხლის ტესტის შემუშავება, რომელიც უკეთ ასახავს პაციენტის ჯანმრთელობის მდგომარეობას.
თავის ნაშრომში ჯგუფმა შეისწავლა ინტერლეიკინ-13 α2 ანტიგენის რეცეპტორი (IL13Ra2), რომელიც მომატებულია სიმსივნურ ქსოვილში გლიომის მქონე პაციენტების 75%-ზე მეტში. მეცნიერებმა გამოიკვლიეს პირველადი გლიომით დაავადებული 79 პაციენტის სიმსივნური ქსოვილი და სისხლის პლაზმა, ასევე კიბოს გარეშე 23 პაციენტის სისხლის პლაზმა.
სპეციალისტებმა შეისწავლეს უჯრედგარე ვეზიკულები - უჯრედების მიერ გამოყოფილი პატარა ვეზიკულები და ამ უჯრედებიდან მასალის გადამტანები. მათ აღმოაჩინეს, რომ გლიომის მქონე პაციენტებს ჰქონდათ მნიშვნელოვნად მომატებული პლაზმური IL13Ra2 დონეები საკონტროლო ჯგუფთან შედარებით.
„IL13Ra2 სავარაუდოდ კონცენტრირებული იყო უჯრედგარე ვეზიკულებში, რომლებიც წარმოიქმნება სიმსივნური უჯრედებიდან. პლაზმური IL13Ra2 დონეები კორელაციაშია IL13Ra2 დონეებთან პაციენტების სიმსივნეებში. გარდა ამისა, ის შეიძლება გამოყენებულ იქნას თერაპიისთვის. IL13Ra2-ის მომატებული დონეები როგორც პლაზმაში, ასევე სიმსივნეებში უფრო ხანგრძლივი გადარჩენის მანიშნებელია. სინამდვილეში, IL13Ra2-ის მაღალი პლაზმური დონის მქონე პაციენტებს სიცოცხლის ხანგრძლივობა 6,5 თვით მეტი ჰქონდათ, ვიდრე დაბალი დონის მქონე პაციენტებს“, - დაასკვნეს მკვლევარებმა.