კარდიოლოგიის და კარდიოქირურგიის თანამედროვე ასპექტები - „ნიუ ჰოსპიტალსმა“ კონფერენცია გამართა
ღონისძიებას ესწრებოდნენ კარდიოლოგები და ოჯახის ექიმები სხვადასხვა სამედიცინო დაწესებულებიდან.
„ნიუ ჰოსპიტალსი“ ერთ-ერთი მოწინავე კლინიკაა ამიერკავკასიის მასშტაბით, რომელსაც საკმაოდ დიდი გამოცდილება აქვს კარდიოლოგიური დაავადებების თანამედროვე მიდგომებით მკურნალობაში. კლინიკის კარდიოლოგიური დეპარტამენტის მაღალკვალიფიციური გუნდი უახლესი აპარატურის გამოყენებით, თანამედროვე სტანდარტების შესაბამისად უზრუნველყოფს გულის დაავადებათა სრული სპექტრის დიაგნოსტირებასა და მკურნალობას. სწორედ ამიტომ კლინიკის წამყვანმა სპეციალისტებმა დაგროვებული გამოცდილების კოლეგებისთვის გაზიარება გადაწყვიტეს.
ღონისძიებაზე სიტყვით წარდგნენ „ნიუ ჰოსპიტალსის“ კარდიოლოგიის მიმართულების ხელმძღვანელი რამაზ ბათავანი, კარდიოქირურგიისა და არითმოლოგიის წამყვანი სპეციალისტები: ზვიად მათოშვილი, ბესიკ გოგორიშვილი, თამარ ჯანაშია, ლაშა მოსიაშვილი, თამარ ნარმანია და ზაზა კაციტაძე.
რამაზ ბათავანი, „ნიუ ჰოსპიტალსის კარდიოლოგიური სამსახურის ხელმძღვანელი: „მედიცინა მუდმივად ვითარდება და ახალი წესები და რეკომენდაციები ინერგება. „ნიუ ჰოსპიტალსში“ ეს ყველაფერი წარმატებით მიმდინარეობს. ბოლო წლებში დარგის სიახლეების გათვალისწინებით კარდიოლოგიური სამსახური მნიშვნელოვნად განვითარდა. სწორედ ამიტომ გადავწყვიტეთ ეს შეხვედრა შემდგარიყო და კოლეგებისთვის ის მიღწევები გაგვეზიარებინა, რაც არითმოლოგიის, ქირურგიის თუ სხვა მიმართულებით გვაქვს. მათ გავუზიარეთ ის მეთოდები, რომლებიც ჩვენთან არის დანერგილი, ახალი რეკომენდაციები, რომლებიც გამოიყენება არტერიული ჰიპერტენზიის დროს, ასევე გულის უკმარისობის დროს მედიკამენტოზური თერაპიის ახალი მეთოდები. ეს ყველაფერი ემსახურება იმას, რომ ევროპულ მედიცინას ფეხი ავუწყოთ და ჩვენს პაციენტებს მაღალი დონის დახმარება გავუწიოთ.“
ზვიად მათოშვილი, „ნიუ ჰოსპიტალსის“ არითმიების ცენტრის ხელმძღვანელი, ევროპის გულის რითმის ასოციაციის მიერ სრულად სერტიფიცირებული სპეციალისტი: „ჩვენი კონფერენცია კარდიოლოგიის თანამედროვე ასპექტებს მიეძღვნა. „ნიუ ჰოსპიტალსი“ ერთ–ერთი ლიდერია თანამედროვე სერვისების მიწოდებაში ქვეყნის მასშტაბით. სწორედ ამიტომ ჩვენი გამოცდილების, კლინიკაში დანერგილი სიახლეებისა და პროცედურების, მისი შესაძლებლობების შესახებ ინფორმაცია გავუზიარეთ კონფერენციის დამსწრეებს. პირადად ჩემი მოხსენება არითმოლოგიას ეხებოდა. „ნიუ ჰოსპიტალსში“ გვაქვს არითმიების მართვის თანამედროვე ცენტრი, რომელიც სრულყოფილი ტექნოლოგიითა აღჭურვილი. ვაკეთებთ აბლაციას, სხვადასხვა მოწყობილობის იმპლანტაციას გულში. ზოგადად, საქართველოში, ისევე როგორც მთელ მსოფლიოში, არითმიების მართვა დიდი პრობლემაა. უეცარი კარდიოლოგიური სიკვდილი უკიდურესად მაღალი გავრცელებით გამოირჩევა. კარდიოვასკულარული გარდაცვალებების საერთო რაოდენობის ნახევარი უეცარ კარდიოლოგიურ სიკვდილზე მოდის. აშშ-ში ამ მიზეზით ყოველწლიურად 350 000 გარდაცვალება ფიქსირდება. ქართულ სტატისტიკაზე თუ გადმოვიტანთ, ეს ნიშნავს დღეში 12 უეცარ სიკვდილს. ამ მონაცემებისგან თავის არიდება შესაძლებელია მხოლოდ სწორი დიაგნოსტიკით და შესაბამისი მოწყობილობების იმპლანტაციით გულში, რაც პაციენტს უეცარი სიკვდილისგან იხსნის. ჩემს მოხსენებაში ასევე ვისაუბრე წინაგულის ფიბრილაციათა მართვაზე. ამას ხალხი უწოდებს მოციმციმე არითმიას. ის არითმიის ძალიან სახიფათო სახეობაა, რადგან ინსულტების განვითარების ერთ-ერთი მთავარი მიზეზია. ყოველი მეოთხე ინსულტი, რომელიც მსოფლიოში ხდება, მისი შედეგია. ამ დაავადებისგან სიკვდილიანობის მაჩვენებლის შემცირება მხოლოდ დროული აბლაციით შეიძლება.“
ზაზა კაციტაძე, „ნიუ ჰოსპიტალსის“ კარდიოქირურგიის სამსახურის ხელმძღვანელი:
„დღეს მსოფლიოში კარდიოლოგია და კარდიოქირურგია საკმაოდ მაღალ დონეზეა განვითარებული, „ნიუ ჰოსპიტალსი“ კი ამ მიმართულებით რეგიონის ლიდერია. სწორედ ამიტომ ჩვენი ცოდნის გაზიარება გადავწყვიტეთ კონფერენციის გზით. საქართველოში ჩატარებული კარდიოლოგიური ოპერაციების 70% შუნტირებაა. ჩვენს კლინიკაში წარმატებით ტარდება შუნტირება მომუშავე გულზე. მას ბევრი უპირატესობა აქვს, მათ შორის გართულებების მინიმუმამდე დაყვანა და გამარტივებული რეაბილიტაცია. „ნიუ ჰოსპიტალსის“ წარმატებას ამ მიმართულებით რამდენიმე საკითხი განაპირობებს. ერთ-ერთი ყველაზე მნიშვნელოვანი ტექნოლოგიური აღჭურვილობაა. კარდიოქირურგია დღეს საკმაოდ მაღალტექნოლოგიური სამედიცინო დარგია. კლინიკისგან დიდ ინვესტიციას მოითხოვს. ჩვენთან ეს ყველაფერი დანერგილია და წარმატებითაც ვიყენებთ. წარმატებისთვის არანაკლებად მნიშვნელოვანია მაღალკვალიფიციური სამედიცინო პერსონალის გუნდური მუშაობა.“
„ნიუ ჰოსპიტალსი“ ევროპული სტანდარტების დაცვით აშენებული, ულტრათანამედროვე ტექნოლოგიებით აღჭურვილი, მრავალპროფილური კლინიკაა, რომელიც 2011 წლიდან უმაღლესი ხარისხის სტაციონარულ და ამბულატორიულ სერვისებს სთავაზობს პაციენტებს.
R