ფერეიდანში ქართველობას და ქართულ ენას ძალიან უფრთხილდებიან, შვილებსაც ასე ზრდიან - ჩვენი სტუმარი ფერეიდნელი ქართველი ექიმი მინა თავაზიშვილია - მკურნალი.გე

- გაგვეცანით, მოგვიყევით თქვენ შესახებ

- მინა თავაზიშვილი, წარმოშობით ფერეიდნელი ქართველი. დავიბადე ფერეიდანში 16 წელი იქ ვცხოვრობდი, სკოლის დამთავრების შემდეგ, მამას დიდი ძალისხმევის შედეგად, გადმოვედით საქართველოში.

- მაშინ იცოდით ქართული?

- მიუხედავად იმისა, რომ ირანულ სკოლაში დავდიოდი, ჩემი მშობლები სახლში ქართულად გველაპარაკებოდნენ და მუდმივად ცდილობდენენ, ქართული ენა და ტრადიციები არ დაეკარგათ. იქაური ქართველები ყველა ასეა - ბავშვობიდან ოცნებად აქვთ თავიანთ სამშობლოში დაბრუნება და მათთვის ამ წმინდა და ყველაზე ძვირფას საგანძურს - ქართველობას და ქართულ ენას ძალიან უფრთხილდებიან, შვილებსაც ასე ზრდიან. .მეც ბავშვობიდანვე შემაყვარეს ქართული ენა და საქართველო.

- საქართველოში ჩამოსვლის შემდეგ სწავლა სად გააგრძელეთ?

- თავდაპირველად ერთი წელი ვსწავლობდი წმ.ანდრიას ქართულ უნივერსიტეტში დაფუძნებულ ქართული ენისა და ლიტერატურის შემსწავლელ კურსზე, სადაც გამართულად ვისწავლე ქართული წერა,კითხვა და საუბარი. კურსის წარმატებით დამთავრების შემდეგ ჩავაბარე ჯავახიშვილის უნივერსიტეტში, სამედიცინო ფაკულტეტზე, სტომატოლოგიის განხრით.

- რატომ გადაწყვიტეთ სამედიცინო ფაკულტეტზე ჩაბარება?

- ექიმების ოჯახიდან ვარ. მამა ბირთვული მედიცინის სპეციალისტია, ასევე საქართველოში ერთადერთი ლიცენზირებული ექიმი, ვისაც შეუძლია რადიაციული ნივთიერებების ტრანსპორტირება. ბაბუა ფერეიდანში ცნობილი სტომატოლოგი იყო. მისი ძალიან დიდი სურვილი იყო, რომ ეს პროფესია შთამომავლებს გაეგრძელებინათ. ბავშვობიდან მეც ძალიან მაინტერესებდა ეს სფერო, ამიტომ ავირჩიე სტომატოლოგია.

- სამედიცინო უნივერსიტეტის გარდა თუ გაქვთ რაიმე დამატებითი ცოდნა და გამოცდილება?

- დიახ, ორი წლის განმავლობაში გავდიოდი სტაჟირებას სხვადასხვა კლინიკაში.ასევევესწრებოდი კონფერენციებს , როგორც საქართველოში ასევე საზღვარგარეთ.

პანდემიის პერიოდშიც არ გავჩერებულვარ ერთ ადგილზე, მუდმივად ვესწრებოდიკვალიფიკაციის ასამაღლებელ ონლაინ კურსებს, რამაც ძალიან დიდი ცოდნა შემძინა.

- დღეს რა მიმართულებით მუშაობთ?

- ამჟამად გავდივარ რეზიდენტურას სტომატოლოგიურ კლინიკა “ალბიუსში” წელს ვამთავრებ, პარალელურად პრაქტიკის ასამაღლებლად ვმუშაობ კლინიკა “დიაგნოსტიკ ჰელს”-ში უმცროს ექიმ-სტომატოლოგად.

- სამომავლო გეგმები რა გაქვთ ?

- მუდმივი განვითარება და პროფესიული ზრდა, საკუთარ თავზე მუშაობა , ახალი გამოწვევები, რთული ქეისების განხილვა და გადალახვა, რაც დამეხმარება ჩამოვყალიბდე ამ საქმის პროფესიონალად და გავხდე წარმატებული ექიმი.

- საბოლოო მიზანი

- მინდა გავხდე მაღალი დონის პროფესიონალი, ხელი შევუწყო საქართველოში უმაღლესი ხარისხის და მომსახურების დანერგვას სტომატოლოგიის დარგში. ვიყო მისაბაძი ექიმი და მომავალში ჩემი დაგროვილი ცოდნა და გამოცდილება გავუზიარო მომავალ თაობებს.