ინსულტის რისკის შესამცირებლად თანამედროვე პროცედურა საქართველოში პირველად ჩატარდა - მკურნალი.გე

მარცხენა წინაგულის ყურის დახურვის პროცედურა „ნიუ ჰოსპიტალსის“ ინტერვენციული კარდიოლოგიის სამსახურის ხელმძღვანელმა ლაშა მოსიაშვილმა შეასრულა. ეს პროცედურა წარმოადგენს პროფილაქტიკურ საშუალებას, რომელიც ინსულტის განვითარებისა და შემდგომი ინვალიდიზაციის რისკს მინიმუმამდე ამცირებს.

პროცედურაზე, მის შედეგებზე, რისკჯგუფში მყოფ პაციენტებსა და პრევენციაზე თავად „ნიუ ჰოსპიტალსის“ ინტერვენციული კარდიოლოგიის სამსახურის ხელმძღვანელი ლაშა მოსიაშვილი გვესაუბრება.

მოგვიყევით მარცხენა წინაგულის ყურის დახურვის პროცედურაზე.

პროცედურის საშუალებით შესაძლებელია კათეტერიზაციის ლაბორატორიაში, გულმკერდზე განაკვეთის გარეშე მოხდეს გულის მარცხენა წინაგულის ყურის დახურვა. პროცედურის დროს ხდება მარცხენა წინაგულის ყურში იმპლანტის ე. წ. ქოლგის განთავსება, რომელიც ავსებს წინაგულს და შესაბამისად, ხელს უშლის გულის ამ სივრცეში სისხლის შედინებას.

შედეგად, მცირდება ინსულტის რისკი, რადგანაც სწორედ მარცხენა წინაგულის ყური წარმოადგენს გულის იმ სივრცეს, სადაც, როგორც წესი, მდორე დინების გამო შესაძლებელია მოხდეს სისხლის შედედება, თრომბული მასების ფორმირება და შემდგომ სისხლის ნაკადით ამ მასების სხვადასხვა ორგანოებში მოხვედრა, რაც იწვევს ინსულტს და სხვა ორგანოების თრომბოზებს.

ვის სჭირდება მარცხენა წინაგულის ყურის დახურვის პროცედურა?

ბევრ ადამიანს, განსაკუთრებით 60 წელს ზემოთ, ვისაც აღენიშნება მოციმციმე არითმია. ის სხვადასხვა მიზეზის გამო ჩნდება. თავიდან აქვს პაროქსიზმული ფორმა ანუ ძალიან მაღალი რიტმით, მაღალი შეკუმშვებით მიმდინარეობს. ხშირ შემთხვევაში მკურნალობის ფონზე მოციმციმე არითმიის მოხსნა ხერხდება, თუმცა არის შემთხვევები, როდესაც დაავადება ქრონიკულ არითმიაში გადაიზრდება. ამ დროს პაციენტს რეგულარულად უწევს სისხლის გამათხელებლების ანუ ანტიკოაგულანტების მიღება. რიგ შემთხვევაში რამდენიმე ჯგუფის მედიკამენტიც ენიშნება. ამ დროს სისხლის გათხელებაზე ვზრუნავთ, რომ წინაგულში არ ჩამოყალიბდეს თრომბები და განვითარდეს ინსულტი. თუმცა, მეორე მხრივ, გვაქვს შემთხვევები, როდესაც თანმხლები დაავადებები, სისხლდენების რისკი არ გვაძლევს საშუალებას, რომ სისხლის გამათხელებლები დავნიშნოთ. სწორედ ამ ორი ჯგუფის წარმომადგენლებს სჭირდებათ მარცხენა წინაგულის ყურის დახურვის პროცედურა.

როგორ მუშაობს მექანიზმი?

როდესაც გული ზომიერად იკუმშება, თრომბის წარმოქმნის რისკი არ არსებობს. მოციმციმე არითმიის დროს გული არასტაბილურად იკუმშება, თითქოს ფართხალებს. შედეგად კი ბევრი მიკროთრომბი ყალიბდება. მათი 90% მარცხენა წინაგულის ყურში შედის, გროვდება და კონგლომერატი ხდება. გარკვეულ ეტაპზე ის ტოვებს მარცხენა წინაგულის ყურს, გადადის სისხლის მიმოქცევის წრეში და ხშირ შემთხვევაში თავში ან ფილტვის არტერიაში იჭედება. შედეგად გვაქვს ინსულტი.

თანამედროვე ტექნოლოგიების გამოყენებით შეიმუშავეს სპეციალური მოწყობილობა, რომელიც ბარძაყის ვენიდან შედის გულში, მარცხენა წინაგულის ყურში აყენებს ე. წ. „ქოლგას“. ეს ქოლგა სისხლის შესვლის პროცესს აფერხებს და შესაბამისად, აღარც თრომბი წარმოიქმნება და გროვდება. ინსულტის რისკიც აღარ გვაქვს.

ზოგადად, მიკროთრომბები სისხლის მიმოქცევის წრეში მუდმივად მოძრაობენ, მაგრამ ისინი კლინიკურად გამოსამჟღავნებელ ზომას ვერ აღწევენ და არც გართულებებს იწვევენ.

როგორია პროცედურის შემდგომი რეაბილიტაციის პროცესი?

პროცედურა მინიმალურად ინვაზიურია და შესაბამისად, პაციენტის რეაბილიტაციაც სწრაფად და მარტივად მიმდინარეობს. პროცედურის შემდეგ პაციენტი მეორე დღეს გავუშვით სახლში.

პროცედურა თანამედროვეა და საქართველოში პირველად თქვენ ჩაატარეთ. თავად თქვენ სად დაეუფლეთ ტექნიკას?

აღნიშნული პროცედურა მნიშვნელოვან მიღწევას წარმოადგენს ინტერვენციულ კარდიოლოგიაში და პაციენტების სიცოცხლის გადარჩენის შესაძლებლობას ქმნის, რადგან ახდენს ინსულტის პრევენციას იმ პაციენტებში, რომელთაც აწუხებთ წინაგულთა ციმციმის მუდმივი ფორმა (მოციმციმე არითმია) და ვერ უტარდებათ ადეკვატური ანტიკოაგულაციური თერაპია ან ეს თერაპია არის არაეფექტური და აქვთ ინსულტის მომატებული რისკი.

ტექნიკურად ამ პროცედურის ჩატარება ჩვენი ლიცენზიის შესაბამისად შეგვიძლია. განსაკუთრებული რთული პროცედურა არაა, თუმცა, როცა საქართველოში პირველად ტარდება ესა თუ ის ჩარევა, ჩვენი უცხოელი კოლეგები ყოველთვის გვერდით გვიდგანან. ტექნიკური აღჭურვილობისა და აპარატურის მომწოდებლები თავადვე უზრუნველყოფენ, რომ ექიმებს ჩაგვიტარდეს თეორიული და პრაქტიკული ტრენინგები, მულაჟზე გავდივართ პრაქტიკას და მხოლოდ ამის შემდეგ ვატარებთ ოპერაციებს.

მოგვიყევით „ნიუ ჰოსპიტალსის“ ინტერვენციული კარდიოლოგიის სერვისების შესახებ.

„ნიუ ჰოსპიტალსი“ ევროპული სტანდარტების დაცვით აშენებული, ულტრათანამედროვე ტექნოლოგიებით აღჭურვილი, მრავალპროფილური კლინიკაა, რომელიც უმაღლესი ხარისხის სტაციონარულ და ამბულატორიულ სერვისებს სთავაზობს პაციენტებს. კარდიოლოგიური დეპარტამენტის დეპარტამენტში უახლესი აპარატურის გამოყენებით, თანამედროვე სტანდარტების შესაბამისად სრულყოფილად უზრუნველვყოფთ გულის დაავადებათა სრული სპექტრის დიაგნოსტირებასა და მკურნალობას.

შემიძლია ამაყად გითხრათ, რომ ამ მიმართულებით „ნიუ ჰოსპიტალსში“ უმაღლეს დონეზე ტარდება ყველა პროცედურა, რაც დღეს საქართველოში კეთდება. ბევრ მათგანში „ნიუ ჰოსპიტალსი“ მოწინავეა და ესა თუ ის პროცედურა პირველი ჩვენთან ჩატარდა ან ამ დრომდე მხოლოდ ჩვენთან კეთდება.

ხშირად გვყავს პაციენტები რეგიონის ქვეყნებიდანაც, რადგან საქართველოში ინტერვენციული კარდიოლოგია ბევრად უფრო მაღალ დონეზეა განვითარებული.

R