არასდროს არ უნდა უგულებელვყოთ სოკო, რომელიც სითბოში, ტენიან გარემოსა და ყავისგან წარმოქმნილ ნადებში მრავლდება და უარყოფითად აისახება, როგორც სასმლის გემოზე, ისე ჩვენს ჯანმრთელობაზე.ზოგიერთი აპარატი, განსაკუთრებით კი მარცვლის აპარატი, ყოველი გამოყენების შემდეგ უნდა გაიწმინდოს, თუმცა მნიშვნელოვანია ჰიგიენის წესებიც სწორად და მუდმივად იყოს დაცული.

თუ სახლში ამას დიდ დროს ვუთმობთ და ყურადღებით ვიცავთ ყველა წესს, კაფეებისა და რესტორნების ნაწილში შეიძლება ასე არ იყოს, რასაც თან ერთვის მოძველებული აპარატების პრობლემაც. ერთსა და იმავე ობიექტში ხშირად სტუმრობისას ალბათ შეგიმჩნევიათ, რომ ხანდახან ყავას არასასიამოვნო გემო აქვს, რისი მიზეზი, როგორც წესი, არასწორი წმენდა, მოძველებული აპარატი ან დაბალი ხარისხის მარცვალია.

რა შეიძლება მოხდეს, თუ ხშირად მივირთმევთ ობის სოკოთი ან სხვა ბაქტერიით დაბინძურებულ ყავას?

არასწორად მოვლის შემთხვევაში, სოკოები შეიძლება გამრავლდეს, როგორც პრესის, ისე სხვადასხვა სახის მარცვლის აპარატში. რაც უფრო მოძველებული და არასწორად მოვლილია ტექნიკა, ამის შანსი უფრო იზრდება. სოკომ ან ბაქტერიამ შეიძლება გამოიწვიოს ინტოქსიკაცია, რაც გამოიხატება დიარეით, თავბრუსხვევით, თავის ტკივილით და სხვა. ამასთან, ობის სოკოსა და სხვა ბაქტერიების გამრავლებას შეიძლება მოჰყვეს ალერგიული რეაქცია, ხველა და ზედა რესპირატორული სისტემის ინფექციაც კი.

კვლევაში სახელად Germiest Places In The Home („ადგილები სახლში, სადაც ყველაზე მეტი ბაქტერიაა“, გამოქვეყნდა 2022 წლის მაისში NSF International-ის მიერ), ნათქვამია, რომ ყავის აპარატის წყლის რეზერვუარში ან გაუწმენდავ პორტაფილტრში უფრო მეტი ბაქტერია მრავლდება, ვიდრე შინაური ცხოველების სათამაშოებზე, ამიტომ აუცილებელია მათი საფუძვლიანი და პერმანენტული წმენდა.თუ კაპუჩინოსა და ლატეს მოყვარული ხართ, უნდა იცოდეთ, რომ რძის ამომყვანის არასწორად და არასათანადოდ გაწმენდის შემთხვევაში, ნაწლავის ჩხირით ინტოქსიკაციის რისკი უფრო იზრდება.

ის შეიძლება გამოვლინდეს ზემოთ ჩამოთვლილი სიმპტომებით,ხოლო რთულ შემთხვევაში ადამიანი საავადმყოფოშიც კი ხვდება. კაფეებსა და რესტორნებში მომხმარებლთა სიმრავლის გამო, ხანდახან ბარისტები ვერ ასწრებენ რძის ამომყვანის სათანადოდ წმენდას და რამდენიმე კაპუჩინოს ერთმანეთის მიყოლებით ამზადებენ. ეს ერთი შეხედვით „უწყინარი“ ქმედება რეალურად შეიძლება ინტოქსიკაციის მიზეზი გახდეს

უნდა გვახსოვდეს, რომ:

• თუ შევამჩნევთ, რომ ყავას უჩვეულო, არასასიამოვნო გემო აქვს, მის მიღებაზე უარი უნდა ვთქვათ, რადგან დიდი შანსია, ის გაუწმენდავი აპარატით იყოს მომზადებული;
• თუ ობიექტში ყავას მოძველებული აპარატით გვიმზადებენ, ეს სასმლის ხარისხზე მნიშვნელოვნად აისახება;
• თუ შეგვიძლია, ყავის მომზადების პროცესს თავად ვადევნოთ თვალი, უნდა დავაკვირდეთ, რა მდგომარეობაშია რძის ამომყვანი;
• თუ ყავის მარცვალი არასწორად ინახება, მასში მოხვედრილი მტვრის ნაწილაკები და ბაქტერია სასმელს უცვლის გემოს და დიდი შანსია, ჩვენს ჯანმრთელობაზეც მოახდინოს უარყოფითი გავლენა
• დაბოლოს, დაუშვებელია საფქვავისა და პორტაფილტრის მხოლოდ ნაჭრით წმენდა, რაც ობიექტების ნაწილში ხდება. ცხიმისა და ბაქტერიების მოსაშორებლად ისინი აუცილებლად წყლითა და სპეციალური გამწმენდი საშუალებით უნდა დამუშავდეს