მაცდური და მიმზიდველი საკვები
უმეტეს შემთხვევაში, ასეთი საკვები ნაკლებად სასარგებლოა, მით უმეტეს, ჭარბი რაოდენობით. ზომიერების დაცვა კი ხშირად ჩვენს ძალებს აღემატება. ასეთია ნებისმიერი ნუგბარი და ტკბილეული:
ნამცხვრები, ტორტები, შოკოლადი და მისგან დამზადებული სხვა ნაწარმი, ცომეული, ნაყინი.ერთი შეხედვით ეს უწყინარი საკვები არცთუ სასარგებლოა. ისინი დამზადებულია კვერცხის, საფუვრის, სხვადასხვაგვარი კაკლის თხილის, კაკაოს, ემულგატორების, არომატიზატორების, საღებავების, სხვა უამრავი დანამატის გამოყენებით. ამ ნივთიერებების დაგროვებამ კი შეიძლება საჭმლის მომნელებელი სისტემა დააზიანოს. ზომიერებას თუ დაიცავთ, ასეთი საკვები სიამოვნებასაც მოგგვრით და სასარგებლოც იქნება. ამიტომ სასურველია ექიმებისა და დიეტოლოგების რჩევების გათვალისწინება.
ნუ გადააჭარბებთ!
მაცდუნებელ საკვებს ყოველთვის უხვად ვხვდებით სადღესასწაულო სუფრებზე: დაბადების დღეებზე, ქორწილებში, კორპორაციულ საღამოებზე და ა.შ. ამ დროს განსაკუთრებით ჭირს მრავალგვარი კერძებისგან თავის შეკავება. გულს ნუ გაიტეხთ და ნურც სიამოვნებას მოიკლებთ, უბრალოდ, თქვენს ორგანიზმს რომ ზიანი არ მიადგეს, რამდენიმე წესი დაიმახსოვრეთ:
თავი არიდეთ შებოლილ პროდუქტებს, მაიონეზით დამზადებულ მძიმე სალათებს, ცხიმიან ხორცს. ეს კერძები მავნე ნივთიერებათა მთელ ნაკრებს შეიცავს. უპირატესობა მიანიჭეთ ბოსტნეულს, ხილის ასორტის, მსუბუქი სანელებლებით შეზავებულ სალათებს, მიკროტალღოვან ღუმელში მომზადებულ ხორცს ბოსტნეულთან ერთად. შეარჩიეთ მინიმალურად გადამუშავებული პროდუქტი, რომელსაც შენარჩუნებული აქვს ვიტამინები და მიკროელემენტები. ასეთი კვება შიმშილის დასაკმაყოფილებლად ნაკლებ პროდუქტს მოითხოვს. მათგან ენერგია უკეთ შეითვისება და სასიამოვნოდ დანაყრების განცდა დიდხანს გაგყვებათ.
ფრთხილად: “პროვოკატორი” პროდუქტები!
ყოველთვის გახსოვდეთ პროდუქტი-ალერგენები: ფორთოხალი, კვერცხი, კაკალი, თხილი, თევზი, ხიზილალა, შოკოლადი. ალერგიული რეაქციების პროვოცირება შეიძლება გამოიწვიონს ე.წ. დელიკატესებმაც, როგორებიცაა: ლოკოკინები, მიდიები, კიბორჩხალები, კრევეტები. თუმცაღა ეს პროდუქტები მხოლოდ დიდი რაოდენობით მიღების შემდეგაა საფრთხის შემცველი. უპირატესობა მიანიჭეთ მცირე ალკოჰოლის შემცველ სასმელებს, მაგალითად, მსუბუქ კოქტეილებს, რომლებიც ხილის წვენებზეა დამზადებული. არჩევანი შეაჩერეთ არა ტკბილ და დესერტის, არამედ მშრალ ღვინოებზე.
მცირე რაოდენობით მშრალი ღვინო ძალიან სასარგებლოა და სამკურნალო დანიშნულებაც კი აქვს. მაგალითად, ქართული წითელი ღვინოები: საფერავი, ქინძმარაული, თეთრი რქაწითელი - მართლაც სასარგებლოა და უამრავ დაავადებას ებრძვის. მშრალი ღვინოები გაცილებით სასარგებლოა კუჭისთვის. ისიც უნდა გაითვალისწინოთ, რომ რიგი დაავადებებისას ღვინის დალევა სახიფათოა, მაგალითად, დიაბეტით, ჰიპერტონიით დაავადებულთათვის. ასე რომ, საკვებისა და სასმელების შერჩევისას აუცილებლად უნდა გაითვალისწინოთ თქვენი ჯანმრთელობის მდგომარეობა და საგანგებოდ შეარჩიოთ პროდუქტი. რაც მთავარია, დაიცავით ზომიერება!