ლალი ჩხიკვაძე

პაციენტის გადმოცემით, მასტურბაციის დროს, სექსუალური სიამოვნების გასაძლიერებლად, პენისზე ჩამოიცვა ექვსკუთხა, 2 სმ-ის სისქისა და 3 სმ შიდა დიამეტრის ფოლადის ქანჩი. თუმცა ქანჩი მჭიდროდ მოეჭირა სასქესო ორგანოს, რის შედეგადაც განვითარდა ქსოვილების შეშუპება, დაირღვა შარდის გამოყოფის პროცესი და პენისმა დაკარგა მგრძნობელობა.

აღნიშნული კლინიკური შემთხვევა აღწერეს ხოშიმინის საავადმყოფოს ექიმებმა ჟურნალში Journal of Medical Case Reports.

თავდაპირველად ექიმებმა ქანჩის მოშორება ხელით სცადეს, თუმცა პენისი იმდენად იყო შეშუპებული, რომ ამის გაკეთება ვერ მოხერხდა. ქანჩის გაჭრა სტანდარტულად შეუძლებელი იყო, რადგანაც არანაირი სივრცე არ არსებობდა ლითონსა და სასქესო ორგანოს შეშუპებულ ქსოვილებს შორის. მაშინ, სტომაგოლოგ კოლეგებთან კონსულტაციის შედეგად გადაწყდა გაეხერხათ ქანჩი სტომატოლოგიური ბორმანქანის საშუალებით. ამისათვის პაციენტი გადაიყვანეს სტომატოლოგიურ განყოფილებაში. პროცედურას დასჭირდა 45 წუთი. რადგანაც ლითონის გაჭრის პროცესში, გამოიყოფოდა სითბო, პენისს დროდადრო აგრილებდნენ წყლის საშუალებით. სასქესო ორგანოს ქსოვილების დასაცავად გამოიყენეს თხელი პლასტიკის ეკრანი.

პროცედურა წარმატებით ჩატარდა. პაცნიეტმა საავადმყოფოში ერთი ღამე დაჰყო. გაუკეთდა ტკივილგამაყუჩებელი საშუალებები და ანტიბიოტიკები და გაეწერა სახლში. ერთი თვის შემდეგ ექიმებმა განაცხადეს, რომ მამაკაცი სრულად გამოკეთდა.