ტესტი დაფუძნებულია სიმსივნის მიერ გამოყოფილ დნმ-ზე, რომლის აღმოჩენაც სისხლშია შესაძლებელი. ის ფოკუსირდება ამ დნმ-ს ქიმიურ ცვლილებებზე. მეცნიერების თქმით, ტესტით შესაძლებელი იქნება ადამიანში კიბოს აღმოჩენა და მისი ტიპის დადგენა.

ტესტის შექმნაში მეცნიერებს დაეხმარა ხელოვნური ინტელექტი. თავდაპირველად სპეციალისტებმა ჩატვირთეს სისხლის ნიმუშებიდან დნმ-ს მეთილირების ხასიათის შესახებ მონაცემები, შემდეგ ჩატარდა სისტემატიზაცია 3052 ადამიანის მაჩვენებლის გათვალისწინებით (1531-ს ჰქონდა კიბო, ხოლო 1521-ს – არა). კომპიუტერი ახარისხებდა ნიმუშებს ჯგუფის მიხედვით, რის შემდეგაც მეცნიერებმა დააპროგრამეს სისტემა კონკრეტული ტიპის კიბოს ამოსაცნობად.

ცრუ დადებითი დიაგნოზი დაისვა შემთხვევათა მხოლოდ 1%-ში. სარწმუნო დადებითი დიაგნოზი კიბოს 50 სახეობაზე დაისვა შემთხვევათა 44%-ში. რაც უფრო განვითარებული იყო დაავადების ფორმა, მით მეტი აღმოჩნდა დიაგნოზის დასმის სიზუსტე. საზოგადოდ, კონკრეტული კიბოს ტიპზე დიაგნოზი სწორად დაისვა I სტადიის კიბოს შემთხვევაში 18%-ში, ხოლო IV სტადიის კიბოს დროს – 93-ში.

მნიშვნელოვანია, რომ კიბოს ქსოვილის ნიმუშების 96%-ში სისტემამ სწორად აღნიშნა, საიდან დაიწყო კიბოს განვითარება.