იშვიათი დაავადების გამო, მამაკაცის უზარმაზარმა გულმა გულმკერდის ღრუ შეავსო
პაციენტის გულმა მიაღწია უზარმაზარ ზომებს და მთლიანად შეავსო გულმკერდის ღრუ.
საშუალო ასაკის მამაკაცმა ექიმებს მიმართა ქოშინზე ჩივილით, რომელიც მას ნახევარი წლის განმავლობაში აწუხებდა. რენტგენოლოგიურმა კვლევამ აჩვენა, რომ მას ჰქონდა კარდიომეგალია, ანუ გულის გაფართოება. კარდიომეგალიის ხარისხი იზომება ე.წ. კარდიოთორაკალური ინდექსით - გულის მოცულობისა და გულმკერდის ღრუს მოცულობის შეფარდებით. პაციენტთან კარდიოთორაკალური შეფარდება იყო 1, ანუ გული სრულად ავსებდა გულმკერდის ღრუს.
კარდიომეგალია ხშირად აღინიშნება ებშტეინის ანომალიის შედეგად. ეს არის გულის თანდაყოლილი დეფექტი, რომლის დროსაც გულის ღრუებს შორის სარქველი მარჯვენა მხარეს ნორმალურად არ იხურება. იმის ნაცვლად, რომ გაიხსნას და სისხლი გაატაროს მარჯვენა წინაგულიდან მარჯვენა პარკუჭისაკენ, სარქველი ნორმალურად არ იკეტება და სისხლი უკან, წინაგულში ხვდება. შედეგად მარჯვენა პარკუჭი ფართოვდება. დროთა განმავლობაში გაზრდილი გულის მარჯვენა ნახევარი სუსტდება და ვითარდება გულის უკმარისობა.
ლონდონის ბავშვთა ჯანმრთელობის ინსტიტუტის საუნივერსიტეტო კოლეჯის კარდიოლოგიური განყოფილების პროფესორის რობერტ ანდერსონის თქმით, მოზრდილებს ძალიან იშვიათად აღენიშნებათ ეს დაავადება. ასეთი დიაგნოზი ხშირად 1 თვემდე ასაკის ახალშობილებშია. მათთვის ეს დაავადება განსაკუთრებით საშიშია, რადგანაც გული ავიწროვებს ფილტვებს და ხელს უშლის მათ ნორმალურ მუშაობას.
მოზრდილებში ებშტეინის ანომალია რბილად ვლინდება, მაგრამ იმ შემთხვევაში თუ ხდება გულის გადიდება, საჭიროა ქირურგიული ჩარევა.
მამაკაცს თავდაპირველად მკურნალობდნენ პრეპარატებით: ანტიკოაგულანტებით, დიურეტიკებით, ბეტა-ბლოკერებით და სისხლძარღვთა გამაფართოვებელი საშუალებებით. ამის შემდეგ მას ჩაუტარდა მარცხენა წინაგულში ანევრიზმის ქირურგიული რეზექცია (პაციენტს ის დაბადებიდან ჰქონდა) და გულის სარქველი შეუცვალეს მექანიკურით.
სტატიის ავტორების განცხადებით, ეს იყო უპრეცენდენტო ოპერაცია. პაციენტის მდგომარეობა სტაბილურია, ის ღებულობს: ასპირინს, დიურეტიკებსა და ვარფარინს.