ლალი ჩხიკვაძე

2020 წელს, მსოფლიოში დაფიქსირდა გონორეის 80 მილიონზე მეტი ახალი შემთხვევა. ამ ინფექციისგან დამცავი ვაქცინა ჯერჯერობით შემუშავებული არ არის. ჩვეულებრივ, გონორეის სამკურნალოდ გამოიყენება ანტიბიოტიკები.

თუმცა, ბოლო ათწლეულის განმავლობაში, მთელ მსოფლიოში, აღინიშნება გონორეის ანტიბიოტიკებისადმი მდგრადი გამომწვევის Neisseria gonorrhoeae გავრცელება, რაც მნიშვნელოვან პრობლემად იქცა. ასეთ, სტანდარტული ანტიბიოტიკოთერაპიისადმი მდგრად ინფექციას უწოდებენ „სუპერგონორეას“.

გამორიცხული არ არის, რომ მეცნიერები შეძლებენ ნაწილობრივ მაინც ამ პრობლემის გადაჭრას. ჟურნალში The Lancet Infectious Diseases გამოქვეყნებული სამი პუბლიკაციის თანახმად, დღეს არსებულმა, მენინგოკოკური ინფექციის საწინააღმდეგო ვაქცინამ 4CMenB (სავაჭრო დასახელება Bexsero), შეიძლება დაიცვას ადამიანი გონორეის, მათ შორის „სუპერგონორეისაგანაც“.

პირველმა, ამერიკელი სპეციალისტების მიერ ჩატარებულმა კვლევამ აჩვენა, რომ ვაქცინის ორი დოზა უზრუნველყოფდა საქესობრივი გზით გადამდები ინფექციისგან, 16-23 წლის ნიუ-იორკის ახალგაზრდების 40%-იან დაცვას. დაცვის ასეთ ზომიერ ხარისხსაც კი დიდი მნიშვენლობა აქვს გონორეის გავრცელების კონტროლისა და პროფილაქტიკისათვის- აღნიშნავენ სპეციალისტები.

მეორე, სამხრეთ ავსტრალიის მეცნიერების მიერ ჩატარებულმა კვლევამ აჩვენა, რომ 4CMenB ორი დოზა მოზარდებს და ახალგაზრდა მოზრდილებს გონორეისგან 33%-ით იცავს.

მესამე კვლევის ავტორებმა, ბრიტანელმა მეცნიერებმა დაადგინეს, რომ 4CMenB ვაქცინა გონორეით დასნებოვნების მაქსიმალური რისკის მქონე ადამიანებში, ათწლეულის განმავლობაში, 110 000 ინფიცირების შემთხვევის თავიდან აცილების საშუალებას იძლევა.

გონორეამ, თუ არ ჩატარდა შესაბამისი მკურნალობა, შესაძლებელია გამოიწვიოს სერიოზული შედეგები, მათ შორის უშვილობა.

მეცნიერების თქმით, 4CMenB ვაქცინით რისკ-ჯგუფის ვაქცინაცია შეამცირებს არა მარტო საშიში მენინგოკოკური ინფექციის, არამედ ანტიბიოტიკებისადმი მდგრადი გონორეის შტამების გავრცელებას.