პირველად ადამიანის სისხლში აღმოაჩინეს მიკროპლასტიკი
ამასთან უცხო ნაწილაკები დატესტილი ადამიანების 80%-ს აღმოაჩნდა.
სპეციალისტებმა გააანალიზეს 22 ანონიმური დონორის სისხლის ნიმუში. ყველა მათგანი იყო ჯანმრთელი ზრდასრული ადამიანი. მათგან 17 ადამიანში გამოავლინეს პლასტიკის ნაწილაკები. ნიმუშების ნახევარი შეიცავდა პოლიეთილენტერეფტალატ-პლასტიკს, რომელიც ჩვეულებრივ გამოიყენება ბოთლების წარმოებაში, ხოლო მესამედი სისხლის ნიმუშებისა შეიცავდა პოლისტიროლს, რომელიც გამოიყენება საკვები პროდუქტების შესაფუთად. სისხლის ნიმუშების მეოთხედი შეიცავდა პოლიეთილენს, რომლისგანაც მზადდება პლასტიკის პაკეტები.
მეცნიერებმა ჯერჯერობით არ იციან, როგორ ზემოქმედებას მოახდენს მიკროპლასტიკი ადამიანის ჯანმრთელობაზე. თუმცა სპეციალისტები შეშფოთებულები არიან იმით, რომ მიკროპლასტიკი ზიანს აყენებს ადამიანის უჯრედებს ლაბორატორიულ პირობებში, ხოლო დაბინძურებული ჰაერის ნაწილაკები, როგორც ცნობილია, აღწევს ადამინის ორგანიზმში და იწვევს სხვადასხვა დაზიანებას. როგორც ჩანს, ადამიანები მცირე ზომის ნაწილაკებს იღებენ საკვებთან და წყალთან ერთად.
კვლევებმა აჩვენა, რომ მიკროპლსატიკს შეუძლია მოეჭიდოს ერითროციტების გარე მემბრანას და შეზღუდოს მის მიერ ჟანგბადის ტრანსპორტირება.