სიახლეები - მკურნალი.გე

ჟურნალის რედაქცია

წინამდებარე ჯირკვლის კიბოს აგრესიული ფორმების განვითარების რისკი, - ასეთი დასკვნა გამოიტანეს ფრედ ჰატჩინსონის ონკოლოგიურ დაავადებათა კვლევის ცენტრში (აშშ) მას შემდეგ, რაც დაადგინეს, რომ ალკოჰოლი ამცირებს პროსტატის კიბოს განვითარების ხელის შემშლელი პრეპარატის - ფინასტერიდის ეფექტს.

გამოკვლევაში 10 000 მამაკაცი მონაწილეობდა. აღმოჩნდა, რომ მათ, ვინც კვირაში ხუთი დღე მაინც იღებდა 50 გრამ სუფთა სპირტს (ან შესაბამისი ოდენობის სხვა სპირტიან სასმელს), პროსტატის აგრესიული კიბოს განვითარების ორჯერ მეტი ალბათობა ჰქონდათ, არამსმელებსა და ზომიერად მსმელებს შორის კი დაავადების გამოვლენის სიხშირე ერთნაირი იყო.

ამასთანავე, მეცნიერთა თქმით, სპირტიანი სასმლის სახეობას მნიშვნელობა არ აქვს - საბედისწერო როლი შეიძლება შეასრულოს როგორც ლიქიორმა, ისე ღვინომ. საიტერესოა, რომ პროსტატის კიბო უმეტესად არ არის აგრესიული - ნელა ვითარდება. ასეთი ფორმის მქონე ავადმყოფები დაახლოებით 10 წელი ცოცხლობენ და ხშირად იღუპებიან სხვა მიზეზით, რომელსაც სიმსივნესთან საერთო არაფერი აქვს. პროსტატის აგრესიული კიბო კი ძალზე სახიფათოა: დიაგნოზის დასმიდან ათი წლის შემდეგ ცოცხალი რჩება ავადმყოფების მხოლოდ 60-70%.

კურნავს თუ არა ულტრაბგერა პროსტატის სიმსივნესა და იმპოტენციას

წინამდებარე ჯირკვლის სიმსივნეთა მკურნალობისას ქირურგის სკალპელი შესაძლოა წარმატებით შეცვალოს ულტრაბგერამ.

ფრანგმა მეცნიერებმა დაადგინეს, რომ ეს მეთოდი არც ისე ეფექტურია, როგორც ტრადიციული ოპერაცია, მაგრამ თავიდან გვაცილებს ქირურგიული ჩარევის ისეთ გართულებებს, როგორიც არის იმპოტენცია და შარდის შეუკავებელობა. ეს იმით აიხსნება, რომ ულტრაბგერა არ აზიანებს წინამდებარე ჯირკვლის ახლოს გამავალ ნერვებს.

პარიზის სამედიცინო და ჯანდაცვის ინსტიტუტის მკვლევართა ჯგუფმა ლიონის ერთ-ერთ საავადმყოფოში კლინიკური გამოკვლევა ჩაატარა. მასში 243-მა პაციენტმა მიიღო მონაწილეობა. აღმოჩნდა, რომ ულტრაბგერის რამდენიმეწამიანი იმპულსი ლანცეტზე უკეთესად მოქმედებს. ჯგუფის ხელმძღვანელის თქმით, სიმსივნის ულტრაბგერით მკურნალობის ეფექტი 80%-ს აღწევს, ანუ ტრადიციული ოპერაციისას უტოლდება, და ეს მაშინ, როცა გართულებათა ალბათობა გაცილებით ნაკლებია: ერექციული დისფუნქციისა - ორჯერ, ხოლო შარდის შეუკავებლობისა - სამჯერ. მკვლევარები ამ ფაქტს იმით ხსნიან, რომ ულტრაბგერით მკურნალობის დროს ნერვული ბოჭკოები ხელუხლებელი რჩება, მაშინ, როცა სკალპელი მათ პრაქტიკულად ყოველთვის აზიანებს. ფრანგ ექიმებს მიაჩნიათ, რომ მათი აღმოჩენა ღირსეულ ადგილს დაიკავებს არა მარტო ამ, არამედ სხვა სახის ონკოლოგიურ დაავადებათა მკურნალობაშიც.

სოია მამაკაცების სამსახურში

ამერიკელი მეცნიერები ადასტურებენ, რომ სოიის პროდუქტები მამაკაცებისთვის ძალიან სასარგებლოა. ამ მცენარეში შემავალი ნაერთები, გარდა იმისა, რომ თავიდან აცილებს გამელოტებას, წინამდებარე ჯირკვლის სიმსივნეთა პროფილაქტიკასაც უწყობს ხელს. სწორედ ამით ხსნიან მეცნიერები იმ ფაქტს, რომ ეს დაავადება იშვიათია იაპონიაში, სადაც სოიას რაციონში მნიშვნელოვანი ადგილი უკავია. როგორც მკვლევარები ამბობენ, სოიიდან ადამიანის ორგანიზმი განსაკუთრებულ ნივთიერებას - ეკვოლს იღებს, რომელიც ბლოკავს ერთ-ერთ მამაკაცურ სასქესო ჰორმონს - დიჰიდროტესტოსტერონს და ამით ხელს უწყობს წინამდებარე ჯირკვლის ადენომისა და კიბოს პროფილაქტიკას.

მნიშვნელოვანია, რომ მეორე მამაკაცური ჰორმონის - ტესტოსტერონის - ეფექტი ამ დროს ნარჩუნდება. როგორც მკვლევარები ამბობენ, დიჰიდროტესტოსტერონთან უშუალოდ, ტესტოსტერონზე ზემოქმედების გარეშე დაკავშირება და მისი ინაქტივირება ეკვოლს საშუალებას აძლევს, ანდროგენების უარყოფით მოქმედებას თავი ისე გაართვას, რომ მათი სასარგებლო თვისებები არ დათრგუნოს. მათი თქმით, კიბოს შემთხვევათა დაახლოებით მესამედი კვების თავისებურებებს უკავშირდება, თუმცა მავნე და სასარგებლო პროდუქტების გამიჯვნა ხშირად ჭირს, ახალი მონაცემები კი იძლევა იმედს, რომ სოიის იზოფლავონოიდების ერთ-ერთი მეტაბოლიტი ექიმებს პროსტატის სიმსივნის თავიდან აცილებაში დაეხმარება. როგორც ცნობილია, მამაკაცური ჰორმონები გამელოტებასაც უწყობს ხელს, ასე რომ, შესაძლოა სოია ამ პრობლემასთან ბრძოლაშიც სასარგებლო აღმოჩნდეს.