რესპუბლიკური საავადმყოფოს კლინიკური ექსპერტის, პროფესორ მაკა ბულეიშვილის შეფასებით, არსებული ეპიდემიოლოგიური ვითარება სტაბილურია. როგორც მან მედიაჰოლდინგ „კვირის“ პრესკლუბში აღნიშნა, ამ ეტაპზე პაციენტის კლინიკებში გადაყვანის პრობლემა არ არსებობს და საწოლფონდიც საკმარისია.

„შეიძლება ვთქვათ, რომ ამ ეტაპისთვის ეპიდემიოლოგიურად გაწონასწორებულ მდგომარეობაში ვიმყოფებით. მაქსიმალურად ვხედავთ, რომ არის დაღმასვლა, ანუ დაინფიცირებულთა რიცხვის კლება, მაგრამ ცხადია, მაინც ყოველთვის აუცილებელია ყურადღების გამახვილება“, - განაცხადა ბულეიშვილმა.

მისი განმარტებით, უკვე სტაციონარებში მიმართვიანობა ძალიან დაბალია.

ამასთან, მისივე თქმით, პოსტკოვიდური სიმპტომები საყურადღებოა. როგორც მაკა ბულეიშვილი აღნიშნავს, კორონავირუსის გადატანის შემდეგ, ბევრი ადამიანი აღნიშნავს უძილობას, აგზნებადობას, ოფლიანობას, ზოგად საერთო სისუსტეს და ა.შ.

„გადატანილი ვირუსის შედეგად ხანდახან არის ისეთი სიტუაცია, როდესაც პაციენტებს გარკვეული სერიოზული სიმპტომები აქვთ, განსაკუთრებით საყურადღებოა ქრონიკული დაავადების მქონე ადამიანები იმიტომ, რომ ამ დაავადებების გამწვავება ხდება, როგორც „დელტას“ შტამის შემთხვევაში, ასევე „ომიკრონის“ გადატანის შემდეგაც“,-განაცხადა ბულეიშვილმა.