როგორ შევინარჩუნოთ კაცის ჯანმრთელობა:
კაცის ექიმთან მიყვანა ძალიან რთულია, განსაკუთრებით, თუ მას არაფერი აწუხებს. მაგრამ როდესაც პრობლემა „წელს ქვემოთ“ წარმოიშობა, აღმოჩნდება, რომ ბევრი დროა დაკარგული და დიდი ძალისხმევაა საჭირო ჯანმრთელობის შესანარჩუნებლად. მამაკაცს ძალებმა რომ არ უმტყუნოს, კვლევები მხოლოდ წელიწადში ერთხელ უნდა ჩატარდეს. საკუთარი ჯანმრთელობისთვის დათმობილმა ერთმა დღემ შესაძლოა უროლოგიური დაავადებების მთელი სპექტრი აგვაცილოს.
პროსტატის სპეციფიკური ანტიგენის ანალიზი
სისხლის ერთმა ანალიზმა შეიძლება გამოავლინოს პროსტატის მდგომარეობის სურათი და უროლოგიური დაავადებების განვითარების რისკი. ამ ანალიზით განისაზღვრება პროსტატასპეციფიკური ანტიგენის დონე. ის იძლევა ინფორმაციას ანთებითი პროცესის, კეთილთვისებიანი წარმონაქმნის არსებობის შესახებ, ასევე ყველაზე მნიშვნელოვანია, რომ ამ ანალიზით შესაძლებელია პროსტატის ქსოვილის ავთვისებიანად გადაგვარების რისკების დადგენა.
ეს ანალიზი, სასურველია, ახალგაზრდა ასაკშიც ჩატარდეს, რადგან ზემოთ ჩამოთვლილი დაავადებები არა მარტო ასაკოვან, ახალგაზრდა მამაკაცებსაც აღენიშნებათ.
ულტრასონოგრაფიული კვლევა აუცილებელია პროსტატის სანახავად. წინამდებარე ჯირკვლის ულტრასონოგრაფიული კვლევა ფართო ინფორმაციას იძლევა სასქესო ორგანოების ქვედა ნაწილის მდგომარეობის შესახებ და მისი საშუალებით ვლინდება სათესლე ჯირკვლების პათოლოგიები.
ულტრასონოგრაფიის საშუალებით დგინდება ადენომა, კისტოზური წარმონაქმნები, პროსტატიტი და კიბოს საწყისი სტადიებიც კი.
სათესლეების ტესტიკულარული კვლევა
სათესლეს კიბო ხშირად უვლინდებათ ახალგაზრდა მამაკაცებს, ამიტომ ძალიან მნიშვნელოვანია მათი მდგომარეობის კონტროლი: ხომ არ აღინიშნება ასიმეტრია, მტკივნეული ჩანართები და გარეგნული დეფორმაციები.
სქესობრივი გზით გადამდებ ინფექციათა ანალიზი
ყველაზე გავრცელებულ ინფექციებზე ანალიზს ექიმი-უროლოგი, როგორც წესი, პაციენტის ჩივილების შესაბამისად ნიშნავს. მაგრამ მნიშვნელოვანია იმის ცოდნა, რომ ზოგიერთი დაავადება უსიმპტომოდ მიმდინარეობს და გართულებებს იძლევა შარდ-სასქესო სისტემაზე.
რამდენიმე სქესობრივი პარტნიორის არსებობისას, ასევე სასქესო ასოდან ატიპური გამონადენისას ან სქესობრივი აქტის დროს ტკივილისას აუცილებელია სქესობრივი გზით გადამდებ ინფექციებზე ანალიზების გაკეთება. მიკროფლორის მდგომარეობის გასარკვევად ნაცხის ჩაბარება საჭიროა ჩივილების გარეშეც, რომ დარეგულირდეს ცხოვრების წესი და მეტი ყურადღება დაეთმოს სასქესო ორგანოების ჰიგიენას.
ექიმ-უროლოგთან კონსულტაცია
წელიწადში ერთხელ აუცილებელია ექიმ-უროლოგთან ვიზიტი, მით უმეტეს, თუ მამაკაცს აქვს ჩივილები. ის შეაფასებს სასქესო ორგანოების გარეგნულ მდგომარეობას, ჩაატარებს პროსტატის რექტალურ კვლევას. პრობლემების გამოვლენის შემთხვევაში დანიშნავს დამატებით დეტალურ კვლევებსა და მკურნალობას. მისცემს რჩევებს პაციენტს შარდ-სასქესო ორგანოების ჰიგიენასა და ერექციული ფუნქციის ხანგრძლივ შენარჩუნებაზე, პროსტატიტის პროფილაქტიკაზე.
მამაკაცის ჯანმრთელობის დიდხანს შენარჩუნებას ხელს შეუწყობს ცხოვრების ჯანსაღი წესი, მჯდომარე სამუშაოს ან ხანგრძლივი მგზავრობის შემდეგ ფიზიკური ვარჯიში, სწორი კვება, მუდმივი სქესობრივი პარტნიორი და რეგულარული სქესობრივი ცხოვრება.