მედიცინის სიახლეები - მკურნალი.გე

ნანა ხუცაიძე

ვირჯინიის უნივერსიტეტის იმუნოლოგებმა სცადეს, სამედიცინო მიზნით გამოეყენებინათ ფულერენ-60. ეს არის ნაერთი, რომლის მოლეკულები ნახშირბადის 60 ატომისგან შედგება და ქმნის სამგანზომილებიან სტრუქტურას, რომელიც ფორმით ფეხბურთის ბურთს მოგვაგონებს. ფულერენი არაჩვეულებრივი ქიმიური და ოპტიკური თვისებების მქონე ზემსუბუქი და ზემტკიცე მასალების წარმოებაში გამოიყენება.

ვინაიდან ფულერენ-60 წყალში ხსნადია, მოახდინეს მისი მოლეკულების მოდიფიცირება დამატებითი ქიმიური ჯგუფების დახმარებით, რომელთა ფორმულას მეცნიერები საიდუმლოდ ინახავენ. ექსპერიმენტში ადამიანისა და თაგვის მღვიმოვანი უჯრედები გამოიყენეს. ეს უჯრედები უხვად არის ლიმფურ კვანძებში, ელენთასა და ძვლის ტვინში. ალერგენებთან კონტაქტისას ისინი აქტიურად იწყებენ ჰისტამინის - იმ ბიოლოგიურად აქტიური ნივთიერების გამომუშავებას, რომელიც ალერგიული რეაქციების გაშვებაში მონაწილეობს.

ექსპერიმენტმა ცხადყო, რომ მოდიფიცირებული ფულერენ-60-ის შეყვანისას უჯრედების კოლონიაში ჰისტამინის პროდუქცია დაახლოებით 50-ჯერ მცირდებოდა.

ნანონაწილაკების ანტიალერგიული მოქმედების მექანიზმი ბოლომდე ცნობილი არ არის. წამყვანი მკვლევარის, პროფესორ კრის კიპლის თქმით, ფულერენ-60-ის მოლეკულები ძალიან ჰგავს ელექტრონებს; მაშასადამე, მათ აქტიურად უნდა შებოჭონ თავისუფალი რადიკალები, რომელთა მაღალი დონე ალერგიულ პასუხს იწვევს. რაც არ უნდა იყოს, კიპლი დარწმუნებულია, რომ მისი ჯგუფის მიერ მიღებული მონაცემები შეიძლება გამოყენებულ იქნეს ალერგიასთან, ასევე - ზოგიერთ ანთებით და აუტოიმუნურ დაავადებასთან საბრძოლველად. ამჟამად მეცნიერები ახალი მეთოდის კლინიკური გამოცდისთვის ემზადებიან.

გვაქვს თუ არა ალერგია?

ბრიტანელმა მეცნიერებმა დაასკვნეს, რომ იმ ადამიანების უმრავლესობას, ვისაც მიაჩნია, რომ საკვებზე ალერგია აქვს, სინამდვილეში ალერგიის მსგავსი არაფერი სჭირს. როგორც პორტსმუტის უნივერსიტეტში ჩატარებულმა გამოკვლევამ ცხადყო, ზრდასრული ადამიანების დაახლოებით მეხუთედს მიაჩნია, რომ ამა თუ იმ პროდუქტის მიმართ ალერგიულია, მაგრამ კლინიკური გამოკვლევისას ეს დიაგნოზი მათ 2 პროცენტს თუ უდასტურდება.

ქალები მამაკაცებზე ხშირად ცდებიან. ისინი ხშირად შვილებს ალერგიულად მიიჩნევენ და არ აძლევენ ჯანმრთელობისთვის სასარგებლო საკვებს. ყველაზე ხშირად ხორბლის მიმართ ალერგიას უჩივიან. ამ დაავადებას მოსახლეობის დაახლოებით 4,5% "იბრალებს", თუმცა სინამდვილეში ხორბლისადმი ალერგია ორასი ადამიანიდან ერთს აქვს.

გამოკვლევის ხელმძღვანელის კარინა ვენტერის აზრით, მცდარი თვითდიაგნოსტიკის ასეთი სიხშირე გამოწვეულია იმ ნაკლებინფორმაციული ტესტ-სისტემების ფართო გავრცელებით, რომლებიც ალერგიის დამოუკიდებელი გამოვლენისთვის არის გამიზნული.

მცდარი თვითდიაგნოსტიკის მიზეზია ასევე ჰიპოალერგიული პროდუქტების სიჭარბე და კიდევ ერთი რამ: უკანასკნელ ხანს ალერგია მოდურ დაავადებად იქცა. გამოკვლევის შედეგებზე დაყრდნობით მეცნიერები ირწმუნებიან, რომ ამა თუ იმ საკვებზე, რომელიც ვითომდა ალერგიას იწვევს, დაუსაბუთებლად უარის თქმამ შესაძლოა ვიტამინების, ანტიოქსიდანტების, საკვები ბოჭკოების და სხვა აუცილებელი ნივთიერებების დეფიციტი გამოიწვიოს.

დისბაქტერიოზი და ალერგია

აღმოჩნდა, რომ ალერგია საკმაოდ ხშირად დისბაქტერიოზით ყოფილა განპირობებული. თურმე ნაწლავური მიკროფლორის თანაფარდობის დარღვევა ხშირად იწვევს კანისმიერ რეაქციებს კვებითი ალერგიის სახით. რაციონში ახალი პროდუქტის შეტანა ჩვილებში არცთუ იშვიათად იწვევს ალერგიას.

ალერგიის მიზეზად შეიძლება იქცეს მეძუძური დედის რაციონის ცვლილებაც. ამასთანავე, ბოლო დროს ალერგენებად გვევლინება არა მარტო ეგზოტიკური ხილი, რომელთა მიცემას პედიატრები ერთ წლამდე არ გვირჩევენ, ტრადიციულიც.

დისბაქტერიოზის დროს განვითარებული ალერგიის მთავარი მიზეზი კი ახალშობილის ნაწლავებში იმალება - ეს სასარგებლო ბიფიდო და ლაქტობაქტერიების უკმარისობაა. ახალშობილის ჩამოუყალიბებელ კუჭ-ნაწლავს უჭირს თავისი მოვალეობის შესრულება, საკვები ძნელად გადამუშავდება, ორგანიზმი ვერ ითვისებს ვიტამინებსა და მიკროელემენტებს, იმუნიტეტი სუსტდება, ბავშვის ნაზი კანიც წითლდება, იქერცლება და მქავანა ხდება.

სტატისტიკური მონაცემებით, ბუნებრივ კვებაზე მყოფ ბავშვებს გაცილებით იშვიათად ემართებათ დისბაქტერიოზიც და კვებითი ალერგიაც, - თუ, რა თქმა უნდა, დედა დიეტას იცავს. ეს იმით აიხსნება, რომ დედის რძეში შედის პრებიოტიკები. პრებიოტიკები ნახშირწყლების სახესხვაობაა, რომლებიც კუჭ-ნაწლავში არ მუშავდება, მაგრამ ბავშვის ორგანიზმზე სასარგებლო და მრავალფეროვან ზემოქმედებას ახდენს: არჩევითად ასტიმულირებს მსხვილ ნაწლავში სასარგებლო მიკრობების ზრდასა და განვითარებას. ამის შედეგად უმჯობესდება საჭმლის მონელება, აქტიურად მიმდინარეობს ვიტამინებისა და მიკროელემენტების ათვისება და იმუნური სისტემა ძლიერდება.