News
გამოკვლევამ, რომელშიც 200 მოხალისე მონაწილეობდა, აჩვენა, რომ ერთი ულუფა პომიდვრის წვენი სისხლის წებოვნობას 70%-ით ამცირებს, ეს კი, თავის მხრივ, აქვეითებს თრომბების წარმოქმნის საშიშროებას, ინსულტისა და მიოკარდიუმის ინფარქტის განვითარების რისკს. პომიდვრის წვენის დადებითი ეფექტი დაახლოებით 18 საათს გრძელდება და ასიდან 97 შემთხვევაში აღინიშნება. საქმე ის არის, რომ პომიდორი შეიცავს ანტითრომბოზულ ნივთიერებებს - ფლავონოიდებს. მათი დღიური ნორმის მისაღებად საკმარისია დავლიოთ 150 გ კონცენტრირებული ტომატის წვენი ან შევჭამოთ 6 ცალი უმი პომიდორი.
ასპირინი ინსულტის წინააღმდეგ
დადასტურდა, რომ ინსულტის თავიდან აცილებისას ჩვეულებრივი ასპირინის პროფილაქტიკური პოტენციალი ოდნავაც არ ჩამოუვარდება ამ მიზნით გამოყენებული ტრადიციული პრეპარატის - დელტაპარინის პოტენციალს. დელტაპარინი დაბალმოლეკულური ჰეპარინის პრეპარატია, რომელსაც ორგანიზმის განსაკუთრებული უჯრედები გამოიმუშავებს. ინსულტების დაახლოებით 80% თავის ტვინის სისხლძარღვთა თრომბოზის შედეგია, დანარჩენი კი თავის ტვინში სისხლჩაქცევისა (ჰემორაგიული ინსულტი). პირველ შემთხვევაში სამკურნალოდ გამოიყენება დელტაპარინი, რომელიც ხელს უწყობს თრომბის დაშლას, მეორე ვარიანტის დროს კი დაბალმოლეკულური ჰეპარინით მკურნალობა საშიშია, ამიტომ მეცნიერებმა ასპირინზე დაკვირვება დაიწყეს. მათ გამოიკვლიეს 449 პაციენტი, რომელთა ნაწილი გადატანილი ინსულტის შემდეგ დელტაპარინს იღებდა, ნაწილი კი ასპირინს. დაკვირვების შედეგად მეცნიერებმა დაასკვნეს, რომ ასპირინი დელტაპარინს არაფრით ჩამოუვარდება. იგი აუმჯობესებს სისხლის დინებას და ხელს უშლის სისხლძარღვებში თრომბების წარმოქმნას. ამასთანავე, ასპირინის გამოყენება შეიძლება როგორც თრომბოზის, ასევე თავის ტვინში სისხლჩაქცევის დროს.
ზრდის თუ არა შაკიკი ინსულტის რისკს?
ამერიკელმა მეცნიერებმა დაადგინეს, რომ შაკიკი ორჯერ ზრდის იშემიური ინსულტის რისკს. ჯონ ჰოპკინსის უნვერსიტეტში ჩატარდა 21 გამოკვლევის მეტაანალიზი, რომლებშიც 622 381 პაციენტი მონაწილეობდა. ეს ერთ-ერთი ყველაზე მასშტაბური კვლევაა, რომელიც კი შაკიკსა და ინსულტს მიეძღვნა. მონაწილეები 18-დან 70 წლამდე ასაკისანი იყვნენ. მათი უმრავლესობა ევროპასა და ჩრდილოეთ ამერიკაში ცხოვრობდა. ინსულტი არც ერთს არ ჰქონდა გადატანილი. ანალიზებმა აჩვენა, რომ შაკიკით დაავადებულებს იშემიური ინსულტის განვითარების რისკი სხვებთან შედარებით 2-3-ჯერ მაღალი ჰქონდათ. როდესაც შაკიკის შეტევებს წინ უძღოდა მხედველობითი აურა ნათებებისა და ლაქების გამოვლინებით ან პერიფერიული მხედველობის გადაძაბვით, ინსულტის განვითარების ალბათობა უფრო მეტად იზრდებოდა: მამაკაცებში - 2,5-ჯერ, ხოლო ქალებში - 2,9-ჯერ. მეცნიერთა აზრით, სხვადასხვა ასაკში განსხვავებული მაჩვენებლები იმით შეიძლება აიხსნას, რომ შაკიკით დაავადებული ქალები ხშირად იღებენ ორალურ კონტრაცეპტივებს ან იტარებენ ჩანაცვლებით ჰორმონოთერაპიას, რომელიც, როგორც ცნობილია, გულ-სისხლძარღვთა სისტემის დაავადების ერთ-ერთი მძლავრი რისკფაქტორია. გამოკვლევის შედეგებიდან გამომდინარე, მეცნიერები ექიმებს ურჩევენ, შაკიკიან ავადმყოფებში ინსულტის პროფილაქტიკას უფრო მეტი ყურადღება მიაქციონ.