პროექტების ცენტრის ევროკავშირის პირველადი ჯანდაცვის რეფორმის მხარდაჭერის პროექტის დაფინანსებით სასტუმრო "შერატონ მეტეხი პალასში" სამედიცინო განათლების რეფორმის პრეზენტაცია გაიმართა. კონფერენცია საქართველოს შრომის, ჯანმრთელობისა და სოციალური დაცვის მინისტრმა ალექსანდრე კვიტაშვილმა გახსნა. "დღეს ჩვენ სამედიცინო განათლების რეფორმის ახალ კონცეფციას წარვადგენთ. მადლობას მოვახსენებ ყველას, ვინც ამ საქმეში აქტიურად მონაწილეობს. დღეს ახალი ტიპის საგანმანათლებლო სისტემაზე ვისაუბრებთ და განვიხილავთ ამ თემასთან დაკავშირებულ სხვადასხვა საკითხს. მას შემდეგ, რაც პროექტი დაიხვეწება, სამედიცინო განათლების კანონის შეცვლის თაობაზე ინიციატივას უკვე პარლამენტში წარვადგენთ. ვფიქრობ, ეს დღე ჩვენთვის ძალიან ნაყოფიერი და პროდუქტიული იქნება", - განაცხადა მან. საქართველოს ჯანდაცვის სამინისტრომ შეიმუშავა სამედიცინო განათლების რეფორმის დოკუმენტი, რომელიც დიპლომისშემდგომი სამედიცინო განათლების (პროფესიული მზადების) და უწყვეტი პროფესიული განვითარების სისტემის სრულყოფას ითვალისწინებს. პრეზენტაციას საქართველოს პარლამენტის ვიცე-სპიკერი გიორგი წერეთელი და სხვა საპატიო სტუმრები ესწრებოდნენ. "სამედიცინო საზოგადოებისთვის ძალიან მნიშვნელოვანი დღეა. იმისათვის, რომ ექიმებმა მოსახლეობას მაღალი ხარისხის მომსახურება შესთავაზონ, საჭიროა ამ სისტემის დახვეწა და მოდერნიზება. ამიტომ დიპლომისშემდგომი განათლების განვითარება ჩვენთვის ერთ-ერთი აქტუალური საკითხია. აღსანიშნავია, რომ ეს შეხვედრა მართლაც წინ გადადგმული ნაბიჯია ამ კუთხით", - განაცხადა გიორგი წერეთელმა.
კარგი აღნაგობის ქალები ჭკვიანები არიან
ჟურნალი "Evolution and Human Behaviour" ერთი საინტერესო აღმოჩენის შესახებ გვამცნობს: თურმე ქალის აღნაგობა და გონებრივი შესაძლებლობები ერთმანეთთან მჭიდროდ ყოფილა დაკავშირებული - ტანადი, მოხდენილი სხეულის პატრონი ქალები სხვებზე ჭკვიანები ყოფილან. პიტსბურგისა და კალიფორნიის უნივერსიტეტების მეცნიერთა ჯგუფმა 16 ათასი ახალგაზრდა და ასაკოვანი ქალის გონებრივი შესაძლებლობები შეისწავლა. ტვინის ტესტირების დროს ტანადმა, კარგი აღნაგობს ქალბატონებმა უკეთესი შედეგები აჩვენეს. თვალსაჩინო გახდა კიდევ ერთი კანონზომიერება: რაც უფრო მეტი იყო სხვაობა ქალის თეძოებისა და წელის გარშემოწერილობას შორის, მით უფრო უკეთესი იყო მისი გონებრივი მაჩვენებლები. მეცნიერებმა დაასკვნეს, რომ ყოველივე ამის მიზეზი თეძოების მიდამოში დაგროვილი ცხიმოვანი მჟავებია. სხეულის სწორედ ამ ნაწილში აღინიშნება ომეგა-3 მჟავების მაქსიმალური კონცენტრაცია, რომელიც ორსულობის დროს ქალისა და მისი მომავალი შვილის გონებრივ შესაძლებლობებს აუმჯობესებს. მეცნიერთა ვარაუდით, ამიტომაც არის, რომ მამაკაცების უმრავლესობა წერწეტ, მკერდაფუებულ და თეძოგანიერ ქალებს ამჯობინებს. ბრიტანელი კოლეგები ამ მოსაზრებას ბოლომდე არ ეთანხმებიან. მათი თქმით, ქალის აღნაგობა მისი ტვინის მუშაობაზე მართლა ახდენს გავლენას, მაგრამ არ შეიძლება ითქვას, რომ ეს პოტენციური პარტნიორის შერჩევის ერთადერთი კრიტერიუმია. არავისთვის არის საიდუმლო, რომ თანამედროვე მამაკაცები არანაკლებ მნიშვნელობას ანიჭებენ ქალის სოციალურ სტატუსს და განათლებას.
სტრესი ნაყოფის განვითარებას აფერხებს
ყველამ იცის, რომ ორსულებს ნერვიულობა ეკრძალებათ. მედიკოსებმა დაადგინეს, რომ ორსულობის დროს ზედმეტი შფოთვა და მღელვარება ნაყოფის განვითარებას აფერხებს. იზრდება მცირეწონიანი ბავშვის დაბადების ალბათობა. ჟურნალ Pediatric and Perinatal Epidemiology-ში დაიბეჭდა გამოკვლევის შედეგი, რომელიც ნაყოფზე ერთჯერადი და მუდმივი სტრესის ნეგატიურ გავლენას ასახავს. ექიმები აკვირდებოდნენ იმ ორსულთა ემოციურ და ფიზიკურ მდგომარეობას, რომლებიც ფულადი შემოსავლების მიხედვით დაბალ სოციალურ ჯგუფს მიეკუთვნებოდნენ. სხვა ფაქტორების (ალკოჰოლისა და ნარკოტიკების მოხმარება, განათლებისა დონე, რასა, მოწევა) ზემოქმედების გამორიცხვის შედეგად დადგენილ იქნა, რომ შფოთვა და ფსიქოემოციური სტრესი არცთუ უმნიშვნელო გავლენას ახდენდა ნაყოფის ჯანმრთელობაზე, თუმცა უმთავრესად მესამე ტრიმესტრში. პირველ და მეორე ტრიმესტრში მღელვარება ბავშვის ჯანმრთელობაზე არსებით გავლენას არ ახდენდა. სპეციალისტები ორსულებს ურჩევენ, რაც არ უნდა მოხდეს, თავი არიდონ ისეთ სიტუაციასა და გარემოს, რომელიც დამატებით განცდებს იწვევს და ემოციების მოთოკვა ისწავლონ. პრობლემის აღკვეთის ერთ-ერთ გზად მეანებს საკუთარ ჯანმრთელობაზე ყურადღების კონცენტრაცია მიაჩნიათ.
შავი ღვინო ღორის გრიპის წინააღმდეგ
H1N1 გრიპის ვირუსით დასნებოვნების შემთხვევაში ფილტვების დაზიანების თავიდან აცილება შავი ღვინის საშუალებით ყოფილა შესაძლებელი, - ასეთი დასკვნა გამოიტანეს ამერიკელმა მეცნიერებმა და მიზეზად ღვინის შემადგენლობაში უხვად შემავალი ანტიოქსიდანტები მიიჩნიეს. მკვლევარებმა დაადგინეს, რომ გრიპის ვირუსი აზიანებს ადამიანის სასუნთქი გზების უჯრედებს. მფარავი გარსის დაზიანების შემდეგ ფილტვებში გროვდება სითხე, რომელიც პნევმონიის რთულ ფორმას იწვევს. მეცნიერებმა ცდისთვის ბაყაყის ქვირითი გამოიყენეს. ექსპერიმენტის მსვლელობის დროს ვირუსმა დაშალა ცხოველის ქსოვილში შემავალი განსაზღვრული სახის ცილა. სამაგიეროდ, მისი ასეთი მოქმედების აღკვეთა შესაძლებელი გახდა, როცა ქვირითის უჯრედები ანტიოქსიდანტების შემცველი სპეციალური პრეპარატით დაამუშავეს. ამის შემდეგ ტესტირება ადამიანის უჯრედებზე ჩატარდა. შედეგი დადებითი აღმოჩნდა. ამ ექსპერიმენტმა ცხადყო, რომ მცენარეულ პროდუქტებში შემავალ ანტიოქსიდანტებს შეუძლიათ, ღორის გრიპის დროს ფილტვების დაზიანება შეაფერხონ. გარდა წითელი ღვინისა, ამ ნივთიერებებით მდიდარია ბროწეული, შტოში და მოცვი. სპეციალისტები გვირჩევენ, ეფექტის გასაძლიერებლად მცენარეული საკვებით მდიდარი დიეტა დავიცვათ, მივიღოთ ვიტამინები, მოვიცილოთ ზედმეტი წონა, მივდიოთ ცხოვრების აქტიურ წესს, სპორტს, უარი ვთქვათ თამბაქოზე, კარგად გამოვიძინოთ, ზედმიწევნით დავიცვათ ჰიგიენა და თავი ვარიდოთ სტრესებს. "ცუდი, დაუბალანსებელი კვება საგრძნობ გავლენას ახდენს იმუნურ სისტემაზე. ადამიანმა ყურადღება უნდა მიაქციოს თავისი ორგანიზმის, მათ შორის - იმუნური სისტემის სიჯანსაღეს... მიირთვით ცხიმიანი თევზი, მუქი კენკრა, ვაშლი, შავი შოკოლადი, ნუში, ბროკოლი, მიიღეთ A, D, E ვიტამინები და თუთია, მისდიეთ იოგას ან შეიძინეთ ძაღლი. ყოველივე ეს იმუნიტეტის აღდგენაში დაგეხმარებათ", - აცხადებენ ექსპერიმენტის ავტორები და იქვე დასძენენ: "მიუხედავად ასეთი ფენომენური შედეგისა, არ უნდა დაგვავიწყდეს, რომ დაავადების წყარო ინფექციაა, ამიტომ აუცილებელია ვაქცინაცია, თუმცა არ არის გამორიცხული, ჩვენმა აღმოჩენამ მკურნალობის ახალ მეთოდს ჩაუყაროს საფუძველი".
მეცნიერებმა მხედველობისთვის სასარგებლო პროდუქტები დაასახელეს
ბრიტანელმა მეცნიერებმა დაასკვნეს, რომ მხედველობის სიმახვილის შესანარჩუნებლად აუცილებელია კვების რაციონის A ვიტამინით და ომეგა-3 ცხიმოვანი მჟავებით გამდიდრება. ასეთ კვებას შეუძლია მნიშვნელოვნად შეამციროს კატარაქტისა და გლაუკომის განვითარების რისკი. სპეციალისტებმა დაასახელეს ექვსი ძირითადი პროდუქტი, რომელიც მხედველობას იცავს. ეს პროდუქტებია: კომბოსტო (100 გრამი დღეში); კვერცხი (2-3 ცალი დღეში); მოცვი (რამდენიმე ცალი ყოველ დილით); ცხიმიანი თევზი (რამდენიმე ულუფა კვირაში); ნიგოზი (ყოველდღე); ახალი ხილი (რამდენიმე ცალი დღეში).
მკერდის გაზრდის ახალი მეთოდი
Daily Mail-ის ცნობით, ავსტრიელმა მეცნიერებმა შეიმუშავეს ახალი ტექნოლოგია, რომელიც სარძევე ჯირკვლის ბუნებრივი გზით, სილიკონის გამოუყენებლად გადიდების საშუალებას იძლევა. ღორებზე გამოცდამ წარმატებით ჩაიარა, იანვარში კი ავსტრიის მიკროქირურგიის ინსტიტუტში ამ რევოლუციური ტექნოლოგიის ქალებზე გამოცდა დაიწყება. მკვლევართა თქმით, ამ მეთოდით პირველები ის ქალები ისარგებლებენ, რომლებსაც ძუძუს კიბოს გამო სარძევე ჯირკვლის ამპუტაცია აქვთ გაკეთებული. თუ გამოცდამ წარმატებით ჩაიარა, უახლოესი ათი წლის განმავლობაში სარძევე ჯირკვლის ბუნებრივი გაზრდა კოსმეტიკური ქირურგებისთვის ჩვეულებრივ პროცედურად იქცევა. ოპერაციის არსი ასეთია: სარძევე ჯირკვლის კანქვეშ ათავსებენ ძუძუს ფორმის კონტეინერს, რომელშიც მოთავსებულია ქალის ცხიმოვანი ქსოვილის ნიმუში. შემდეგ ამ ნიმუშთან მიჰყავთ სისხლძარღვი. შედეგად სტიმულირდება ცხიმოვანი ქსოვილის ზრდა და თანდათანობით კონტეინერი მთლიანად ივსება. ამ მეთოდით სარძევე ჯირკვლის გაზრდას რვა თვე სჭირდება. კონტეინერი მიკროორგანიზმების ზემოქმედებით 24 თვის განმავლობაში თავისთავად გაიწოვება. ავსტრიის მიკროქირურგიის ინსტიტუტის ხელმძღვანელმა ფილიპ მარცელმა განაცხადა: "ჩვენ გათვლა გავაკეთეთ იმაზე, რომ ბუნება ვერ იტანს ვაკუუმს და ილტვის, ნივთიერებით შეავსოს ნებისმიერი ღრუ". ქალის მკერდზე კვლევების დასრულების შემდეგ მეცნიერებს განზრახული აქვთ, მსგავსი მეთოდით ადამიანის სხვა ორგანოების გაზრდაც სცადონ.
