ნანა კალანდაძე

"რაო, გიო, ახალ თანამშრომელს საქმეების გაცნობაში ეხმარებოდი? ამიტომ იყო, მობილური მთელი დღე გამორთული რომ გქონდა?" ჩემი შეყვარებულიც ხალისით უბამს მხარს, ჩემთვის კი ეს არასასიამოვნო და გამაღიზიანებელია.

ალბათ თქვენს შეყვარებულს არ ესმის, რომ ასეთი ხუმრობა არ გსიამოვნებთ. ეცადეთ, აუხსნათ ასეთი მაგალითით: როგორ იგრძნობდა თავს, თქვენი უფროსი ნამდვილი დონჟუანი რომ იყოს და თქვენი მეგობრები გამუდმებით ხუმრობდნენ თქვენს რომანზე? რაც შეეხება თქვენს ხუმარა მეგობარს, თუ ზღვარს გადადის, ხუმრობის კილოთი სთხოვეთ, თქვენი შეყვარებულის წაქეზებას თავი დაანებოს ან უთხარით, რომ, უბრალოდ, შურს მისი. ყველაფერს კი აჯობებს, თუ შეყვარებულს შესთავაზებთ, თავისი ახალი თანამშრომელი თქვენს ხუმარა მეგობარს გააცნოს. თუ ამანაც ვერ დაამშვიდა, მაშინ ეს თემა თქვენი ხუმრობის საგნად აქციეთ.

ჩემი შეყვარებულის დედა ჩემდამი ცუდად არის განწყობილი. ის განქორწინებულია, მაგრამ დედამისს ძალიან უყვარდა ყოფილი რძალი, ამიტომ მე ცუდად მხვდება, თუმცა ჩემი შეყვარებული ცოლს ჩემს გამო არ გასცილებია. არ ვიცი, როგორ მოვაგვარო მასთან ურთიერთობა.

ცოტა ხანს მოითმინეთ. თქვენი შეყვარებულის დედა ახლა ცუდად იქნება განწყობილი მხოლოდ თქვენს მიმართ კი არა, ნებისმიერი ქალის მიმართ, რომელმაც კი შესაძლოა მისი რძლის ადგილი დაიკავოს. მისი კეთილგანწყობის მოპოვების ნებისმიერი მცდელობა მასში ნეგატიურ რეაქციას გამოიწვევს. მიუხედავად ამისა, მას მაინც ყურადღებით და თავაზიანად მოეპყარით, მიულოცეთ დღესასწაულები, მიუძღვენით საჩუქრები. თუ თქვენი და მისი ვაჟის ურთიერთობა იქნება მყარი, სერიოზული და დიდხანს გაგრძელდება, დედამისსაც მოუწევს, შეეგუოს თქვენს არსებობას.

შემოდგომაზე ბავშვს ველოდები, დედაჩემმა და ჩემმა დედამთილმა კი უკვე შეჯიბრება გამოაცხადეს. მაგალითად, მივდივართ მაღაზიაში ბავშვისთვის ნივთების შესაძენად. იწყება კამათი: ერთი ამტკიცებს, რომ გადასაფარებელი აუცილებლად ცისფერი უნდა იყოს, მეორე კი სალაროსკენ მწვანეს მიარბენინებს... ამ ყველაფერმა, ცოტა არ იყოს, დამღალა. არ ვიცი, რა იქნება, ბავშვი რომ დაიბადება...

მშვიდად აუხსენით ბებიებს, რომ რომელი ნივთი რა ფერისა იყოს, თქვენი და თქვენი მეუღლის გადასაწყვეტია. მიანიშნეთ, რომ მათი ასეთი საქციელი გულს გტკენთ, თქვენი ნერვიულობა კი არ შეიძლება. უმჯობესია, დედათქვენს თქვენ გაესაუბროთ, ხოლო თქვენს დედამთილს - თქვენი ქმარი. თუ ამ უაზრო შეჯიბრებას თავი მაინც არ დაანებეს, შეგიძლიათ, დროებით გაწყვიტოთ მათთან ურთიერთობა - ორსული ნერვებს უნდა გაუფრთხილდეს, რადგან შესაძლოა, მისი მღელვარება ბავშვის ჯანმრთელობაზე ნეგატიურად აისახოს.

თავს მარტოსულად ვგრძნობ, ზოგჯერ ხმის გამცემიც კი არ მყავს... როგორ ვიპოვო მეგობარი? ძალიან მჭირდება...

ალბათ არც ადრე ყოფილხართ კომპანიის სული და გული, ორიოდე მეგობარიც გყოფნიდათ, ახლა კი ურთიერთობა მათთანაც გაგიფუჭდათ. მეგობრების გარეშე ცხოვრება მართლაც არ არის ადვილი. ვეცდებით, რამდენიმე რჩევა მოგცეთ. ბავშვობაში მეგობრების შეძენა ადვილია. სკოლაში, პირველ კლასში ალბათ თქვენი ყურადღება მაშინვე მიიქცია რომელიმე გოგონამ, რომელსაც თქვენნაირი ჩანთა ჰქონდა. გვერდით მიუჯექით, მეორე გაკვეთილის დაწყებისას კი უკვე კარგი მეგობრები იყავით.

უფროსებისთვის ყველაფერი გაცილებით რთულია, თუმცა არსი იგივეა: ყურადღება მიაქციეთ ადამიანებს, რომელთაც თქვენთან რაღაც საერთო აქვთ და თქვენი კეთილგანწყობა აგრძნობინეთ. შესაძლოა, საპასუხო სიმპათია გამოიწვიოთ. ადამიანები თქვენდამი კეთილად რომ განაწყოთ:

• ხშირად გაიღიმეთ. შუბლშეკრული ხალხი ურთიერთობის სურვილს არ იწვევს. თუ მოღუშული იჯდებით, ვერავინ მიხვდება, რომ საინტერესო პიროვნება ხართ.
• დაანახვეთ თანამოსაუბრეს, რომ მასთან საუბარი გსიამოვნებთ, უყურეთ თვალებში, უსმინეთ და თავი დაუქნიეთ, მის ხუმრობაზე გაიღიმეთ, საუბრისას სახელით მიმართეთ.
• როცა თქვენ თვითონ პასუხობთ სხვის კითხვებს, თავი არიდეთ რთულ რეპლიკებს. აჩვენეთ, რომ გულღია პიროვნება ხართ. მხოლოდ ასე თუ იპოვით შეხების წერტილებს, საერთო შეხედულებებს, რომლებიც ურთიერთობის განვითარების საშუალებას მოგცემთ.

---

ეს ყველაფერი კარგი, მაგრამ სად უნდა გამოიყენოთ ეს წესები, თუ საღამოს შინ ატარებთ, დღისით კი სამსახურში ხართ?

• გაექეცით მარტოობას. ეცადეთ, ხშირად გაერიოთ ხალხში. სამსახურში, სადილობისას, მაგიდას კოლეგებთან ერთად მიუჯექით. იქნებ სასაუბროდ საერთო თემაც გამოძებნოთ, რათა საკუთარი თავი სხვა მხრიდან დაანახვოთ.
• გამოიჩინეთ ინიციატივა: დაურეკეთ ნაცნობებს და შესთავაზეთ, საყიდლებზე გამოგყვეთ. შეახსენეთ თავი ყოფილ თანაკურსელებს, დაპატიჟეთ კინოში, რათა ძველი კონტაქტები აღადგინოთ.
• ფართო შესაძლებლობები აქვს ინტერნეტს. ნუ იფიქრებთ, რომ იქ მაინცდამაინც სოციალურად საშიში ტიპები იკრიბებიან. მოძებნეთ საერთო ინტერესების მქონე დაჯგუფებები - იქ შესაძლოა შეხვდეთ ადამიანებს, რომელთაც თქვენნაირი შეხედულებები აქვთ. სავსებით შესაძლებელია, დროთა განმავლობაში ვირტუალური ურთიერთობა რეალურში გადაიზარდოს.

აჩვენეთ ადამიანებს, რომ ურთიერთობა გსურთ და ისინიც ამითვე გიპასუხებენ.

ბევრს აინტერესებს ჩემი პირადი ცხოვრება. როგორ დავიცვა თავი ცნობისმოყვარეთაგან?

ზოგჯერ გგონიათ, რომ ეკრანის ვარსკვლავი ხართ, იმდენ ყურადღებას იჩენენ თქვენი პერსონის მიმართ; გეჩვენებათ, რომ თქვენი პირადი ცხოვრება და მასთან დაკავშირებული წვრილმანები გარშემო მყოფებს მშვიდი ძილის საშუალებას არ აძლევს... როცა კიბეზე მეზობელი ქალი გხვდებათ, ნამდვილ დაკითხვას გიწყობთ: "ვინ იყო ის ახალგაზრდა, გუშინ საღამოს რომ მოგაცილა? რატომ უკეთია თითზე საქორწინო ბეჭედი?" სამსახურში, შესვენებისას, თქვენს მაგიდას მიუჯდება კოლეგა და გეუბნებათ, რომ დილით თანამშრომელ ბიჭთან ერთად დაგინახათ, თქვენი თაყვანისმცემელი ხომ არ არის? ვიღაცამ პოლიკლინიკაში მოგკრათ თვალი და დაინტერესდნენ, ჯანმრთელობას ხომ არ უჩივით ან რა გაწუხებთ...

იქნებ უნებურად თვითონვე იპყრობთ ირგვლივ მყოფთა ყურადღებას. აბა, კარგად დაფიქრდით, ჰოლივუდის ვარსკვლავებიდან ყველაზე ხშირად ვინ იქცევა ელიტური ჭორებისა და პაპარაცების მსხვერპლად. დიახ, ის, ვინც საამისო საბაბს იძლევა, ვინც აფიშირებას უწევს თავის რომანებს, ეხვევა ორაზროვან ისტორიებში, არ აკონტროლებს საკუთარ საქციელს. თქვენი ზედმეტი ღიაობა, თავშეუკავებლობა შესაძლოა ჭორების მოყვარულთათვის შესანიშნავ საზრდოდ იქცეს.

დაფიქრდით, როგორ გიჭირავთ თავი კოლეგების თანდასწრებით. მაგალითად, თუ სამუშაო საათებში ურეკავთ მეგობარს და ხმამაღალი ჩურჩულით ატყობინებთ გუშინდელი პაემნის შესახებ, არ უნდა გაგიკვირდეთ, რომ თანამშრომლები ყურებს დაცქვეტენ... არასოდეს ისაუბროთ პირად საქმეებზე უცხოთა თანდასწრებით. თუ მოკრძალებულად მოიქცევით, ირგვლივ მყოფებს თქვენდამი ინტერესი თანდათან გაუნელდებათ. არიან ისეთი ადამიანებიც, რომელთაც არავითარი საბაბი არ სჭირდებათ საიმისოდ, რომ კითხვები დაგაყარონ. ასეთ "პროფესიონალ ჭორიკნებთან" საუბრისას ეცადეთ, დისტანცია დაიცვათ. როცა ცნობისმოყვარე მეზობელს შეეჩეხებით, მიესალმეთ და ისე ჩაუარეთ, რომ ნაბიჯი არ შეანელოთ. ვერ ახერხებთ? კეთილი, ესაუბრეთ, მაგრამ არ არის საჭირო, დაწვრილებით უპასუხოთ მის ყოველ შეკითხვას. დეტალებს ნუ ჩაუღრმავდებით. ნურც გაყინული სახით გაჩერდებით - ასეთი ინჭორბიუროსთვის ესეც საკმარისია, რომ იფიქროს, რაღაცას მალავსო. უმჯობესია, საუბარი სხვა თემაზე გადაიტანოთ, მაგალითად, ქალბატონს კომპლიმენტი უთხრათ. ყურადღება თქვენგან მისკენ გადაინაცვლებს და ორივე კმაყოფილი დარჩებით.