მეცნიერებმა მოხუცებულთა გულმავიწყობის მიზეზი გაარკვიეს
მათი აზრით, ამ პროცესებში ძირითად როლს თამაშობს ტვინის სხვადასხვა უბანში ინფორმაციის გადამცემი სისტემა, რომელიც ამა თუ იმ ხარისხით ზიანდება ასაკის მატებასთან ერთად.
მეცნიერთა ჯგუფმა, რომელსაც ჯესიკა ენდრიუს-ჰანა ხელმძღვანელობდა, 18-დან 93 წლამდე ასაკის 93 ჯანმრთელი ადამიანი გამოიკვლია. მათ წინასწარ ჩაუტარდათ სათანადო გამოკვლევა, რომელმაც დაადასტურა, რომ არც ერთ მათგანს ალცჰაიმერის დაავადების საწყისი სტადიაც კი არ ჰქონდა. ყველა მონაწილეს ჩაუტარდა თავის ტვინის მაგნიტურ-რეზონანსული კვლევა. გარდა ამისა, მათ გაიარეს ფსიქოლოგიური ტესტირება მახსოვრობისა და სხვა კოგნიტური შესაძლებლობის შესამოწმებლად.
აღმოჩნდა, რომ ასაკის მატებასთან ერთად თითოეულ მონაწილეს ერღვეოდა ურთიერთკავშირი ტვინის სხვადასხვა, ამა თუ იმ ფსიქიკურ პროცესზე (მახსოვრობაზე, ინფორმაციის აღქმასა და გადამუშავებაზე და ა.შ.) პასუხისმგებელ უბნებს შორის. ამ "საინფორმაციო არხების" მეშვეობით ტვინი თავისი სხვადასხვა უბნიდან მიღებული ინფორმაციის კოორდინირებას ახდენს. მეცნიერები ამ პროცესების დარღვევის მიზეზად "არხების" საამშენებლო მასალის - ტვინის თეთრი ნივთიერების დაზიანებას მიიჩნევენ. მათ შეამჩნიეს, რომ ასაკთან ერთად სულ უფრო მეტად ირღვევა ურთიერთკავშირი თავის ტვინის წინა და უკანა ნაწილებს შორის.
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
"ჩვენ აღმოვაჩინეთ, რომ ახალგაზრდების თავის ტვინის წინა და უკანა ნაწილები სინქრონულად მუშაობენ, მოხუცებულებისა კი - არა, ამიტომაც მათი ტვინის უბნები ერთმანეთთან ნაკლები ხარისხით "თანამშრომლობენ", - განაცხადა ენდრიუს-ჰანამ. ამასთანავე, ტვინის უბნების სინქრონიზაციის დარღვევა ყველა მონაწილეს ერთნაირად არ ჰქონდა გამოხატული.
მეცნიერები აცხადებენ, რომ კვლევის შედეგად მიღებული მონაცემები კოგნიტური ფუნქციის ასაკობრივი დაქვეითების მექანიზმის უკეთ გარკვევის საშუალებას იძლევა და შესაძლოა, ამ დაღვევების შემაფერხებელი მეთოდის შემუშავებისთვის იქნეს გამოყენებული.
