5 რჩევა, როგორ არ უნდა ეცვას მამაკაცს ზაფხულში
ამგვარი შეცდომების თავიდან აცილება შესაძლებელია, თუ გავითვალისწინებთ სპეციალისტთა რჩევებს.
1. ყურადღებით შეარჩიეთ ფეხსაცმელი და ზაფხულში დაივიწყეთ წინდები.
წინდა და ღია ფეხსაცმელი შეუთავსებელია, რადგან ზაფხულში ეს შეუსაბამობა ყველაზე მეტად თვალშისაცემია. ზაფხულის ღია ფეხსაცმელი უნდა ჩაიცვათ შიშველ ფეხზე. წინდების ჩაცმა ულამაზოა ლოფერებთან, მოკასინებთან და სლიპერებთანაც. ეს გავრცელებული შეცდომაა, რაც მიუთითებს, რომ მამაკაცს არ ადარდებს საკუთარი გარეგნობა. თუ წინდების გარეშე ვერ ძლებთ, შეარჩიეთ დახურული საზაფხულო ფეხსაცმელი.
არ შეიძინოთ თეთრი ფეხსაცმელი. ფეხსაცმელი ყოველთვის შარვალზე მუქი უნდა იყოს. ზაფხულისთვის იდეალურია ყავისფერი და ლურჯი ფეხსაცმელი. წინდა კი, შარვლის ან ფეხსაცმლის ფერის მიხედვით უნდა შეირჩეს. თეთრი წინდები დაივიწყეთ.
2. ნუ ჩაიცვამთ ტანზე მომდგარ მაისურებს.
თუ სხეული არაა იდეალურ ფორმაში, ტანზე მომდგარი მაისურები ამას კიდევ უფრო მეტად გამოკვეთს. მაისური სპორტული სამოსია. თუ მოდურობა გსურთ, ის ტანზე მომდგარი პერანგით ან პოლოთი ჩაანაცვლეთ.
ზაფხულში შეიძლება შენიშნოთ მამაკაცი ბადე მაისურითაც, საიდანაც არასპორტული ტორსი და სხეულზე თმაც კი მოჩანს. ასეთი სამოსი თავმოყვარე მამაკაცს არ უნდა ჰქონდეს. არ შეიძინოთ წარწერებიანი მაისურები. მოდური მამაკაცის სამოსზე სასაცილო ფრაზები საერთოდ მიუღებელია. ეს მოზარდებისთვისაა.
ზოგიერთი კაცი პერანგის ქვეშ მაისურს იცვამს. ზაფხულში ამის აუცილებლობა არ არის, მაგრამ თუ მაინც გსურთ მისი ჩაცმა, მაისური პერანგის ფერი უნდა იყოს და არა მასზე მუქი.
3. პერანგი იქონიეთ თავისუფლად, შარვლიდან ამოწეული, და მოერიდეთ მასზე დატანილ გეომეტრიულ ნახატებს.
ზაფხულში თავისუფლად შეიძლება შარვლის ზემოდან გადმოშვებული პერანგის ჩაცმა, ისიც იმ შემთხვევაში, თუ სამოსი ყოველდღიურია და არა საოფისე. პერანგი უნდა იყოს ოპტიმალური სიგრძისა. შორტებში ჩაწეული პერანგები სასაცილოდ ჩანს და თითქოს იმას მიანიშნებს, რომ მამაკაცი ვერ შეელია ბავშვობის ჩვევებს. გამონაკლისია შარვლის ფაქტურის შორტი ქამრით.
პერანგის ყველა ღილზე შეკვრა აუცილებელი არ არის. იდეალურია ზემოთ გახსნილი 2-3 ღილი. მთავარია, ღია პერანგიდან არ ჩანდეს თმიანი მკერდი.
თუ პერანგი გეომეტრიული ფორმის ნახატებითაა შემკული, ქვედა მხარე ერთი ფერისა უნდა იყოს.
სტილისტები არ გვირჩევენ ჰავაის სტილის პერანგების ქალაქში ტარებას.
4. ყურადღება მიაქციეთ შორტის სიგრძეს.
ხშირად მამაკაცებს ქალაქში პლაჟისთვის განკუთვნილი მოკლე შარვლები აცვიათ. შორტის სიგრძე კიდევ ერთი პიკანტური საკითხია. ოპტიმალურად ითვლება შარვალი მუხლზე და არა მასზე მოკლე. მოკლე შარვლები ბავშვებისთვისაა. მამაკაცმა, თუ ის პლაჟზე არ არის, მოკლე შარვალი არ უნდა ჩაიცვას. მუხლს ქვემოთ შორტებიც არ არის მისაღები ვარიანტი.
სტილისტების რჩევაა, შორტთან ერთად არ ჩაიცვათ ფლოსტები. ამისათვის შეარჩიეთ ლოფერები ან სლიპერები. პლაჟის სტილი, ჯობს, უფრო „მკაცრი“ სამოსით – პოლოთი, პერანგით, პიჯაკით ან კარდიგანით შეავსოთ.
5. ზომიერად გამოიყენეთ აქსესუარები.
სჯობს, სამაჯურებსა და დიდი ზომის ბეჭდებზე უარი თქვათ. მოდური მამაკაცისთვის ტყავისსამაჯურიანი საათი და ჯვრისწერის ბეჭედიც საკმარისია. ძეწკვიც შეუმჩნეველი უნდა იყოს.
მამაკაცის ჩანთა ჭკვიანურად უნდა შეირჩეს. მცირე ზომის ჩანთები სასაცილოდ გამოიყურება. ალტერნატივა მხარზე გადასაკიდებელი ჩანთა ან პორტმონეა. ნორმალურ მოვლენად ითვლება მამაკაცის დიდი ტყავის ან ნაჭრის ჩანთები.
სათვალის შუბლზე ან თხემზე გაკეთება დაუშვებელია. მოხსნილი სათვალე ჩანთაში ან ჯიბეში შეინახეთ.