რა უნდა ეცვას მამაკაცს
ის ნივთებიც კი, რომლებიც თავის დროზე ძალიან მოგვწონდა და გვიზიდავდა, დროთა განმავლობაში ჩვეული და ყოველდღიური ხდება, აღარ მოგვწონს და აღარც მოდურად მიგვაჩნია.
მაინც რა არის მოდა?
მოდას უწოდებენ ამა თუ იმ პერიოდში არსებულ საყოველთაოდ მიღებულ დამოკიდებულებას კულტურის გარეგნული ფორმების: ავტომობილების, ქცევის, საუბრის მანერის, ცხოვრების სტილისა თუ სამოსის მიმართ. ვიწო მნიშვნელობით კი მოდა, ჩვეულებრივ, ტანსაცმელს გულისხმობს.
ადამიანის სხეული, შეიძლება ითქვას, არის ნიადაგი მოდის სტილიზაციისთვის და ყოველი ეპოქა ქმნის ადამიანის სხეულის საკუთარ ესთეტიკურ იდეალს. ტანსაცმელი ხაზს უსვამს ან ფარავს სხეულის ზოგიერთ ნაწილს ისე, რომ მას თანამედროვე იდეალთან აახლოებს.
მოდის საშუალებით ადამიანი ცდილობს შეეხამოს, შეერწყას გარემომცველ სამყაროს, იყოს საზოგადოების ნაწილი და ამავე დროს რაღაცით განსხვავდებოდეს, გამოირჩეოდეს საზოგადოებისგან.
ზოგიერთის შეხედულება, რომ საკმარისია, მამაკაცის ტანსაცმელი უბრალოდ სუფთა და გაუთოებული იყოს, საფუძველშივე მცდარია. თანამედროვე ცხოვრება, განსაკუთრებით - დიდ ქალაქებში, მამაკაცის გარდერობს არანაკლებ მკაცრ მოთხოვნებს უყენებს, ვიდრე ქალისას. ადამიანს პირველი შეხვედრისას ხშირად ჩაცმულობით უფრო აფასებენ, ვიდრე ჭკუა-გონებით. გამონაკლისი არც მამაკაცის შეფასების კრიტერიუმებია.
ძველმოდური კოსტიუმი, ფორმაშეცვლილი განიერი მაისური და ლაქა ქალზე ისევე მოქმედებს, როგორც ხარზე - წითელი ნაჭერი. მამაკაცს, რომელიც საკუთარ თავს პატივს სცემს, გარდერობში უნდა ჰქონდეს საქმიანი კოსტიუმიც, ყოველდღიური და სპორტული სამოსიც. ჰალსტუხები, ფეხსაცმელები, ქამრები და წინდები ასევე მნიშვნელოვანია. აღარაფერს ვამბობთ იმაზე, რომ ეს ყველაფერი უნდა იყოს ხარისხიანი, პრაქტიკული და მოდური.
მამაკაცისთვის ტანსაცმლის შერჩევა ერთგვარ გამოცდასაც წარმოადგენს. მას არ შეუძლია, საკუთარ თავს შორიდან შეხედოს და განსაზღვროს, უხდება თუ არა ესა თუ ის პერანგი, რადგან მამაკაცებს, საზოგადოდ, წვრილმანებში გარკვევა უჭირთ. მოდის ბრმად მიმდევრობა იმას ნიშნავს, რომ პიროვნებას საკუთარი სტილი არ გააჩნია, თუმცა სტილიც არის და სტილიც. გასული ათწლეულების სამოსის ელემენტები თანამედროვე მამაკაცის გარდერობში, მინიმუმ, უადგილო იქნება. თანამედროვე მამაკაცი მოდის უკანასკნელ ტენდენციებს უნდა იცნობდეს და შეეძლოს, ისინი საკუთარ სტილს მოარგოს.
მამაკაცის ჩაცმულობის ერთ-ერთი პოპულარული სტილი კლასიკურია. კლასიკურ სტილს აქვს მოთხოვნათა ვრცელი ნუსხა, რომელიც იწყება ჰალსტუხის სიგანით და მთავრდება თასმების ფერით. ამ წვრილმანებში გასარკვევად მამაკაცს შესაძლოა პროფესიონალების დახმარება დასჭირდეს - ისინი იცნობენ თანამედროვე მოდის ყველა ტენდენციას.
არსებობს კიდევ ერთი საკმაოდ პოპულარული სტილი, რომელსაც casual style ეწოდება. ეს არის პრაქტიკული მოდა და მოიცავს ყველაფერს, რაც ყოველდღიურად შეიძლება ჩავიცვათ: მაისურებს, ჯინსებს, ქურთუკებს, ფეხსაცმელებს, სვიტერებს. ასეთ სტილს ამჯობინებენ სტუდენტები, დემოკრატიული კომპანიების თანამშრომლები.
თუ მამაკაცის მოდის წლევანდელ ტენდენციებზე ვისაუბრებთ, მისი ლაიტმოტივია კლასიკა, თავშეკავებული ელეგანტურობა, სტილი casual .
ამ სეზონზე მამაკაცები უპირატესობას ანიჭებენ მოხერხებულ, კლასიკურ მოდელებს, თავისუფალ თარგს, მშვიდ ფერებს: შავს, თეთრს, რუხს, კრემისფერს, ყავისფერს. უარს ამბობენ გლამურულ ელემენტებზე. წლევანდელი შემოდგომა-ზამთრის ზედა ტანსაცმლის ლიდერია კლასიკური პალტო. აქტუალური იქნება წელზე მომდგარი კოსტიუმებიც.
სამოსის არჩევისას შეიძლება თავს ფანტაზიის უფლება მივცეთ - ეს გემოვნების ამბავია, მაგრამ ჯობს გავითვალისწინოთ რამდენიმე მნიშვნელოვანი მომენტიც: ფასი და ხარისხი ერთმანეთს უნდა შეესაბამებოდეს, ხოლო თავად ნივთი - ჩვენს სტილს. მოდური მამაკაცის გარდერობში წვრილმანები არ არსებობს. მისი იმიჯი თავიდან ფეხებამდე გააზრებული უნდა იყოს. ადამიანისთვის, რომელიც დროის დიდ ნაწილს სამსახურში ატარებს, გარდერობის არჩევა საკმაოდ პრობლემურია. უბრალოდ, ტანსაცმელზე ფიქრის დრო აღარც კი რჩება და იცვამს ყველაფერს, რაც ხელში მოხვდება. ასეთ ადამიანებს სტილისტის დახმარება სჭირდებათ.
სტილისტი შეგირჩევთ ჩაცმის მანერას, გასწავლით ტანსაცმლის მოვლას, დაგეხმარებათ სასურველი და თქვენთვის შესაფერისი ნივთის შეძენაში იქ, სადაც არჩევანის საშუალებაც არის და ფასიც ხელმისაწვდომია.
გასაკვირი არ არის, რომ სტილისტები უმეტესად მანდილოსნები არიან - ქალის მახვილ თვალს არაფრით გამოეპარება ტანსაცმლის ღირსებები თუ ნაკლოვანებები. მამაკაცებს, ქალებისგან განსხვავებით, ტანსაცმლის მაღაზიებში სიარული არ უყვართ. საბედნიეროდ, დღეს არსებობს სამოსის შეძენის უფრო მარტივი და მოხერხებული გზა. ეს არის ინტერნეტმაღაზია, რომელიც საშუალებას გვაძლევს, სწრაფად შევარჩიოთ სასურველი ნივთი მდიდარი ასორტიმენტიდან.