ფრჩხილების დაგრძელება
მოდი, გავარკვიოთ. ფრჩხილების დასაგრძელებლად იყენებენ გელს, აკრილს, აბრეშუმსა და ფისს. როგორ მოქმედებს ეს ნივთიერებები ბუნებრივ ფრჩხილზე? ფრჩხილი ერთგვარი ჯავშანია, რომელიც საფრჩხილე ზედაპირს, ფრჩხილბუდეს, მექანიკური ფაქტორებისა და მავნე მიკროორგანიზმებისგან იცავს. თუ ფრჩხილის დაგრძელების პროცედურას ატარებს პროფესიონალი, რომელიც ითვალისწინებს კლიენტის ჯანმრთელობის მდგომარეობას და ზედმიწევნით იცავს ტექნოლოგიას, საშიში არაფერია, მაგრამ თუ ამ საქმეს არასათანადო გამოცდილებისა და ცოდნის მქონე ადამიანმა მოჰკიდა ხელი, პრობლემები გარდაუვალია. თუ ფრჩხილებს ტიპსებით ვიგრძელებთ, ფრჩხილსა და ტიპსს შორის ჰაერი არ უნდა მოხვდეს. წინააღმდეგ შემთხვევაში ამ ადგილას შეიძლება ანაერობულმა ბაქტერიებმა დაიბუდოს და ინფექცია განვითარდეს. ფრჩხილის არასწორად ჩატარებულმა კორექციამ შესაძლოა სოკოვან ინფექციამდე მიგვიყვანოს. მაგალითად, მაშინ, თუ მანიკიურის სპეციალისტმა არ დაამუშავა ფრჩხილის ის უბანი, რომლის ქვეშაც მოხვდა ჰაერი და ისე დაადო ზემოდან ახალი ფენა. საშიშია ფრჩხილის კიდეების გასწორებაც. თუ უნებლიეთ დაზიანდა ზრდის ზონა, ფრჩხილის ზრდა შეფერხდება, ანდა ფირფიტა უსწორმასწოროდ გაიზრდება. ფრჩხილის ფირფიტა შეიძლება დაზიანდეს ხელოვნური ფრჩხილის მოშორების დროსაც. არაფრით არ შეიძლება მისი გადაქლიბვა ან ძალით მოძრობა - ამ დროს ფრჩხილი შრევდება და ტყდება. ხელოვნური ფენა უნდა მოსცილდეს სპეციალური გამხსნელი საშუალების დახმარებით.
შეიძლება თუ არა ფრჩხილების დაგრძელება ალერგიულთათვის?
ქიმიური ნივთიერებების მიმართ ალერგიული რეაქცია შესაძლოა განვითარდეს ნებისმიერი კოსმეტიკური პროცედურის დროს, რადგან კოსმეტიკური საშუალებები უმთავრესად ქიმიური წარმოშობისაა.
ალერგიამ შესაძლოა თავი იჩინოს გამონაყარითა და ქავილით, თანაც არა მარტო პროცედურის დასრულებისთანავე, არამედ რამდენიმე თვის შემდეგაც კი. ალერგიული რეაქციების მკურნალობა ხანგრძლივი პროცესია და შესაძლოა თვეობით გასტანოს. ფრჩხილების დაგრძელების პროცედურამ უსიამოვნება რომ არ შეგამთხვიოთ, მიმართეთ კვალიფიციურ სპეციალისტს. თუ ის პროცედურის დაწყებამდე არ დაინტერესდა თქვენი ჯანმრთელობის მდგომარეობით, ყურადღებით არ დაათვალიერა ფრჩხილები და არ ჩაატარა ხელების დეზინფექცია, მის მომსახურებაზე უარი თქვით.
როგორ გავიშროთ ლაქი სწრაფად
ლაქის სწორად წასმა სწრაფად გაშრობის საწინდარია. თავდაპირველად აუცილებელია ფრჩხილის მომზადება შესაღებავად, რათა ლაქი თანაბრად წაესვას და მიმზიდველი შესახედაობა მიიღოს. ლაქის ფენა არ უნდა იყოს სქელი - სქლად წასმული ლაქი ადვილად აშრევდება და გასაშრობადაც უფრო მეტი ხანი სჭირდება. პირველი ფენის წასმის შემდეგ, ვიდრე მეორეს გადავისვამდეთ, ერთი წუთი მაინც უნდა დავიცადოთ - ლაქი გაშრება და ფრჩხილის ზედაპირი თანაბარი გამოვა. ლაქი სწრაფად რომ შეშრეს, წასმამდე 20 წუთით ადრე შედგით მაცივარში. შეიძლება გაიშროთ ჩვეულებრივი თმის ფენითაც, ოღონდ ცივი შრობის პროგრამით - ცხელმა შესაძლოა მანიკიური გაგიფუჭოთ. გარდა ამისა, ცხელი ჰაერის ზემოქმედებით თავად ფრჩხილებიც იქერცლება და მყიფე ხდება. ლაქის სწრაფად გაშრობის კიდევ ერთი საშუალებაა ცივი წყალი. ჩაყავით თითის წვერები ცივ წყალში და რამდენიმე წუთი გააჩერეთ. თუ წყალში ყინულის კუბიკებსაც ჩაყრით, მას მატონიზებელი ეფექტიც ექნება. ამგვარად ერთმანეთს შეუთავსებთ ხარისხიან მანიკიურსა და ფრჩხილების მოვლას.