ნანა კალანდაძე

. ზამთარში, კლიმატური პირობების გავლენით, კანი შრება, იქერცლება, იოლად ზიანდება და ღიზიანდება. უსიამოვნო შეგრძნებების, გამონაყარის გაჩენისთანავე მიიღეთ ზომები. ექიმის რეკომენდაციის საფუძველზე დაიწყეთ იმ პრეპარატების მიღება, რომლებიც შეიცავს თუთიას, A და E ვიტამინებს. რეგულარულად დაატენიანეთ კანი, ხშირად ისხურეთ სუფთა მინერალური წყალი. ასეთი მოვლის წყალობით კანი სწრაფად აღიდგენს თავდაპირველ, ჯანსაღ იერს.

. კანის გამოშრობას, მისი ტონუსის დაქვეითებას, კანის ნაადრევ დაბერებამდე მივყავართ. იმისთვის, რომ არ დაუშვათ გაუწყლოება, თავი არიდეთ შარდმდენი საშუალებების მიღებას და ყოველდღე სვით არანაკლებ 1,5-2 ლიტრი წყალი. სასარგებლოა დეზოდორირებული თევზის ქონის კაფსულები (1 კაფსულა დღეში) და ლუდის ახალი საფუარი (2 გრამი დღეში). აკეთეთ სპეციალური მიმიკური ვარჯიშები სახის კუნთების ტონუსის ასამაღლებლად.

სახის კანის სინორჩისა და ელვარების დაბრუნებაში დაგეხმარებათ პიტნისა და ლავანდის ეთერზეთებით მომზადებული ორთქლის აბაზანები: აადუღეთ 2 ლიტრი წყალი, დაამატეთ 3 წვეთი ზეთი, თავზე გადაიფარეთ პირსახოცი და ისუნთქეთ არომატი 7-10 წუთის განმავლობაში.

. გაზაფხულზე აქტიურდება კანის ანთებითი დაავადებები, მუწუკები, ფერიმჭამელები, აკნე, რომლებიც აუარესებენ არა მხოლოდ გარეგნობას, არამედ განწყობასაც. ამის თავიდან ასაცილებლად საჭიროა, სახე დილა-საღამოს ოხრახუშის ფოთლების ნახარშით დაიბანოთ.

თუ კანი დაღლილი და მოშვებული ჩანს და პირველი ნაოჭებიც გაუჩნდა, სახე ოხრახუშის ნაყენისგან მომზადებული ყინულის კუბებით გაიწმინდეთ: აიღეთ ოხრახუშის 5-10 ღერო, დაასხით 200 მლ მდუღარე წყალი, შედგით ღუმელში 20-30 წუთით, შემდეგ გაწურეთ, გააგრილეთ, ჩაასხით ყინულის ფორმებში და გაყინეთ. კარგია ასეთი საშუალებაც: ოხრახუშის მაგარ ნახარშს დაამატეთ ლიმონის წვენი და გაყინეთ. სახე ამ ყინულით გაიწმინდეთ. ეს დაგიცავთ ჭარბი ნამზეურისა და ჭორფლისაგან;

. ცელულიტის მთავარი მიზეზი არასწორი კვება, ნაკლებად მოძრავი ცხოვრების წესი და სტრესია. ცხიმის დაგროვების შემცირებასა და ფორთხოლის ქერქის წარმოქმნის თავიდან აცილებაში დაგვეხმარება თვითმასაჟი ეთეროვანი ზეთებით.

აიღეთ სხეულისთვის განკუთვნილი ნებისმიერი კრემი, დაუმატეთ 2 წვეთი ნემსიწვერას ზეთი, 3 წვეთი ლიმონის ზეთი და ერთგვაროვანი მასის მიღებამდე ურიეთ. მიღებული კრემი ენერგიული წრიული მოძრაობებით შეიზილეთ სხეულის პრობლემურ ადგილებში. რამდენიმე წუთის შემდეგ ეთეროვანი ზეთი მიაღწევს კანის ღრმა ფენებს. ეს ზრდის მასაჟის ეფექტურობას და კანის უჯრედებს წიდისგან წმენდს.

ძალიან ეფექტურია მინდვრის შვიტას ნაყენით დაზელაც. მეორე უკიდურესობაა ზედმეტად ცხიმიანი კანი. ის ქმნის ნორმალური დატენიანების ცრუ შთაბეჭდილებას, სინამდვილეში კი ცვილივით გამოიყურება, ხოლო ფორები გაფართოებულია.

გულყვითელას ნაყენით გაწმენდა ამცირებს ფორებს და ცხიმის გამოყოფას.

ცხიმიანი კანისთვის რეკომენდებულია აგრეთვე გვირილის, ლავანდის, კრაზანასა და მწვანე ჩაის ნახარშები. შეგიძლიათ, ამ მცენარეების ნახარშებისგან მოამზადოთ ყინულის კუბები და კანი დილა-საღამოს გაიწმინდოთ.

კანის ჭარბი ცხიმიანობის დროს აუცილებელია დაბალანსებული კვება, განსაზღვრული რაციონი. ფიზიკური აქტივობა, ორგანიზმის გაწმენდა. ზედმეტი ნევროზულობის შემთხვევაში მიიღეთ ექიმის კონსულტაცია. გაითვალისწინეთ, რომ ცხიმის ჭარბი გამომუშავება შეიძლება გამოიწვიოს ორალური კონტრაცეპტივების მიღებამ.

. ისე არაფერი გასცემს ქალის ასაკს, როგორც ხელები. თუ ხელებზე კანი გექერცლებათ ან გიშრებათ, მოამზადეთ ნარევი მკვებავი კრემისა და როზმარინის (ზღვის ვარდის) ზეთისგან. ყოველ დილა-საღამოს შეიზილეთ ხელებში ნარევი. კანი გლუვი, ელასტიკური და ნაზი გახდება.

ფრჩხილების გასამაგრებლად მიიღეთ A, B, C, PP, E ვიტამინები. რბილი და მსხვრევადი ფრჩხილები შეიძლება ვკვებოთ ნემსიწვერასა და ძირას ეთეროვანი ზეთებით. ძალიან სასარგებლოა ზღვის მარილის აბაზანებიც.

სახის კანს მრავალი ბუნებრივი დამხმარე ჰყავს. მაგალითად, გვირილა შეიცავს დამარბილებელ ნივთიერებებს და ამშვიდებს გამონაყარს კანის ანთებითი პროცესების დროს, გულყვითელას აქვს ანტისეპტიკური თვისებები, აჩქარებს და აუმჯობესებს ჭრილობების შეხორცებას, ჭინჭარი დაგეხმარებათ ზედმეტი ცხიმიანობის დროს, ამაგრებს თმის ძირებს და აშორებს ქერტლს.