მეჭეჭი - პატარა, საფრთხე - დიდი
რა არის მეჭეჭი?
მეჭეჭი ადამიანის პაპილომავირუსული ინფექციის გამოხატულებაა და, ამასთან, უნარი შესწევს, ერთი ადამიანისგან მეორეს გადაედოს. ამისთვის ზოგჯერ უშუალო კონტაქტია საჭირო, ზოგჯერ კი პირადი ჰიგიენის ნივთებით სარგებლობაც საკმარისია. მეჭეჭებს თვითინფიცირების უნარიც ახასიათებს. მათთვის ჩვეულებრივი რამაა ახალი ტერიტორიების დაპყრობა ანუ კანის უკვე ინფიცირებული უბნებიდან სხვა, ჯანმრთელ უბნებზე გავრცელება. რამდენადაც მეჭეჭი ინფექციის წყაროა, ის უნდა მოვიცილოთ. აქ სადავო არაფერია. მთავარია, სწორად შევარჩიოთ იარაღი მასთან საბრძოლველად.
ხალხური მედიცინა ზოგჯერ უძლურია
ხალხური მედიცინა ზოგჯერ უძლურია მეჭეჭების წინააღმდეგ. ძმარი და ნიორი, კარტოფილი, ალოეს წვენი და ვაშლის ძმარი ყოველთვის ვერ ახერხებს მათ გაქრობას, ალერგიისადმი დადებითად განწყობილ პირებთან კი შესაძლოა ალერგიული დერმატიტის ან ნაწიბურების მიზეზად იქცეს, ამიტომ სიფრთხილეს გირჩევთ.
შეიარეთ აფთიაქში
შეიარეთ უახლოეს აფთიაქში და ჰკითხეთ ფარმაცევტს, აქვთ თუ არა მეჭეჭების მოსაცილებელი საშუალება. უმალვე დარწმუნდებით, რომ ასორტიმენტი საკმაოდ ფართოა.
რა უნდა გაითვალისწინოთ სახლის პირობებში მეჭეჭების მოცილებისას
- უპირველეს ყოვლისა, გახსოვდეთ, რომ მჟავა ან ტუტე ხსნარის დაუდევარმა გამოყენებამ შესაძლოა კანის ქიმიურ დამწვრობამდე და არასასურველი ნაწიბურების განვითარებამდე მიგიყვანოთ, ამიტომ გირჩევთ, შეძენისას ყურადღება გაამახვილოთ არა მხოლოდ წამლის სასურველ შემადგენლობაზე, არამედ იმაზეც, რომ მას ზედმიწევნით მოხერხებული აპლიკატორი ჰქონდეს.
- თუ მეჭეჭი მრავლობითია, წამალს უნდა ჰქონდეს ერთჯერადი აპლიკატორები მეჭეჭების ინდივიდუალურად დასამუშავებლად.
- უნდა დამუშავდეს მხოლოდ მეჭეჭი და არა მის ირგვლივ მდებარე ჯანმრთელი კანი, თორემ ნაწიბურებსა და დამწვრობას ვერ გადაურჩებით.
მეჭეჭების მოსაცილებელი თანამედროვე საშუალება უნდა აკმაყოფილებდეს შემდეგ მოთხოვნებს:
- დაშალოს მეჭეჭის ქსოვილი გელისმაგვარი კონსისტენციის სქელი პრეპარატით, რომელიც ახლომდებარე ქსოვილებზე არ გადადის;
- ჰქონდეს თხელი აპლიკატორი, რომელიც წამლის სწორი დოზირების და მეჭეჭის წერტილოვანი დამუშავების საშუალებას იძლევა, რითაც მინიმუმამდე დაჰყავს დამწვრობისა და ნაწიბურების განვითარების რისკი.
- თუ წამალი სწორადაა შერჩეული, 3-4 დღეში თავადაც შეამჩნევთ, რომ მეჭეჭები თანდათან პატარავდება და ატროფირდება, განილევა.
- საბოლოო შედეგი არ უნდა გადასცდეს მე-14 დღეს.
- თუ მეჭეჭი ორ წელიწადზე მეტია გაქვთ, გამორიცხული არ არის, მკურნალობის დამატებითი კურსი გახდეს საჭირო.
- მეჭეჭის მოსაცილებელ თანამედროვე საშუალებათა არსენალშია კრიოგელები - მომყინავი გელები, რომლებიც კრიოთერაპიის საშუალებით აცილებს მეჭეჭებს. ზოგჯერ მეჭეჭის მოსაცილებლად ერთი კრიოპროცედურაც საკმარისია.
როგორ წავისვათ წამალი
გამოყენების წინ ყურადღებით უნდა გაეცნოთ ინსტრუქციას, თუმცა არსებობს ზოგადი წესებიც:
- პრეპარატის მეჭეჭზე დაყოვნების დრო სხვადასხვაა. მაგალითად, ხელზე 20 წამი საკმარისია, ქვედა კიდურებზე კი ორჯერ მეტი დროა საჭირო - 40 წამი.
სწორად შეარჩიეთ თუ არა პრეპარატი, ორი კვირის შემდეგ შეიტყობთ. თუ 14-დღიანი კურსის შემდეგ მეჭეჭი ან მისი ნაწილი მაინც არ გაქრა, ან პრეპარატის შეცვლაა საჭირო, ან სამკურნალო პროცედურის გამეორება.
