ლალი ჩხიკვაძე

ექსპერტები ამბობენ, რომ გარკვეული ვიტამინები აუცილებელია ჯანსაღი კანისთვის. ვიტამინების ნაკლებობამ შეიძლება კანი გახადოს უსიცოცხლო, მშრალი ან ზედმეტად ცხიმიანი. რომელი ვიტამინებია ასე საჭირო კანისთვის? ჯანსაღი კანი საჭიროებს სხვადასხვა ვიტამინს, მათ შორის A, E, C და D ვიტამინებს. გარდა ამისა, ვიტამინები E და C, რომლებიც გვხვდება ბევრ ციტრუსოვან ხილსა და ბოსტნეულში, ანტიოქსიდანტების უმარტივესი ფორმაა.

მოგეხსენებათ, ანტიოქსიდანტები ებრძვიან თავისუფალ რადიკალებს (ჟანგბადის აგრესიული ფორმების) და იცავენ კანს დაზიანებისაგან. თავისუფალი რადიკალები მჭიდრო კავშირშია დაბერების ნიშნებთან, როგორებიცაა ნაოჭები, თმის ცვენა და დაბერებული კანი. სხვათა შორის, მზის სხივების გადაჭარბებული ზემოქმედება და არასრულფასოვანი კვება თავისუფალი რადიკალების წარმოქმნის მიზეზია. მზისგან კანის დასაცავად აუცილებელია ორგანიზმში A ვიტამინის ოდენობის მონიტორინგი. ჩ ვიტამინი აჩქარებს კანის შეხორცებას. ბოლო კვლევებმა აჩვენა, რომ ჩ ვიტამინს აქვს უნარი დააჩქაროს დამწვრობის შედეგად დაზიანებული კანის ქსოვილის შეხორცების პროცესი.

ასე რომ, ჩვენ უბრალოდ გვჭირდება ვიტამინები, მაგრამ როგორ მივიღოთ ისინი? აქ აზრი ორად იყოფა. ზოგი ფიქრობს, რომ სპეციალური კომპლექსებია საჭირო, ზოგს მიაჩნია, რომ უბრალოდ უნდა ვიკვებოთ დაბალანსებულად, ზოგი ამბობს, რომ ვიტამინების შემცველი კრემები გჭირდებათ. ყველა მართალია თავისებურად.

ჯანმრთელობის, ახალგაზრდობისა და სილამაზისთვის აუცილებელი ვიტამინებია:

C ვიტამინი – დაბერების წინააღმდეგ მთავარი მებრძოლი

C ვიტამინი ხელს უწყობს კოლაგენური ბოჭკოების წარმოქმნას, რაც ნიშნავს, რომ ახანგრძლივებს კანის ახალგაზრდობას. ძალიან კარგად ანეიტრალებს თავისუფალ რადიკალებს.

შეიწოვება ორგანიზმის მიერ საუკეთესოდ კალციუმთან და მაგნიუმთან ერთად მიღებისას.

ამ მშვენიერ ვიტამინს შეიცავს: ციტრუსები, შავი მოცხარი, ასკილი, ისპანახი, მოცვი და კარტოფილი.

გარეგანი გამოყენება: კანის გასაძლიერებლად გამოიყენეთ მკვებავი კრემები, რომლებიც შეიცავს C ვიტამინს.

A ვიტამინი – ლიდერი დაბერების წინააღმდეგ ბრძოლაში

A ვიტამინი ან რეტინოლი – კარგად ეხმარება კანის შეხორცების პროცესს, ასტიმულირებს უჯრედების რეგენერაციას.

რეტინოლი კარგად შეიწოვება ცხიმებთან და მინერალებთან ერთად.

A ვიტამინის ნაკლებობისას კანი თხელდება, იქერცლება და ჩნდება აკნეც.

რეტინოლის ბუნებრივი წყაროა ცხოველური პროდუქტები: ღვიძლი, ქათმის კვერცხი, თევზი, რძის პროდუქტები. ბოსტნეულიდან: ოხრახუში, მწვანე ხახვი და ყველა ხილი, რომელსაც აქვს მკვეთრი ფერი.

გამოიყენეთ კოსმეტიკა, რომელიც შეიცავს A ვიტამინს, რადგან რეტინოიდები ამცირებენ კანის პიგმენტაციას, არბილებენ ნაოჭებს და ასევე კარგია აკნეს დროს.

K ვიტამინი

K ვიტამინი კარგად ებრძვის თვალის ქვეშ ტომრებს, ხელს უწყობს სისხლის შედედებას. ორგანიზმის მიერ ამ ვიტამინის უკეთ ათვისებისთვის საჭიროა ცხიმები.

K ვიტამინის დეფიციტს ჩვენი ორგანიზმი მაშინვე გამოავლენს კანზე ასაკობრივი ლაქებით, შეშუპებით და სისხლდენისაკენ მიდრეკილებით.

K ვიტამინის წყაროები: ხორბლის ქატო, მჟავე კომბოსტო, ყვავილოვანი კომბოსტო, ჭინჭარი.

პროდუქტები, რომლებიც შეიცავს K ვიტამინს, ხელს უწყობს კანის ჯანსაღი სახის აღდგენას.

B3 ვიტამინი საუკეთესო კანის დამატენიანებელია

საზოგადოდ, B3 ვიტამინი ახდენს ნივთიერებათა ცვლის ნორმალიზებას, აფართოებს სისხლძარღვებს. შეიწოვება სოკოდან, პარკოსნებიდან და ხორცპროდუქტებიდან.

ორგანიზმში ამ ვიტამინის ნაკლებობისას აღინიშნება კანის სიფერმკრთალე, აქერცვლა და სიწითლე.

B3 ვიტამინს შეიცავს: სოკო, არაქისი, სოია და ხორცი.

B3 ვიტამინი, რომელიც გვხვდება სახის კოსმეტიკაში, კარგია კანის დასატენიანებლად.

რკინა

ის აუცილებელია სისხლწარმომქმნელი ორგანოების ფუნქციონირებისთვის და აქტიურად მონაწილეობს ქსოვილების სუნთქვაში. რკინის ნაკლებობით კანი კარგავს ელასტიკურობას, დუნდება. რკინა გვხვდება ღვიძლსა და მჭლე საქონლის ხორცში. ბევრია მჟაუნაში, კვერცხის გულში, შვრიასა და წიწიბურაში. ისპანახი, კომბოსტო, ჭარხალი, სტაფილო, ქიშმიში, ლეღვი, ფორთოხალი, მანდარინი ასევე რკინის წყაროა.

სელენიუმი

ეს მიკროელემენტი არის ანტიოქსიდანტური ფერმენტების ნაწილი, რომელიც იცავს უჯრედის მემბრანას თავისუფალი რადიკალების დაზიანებისგან. მას ასევე აქვს ანთების საწინააღმდეგო თვისებები და გამოიყენება როგორც სახის კანის კიბოს პროფილაქტიკა, იცავს კანს ულტრაიისფერი გამოსხივებისგან.

სელენიუმი გვხვდება ზღვის პროდუქტებში (ხამანწკები, კრევეტები). ეს ნივთიერება არის შვრიასა და წიწიბურაში, ზეითუნის ზეთსა და ზეთისხილში.

თუთია

ის ეფექტურია ანთებისა და ნაჭდევებისას, კურნავს ჭრილობებს და ხელს უშლის მავნე მიკრობების ზრდას. თუთია გვხვდება თხილში, ნიორში, სტაფილოში, კომბოსტოში, ტკბილ წიწაკაში.

საუზმე

საუზმეზე შეგიძლიათ ჭამოთ 200 გრამი ხაჭო ან ერთი თეფში მთლიანი მარცვლეულის ფაფა. ზოგჯერ სენდვიჩი ცოტა კარაქით და ყველით. ამ ვარიანტების მონაცვლეობა შესაძლებელია რამდენიმე მოხარშული კვერცხით.

სადილი

მწვანილის, კიტრისა და პომიდვრის მსუბუქი სალათი მცენარეული ზეთით. წვრილად გახეხილი კომბოსტოს და სტაფილოს სალათი ცოტა ზეთით. ბოსტნეულის წვნიანი ან ბულიონი. მაკარონი ზღვის პროდუქტებით. მოხარშული საქონლის ხორცის ან ღვიძლის ნაჭერი. ისპანახი, ბრინჯი გამოდგება გარნირად, შეგიძლიათ მონაცვლეობით მოხარშული კარტოფილიც ჩართოთ რაციონში.

ვახშამი

ნებისმიერი უცხიმო იოგურტი ან ხაჭო. ალტერნატიულად – ჭიქა რძე. ხილის სალათი უცხიმო იოგურტის დრესინგით. წიწიბურას ფაფა. ვაშლი.