რა არის ანგიოლიპომა
ლიპომა კანქვეშა წარმონაქმნების საკმაოდ გავრცელებული ტიპია. მისი განვითარება ცხიმოვანი უჯრედების ჭარბ გამრავლებას უკავშირდება, ამიტომ ხალხში ცხიმგროვად იცნობენ. ლიპომის ერთ-ერთი ფორმაა ანგიოლიპომა, რომელიც ცხიმოვან ქსოვილთან ერთად სისხლძარღვებსაც შეიცავს. სხვა ლიპომების მსგავსად კეთილთვისებიანია, თუმცა, ზოგჯერ შესაძლოა ტკივილი და დისკომფორტი გამოიწვიოს.
არსებობს ანგიოლიპომის ორი ტიპი - ინფილტრაციული და არაინფილტრაციული. არაინფილტრაციული უფრო გავრცელებულია და კანში ღრმად არ არის შეჭრილი, ინფილტრაციული კი იშვიათია და ღრმად აღწევს კანში, კუნთებში, ცხიმოვან ან ფიბროზულ ქსოვილში.
ანგიოლიპომა ჯანმრთელობის სხვა გართულებებს, როგორც წესი, არ იწვევს.
ანგიოლიპომა ყველაზე ხშირად წინამხარზე, მხარსა და ტორსზე გვხვდება, იშვიათად - თავზე, სახეზე, კისერზე, ხელის მტევნებზე და ფეხებზე.იშვიათია ანგიოლიპომის განვითარება ღრმად მდებარე ქსოვილებში. მაგალითად, ხერხემალში.
ანგიოლიპომური გამობერილობისთვის დამახასიათებელია მრგვალი ან სფეროსებრი შესახედაობა, რომელიც შეხებით რბილია.
ანგიოლიპომის შესაძლო მიზეზებია:
- დაზიანება - ანგიოლიპომა შესაძლოა განვითარეს ბლაგვი ტრავმის ან მცირე განმეორებითი ტრავმების შემდეგ;
- დიაბეტი - დიაბეტის მქონე პირებს ანგიოლიპომის განვითარების შედარებით მაღალი რისკი აქვთ;
- გენეტიკური ფაქტორი;
- ადამიანის იმუნოდეფიციტის ვირუსის (აივ) საწინააღმდეგო მედიკამენტების მიღება ზრდის ანგიოლიპომის განვითარების რისკს
ანგიოლიპომა არ არის ავთვისებიანი წარმონაქმნი, თუმცა, შესაძლოა ჰგავდეს ცხიმოვანი უჯრედებისგან განვითარებულ ავთვისებიან სიმსივნეს. არსებობს მათი განმასხვავებელი ნიშანი: ანგიოლიპომას ნელი ზრდა ახასიათებს, ამასთან, კარგად გამოკვეთილი და შემოსაზღვრულია, ხოლო ავთვისებიანი წარმონაქმნი უფრო სწრაფად იზრდება, დიდი ზომისაა, არ არის კარგად კონტურირებული და მისი კიდეები რთული გასარჩევია.
ანგიოლიპომის მოცილება ყოველთვის აუცილებელი არ არის, თუმცა ზოგჯერ ის ტკივილისა და დისკომფორტის წყაროა. ასეთ შემთხვევაში არასასურველ წარმონაქმნს ქირურგიული გზით აცილებენ.
