თინათინ გოცაძე

კოლაგენის კონცენტრაციის მომატების განმაპირობებელი პროდუქტები აფერხებს კანის დაბერებას. ასეთ პროდუქტებს მიეკუთვნება პარკოსნები და ციტრუსები.

ცილა კოლაგენი, საზოგადოდ, მნიშვნელოვან როლს თამაშობს ორგანიზმის სხვადასხვა ფუნქციაში, მათ შორის, სიჯანსაღესა და ახალგაზრდობას უნარჩუნებს კანს. ექსპერტები გვირჩევენ საკვები რაციონი გავამდიდროთ ისეთი პროდუქტებით, რომლებიც ხელს უწყობს ორგანიზმში კოლაგენის დონის მატებას, ამით კანს შევუნარჩუნებთ სიგლუვესა და ელასტიკურობას და, შესაბამისად, გადავავადებთ მის დაბერებას.

რატომ არის კოლაგენი მნიშვნელოვანი?

კოლაგენი ორგანიზმში ფართოდ წარმოდგენილი ცილაა. ის გვხვდება ძვლებში, კუნთებში, კანსა და მყესებში. აღსანიშნავია, რომ კანის სტრუქტურის უმნიშვნელოვანესი კომპონენტია. მთავარ როლს თამაშობს კანის ელასტიკურობის, ტენიანობისა და დრეკადობის შენარჩუნებაში. ექსპერიმენტულად დადასტურებულია, რომ კოლაგენის კონცენტრაციის მომატების განმაპირობებელი პროდუქტები ამცირებენ კანის სიმშრალესა და მასზე ნაოჭების განვითარებას.

რომელი კოლაგენმასტიმულირებელი პროდუქტების ჩართვას გვირჩევენ საკვებ რაციონში სპეციალისტები?

ქათამი – კოლაგენის უნივერსალური წყაროა. ქათმის ხორცი შეიცავს ბევრ შემაერთებელ ქსოვილს, რაც მასში დიდი რაოდენობით კოლაგენის შემცველობის მანიშნებელია. ქათმის ხშირად გამოყენება საკვებად აუმჯობესებს კანის მდგომარეობას. ის რეკომენდებულია მოხარშული სახით და არა ცხიმიანი და კალორიული კერძების შემადგენლობაში.

ციტრუსები – ფორთოხალი და ლიმონი განსაკუთრებულად სასარგებლოა კანისათვის C ვიტამინის შემცველობის გამო. C ვიტამინის ანტიოქსიდანტური თვისებების გამო ეს პროდუქტები ეხმარება ორგანიზმს პოტენციური ტოქსინებისა და მავნე ნივთიერებებისაგან განთავისუფლებაში, ეს კი, თავის მხრივ, კანის სისუფთავესა და სიჯანსაღეზე აისახება. ციტრუსების მოყვარულებს კანის ანთებითი დაავადებები ნაკლებად ემუქრებათ, გარდა ამისა, მათი დახმარებით კანში კოლაგენის დონე იმატებს.

ნიორი – ნიორს კოლაგენის გამომუშავების მასტიმულირებელი თვისება აქვს, გარდა ამისა, მასში შემავალი ნივთიერებები აფერხებს კოლაგენის დაშლას ქსოვილებში. ნიორს, თავის მხრივ, აქვს ანთების საწინააღმდეგო და ანტიბაქტერიული მოქმედება, რაც კანის სიწითლესა და მუწუკებთან გამკლავებაში მნიშვნელოვანია.

პარკოსნები – ასტიმულირებს კოლაგენის გამომუშავებას ორგანიზმში და ხელს უწყობს კანის სიჯანსაღის შენარჩუნებასაც.

სტაფილო და გარგარის ჩირი – მდიდარია A ვიტამინით, რომელიც აქტიურად მონაწილეობს კოლაგენის სინთეზში (წარმოქმნაში).

საყურადღებოა, რომ კვების ასპექტს, კანის მოვლის კუთხით, დიდი მნიშვნელობა აქვს. ჯანსაღი კვების გარეშე ვერანაირი კოსმეტიკური საშუალება ვერ უზრუნველყოფს კანის ჯანმრთელობას და ელვარებას. იმისათვის, რომ კანს ხანგრძლივად შევუნარჩუნოთ სიჯანსაღე და ახალგაზრდობა, შესაბამისი კოსმეტიკური საშუალებების გარდა, აუცილებელია სწორად კვება და სპორტით დატვირთვა. ჩ ვიტამინით, ცილებითა და საკვები ნივთიერებებით მდიდარი პროდუქტები კანს სიგლუვეს, თანაბარ ტონსა და უმაღლეს ტონუსს ანიჭებენ, რასაც ასე დიდი მნიშვნელობა აქვს კანის დაბერების გადავადებაში.