ალცჰაიმერის დაავადება

ამავე სახელწოდებით იხსენიებენ ალცჰაიმერის დაავადებასაც, არადა ის აბსოლუტურად განსხვავდება მეხსიერების ასაკობრივი დაქვეითებისგან. ვიდრე ალცჰაიმერის დაავადებაზე დავიწყებდეთ საუბარს, რამდენიმე სიტყვით მეხსიერების ასაკობრივ დაქვეითებას შევეხოთ.
მეხსიერება არის თავის ტვინის უმაღლესი ფსიქიკური ფუნქცია, რომელიც შეიძლება განვსაზღვროთ როგორც ცენტრალური ნერვული სისტემის თვისება, გამოცდილებიდან აითვისოს ინფორმაცია, შეინარჩუნოს იგი და გამოიყენოს აქტუალური ამოცანების გადასაჭრელად. სხვა დაავადებებთან ერთად (ალცჰაიმერის დაავადება, კორსაკოვის სინდრომი, დემენცია და სხვა) მეხსიერების დაქვეითება ითვლება ბუნებრივი სიბერის ერთ-ერთ ნიშნად. საყოველთაოდ ცნობილია, რომ ჯანმრთელი ასაკოვანი ადამიანები ძნელად ითვისებენ ახალ ინფორმაციას და უჭირთ მეხსიერებიდან დასწავლილი (დამახსოვრებული) ინფორმაციის ამოღება. მეხსიერების ასაკობრივი ცვლილებები დაკავშირებულია ყურადღების კონცენტრირების შესუსტებასთან და გარე სტიმულაციაზე რეაქციის შემცირებასთან. მეხსიერების ნორმალური ასაკობრივი ცვლილებები იწყება 40-დან 65 წლამდე და აღარ პროგრესირებს. ასეთი ცვლილებები არ აფერხებს ყოველდღიური ცხოვრების რიტმს. რაიმეს დასწავლისას კარნახთან შერწყმული დახმარება აუმჯობესებს ინფორმაციის ათვისებას და რეპროდუქციას. ეს განასხვავებს ამ სახის მეხსიერების დაქვეითებას ალცჰაიმერისა და სხვა დაავადებების დროს მეხსიერების გამოვარდნისგან. ეს არის ე.წ. კეთილთვისებიანი მოხუცებულობითი გულმავიწყობა. მეხსიერების ასაკობრივი დაქვეითების დროს, ისევე, როგორც ათეროსკლეროზის დროს, მკურნალობა და პროფილაქტიკა მიმართული უნდა იყოს ქოლესტერინის დაქვეითებისკენ, სისხლძარღვების ელასტიკურობის მომატებისკენ და ა. შ.
ალცჰაიმერის დაავადება არის დემენციის (მეხსიერების დაქვეითების) ყველაზე გავრცელებული ფორმა და უკურნებელი დეგენერაციული დაავადება, რომელსაც თავის ტვინის ქერქული ფუნქციების პროგრესული დაქვეითება ახასიათებს. იგი პირველად 1906 წელს აღწერა გერმანელმა ფსიქოლოგმა ალოიზ ალცჰაიმერმა. ეს დაავადება, წესისამებრ, ვლინდება 65 წლის შემდეგ. ადრეული გამოვლინება იშვიათია. სამწუხაროა, მაგრამ ფაქტია, რომ 2006 წლისთვის მთელ მსოფლიოში ალცჰაიმერით დაავადებული 26,6 მილიონი კაცი იყო აღრიცხული, 2050 წლისთვის კი მოსალოდნელია ამ რიცხვის გაოთხმაგება. ალცჰაიმერის დაავადება ყველა ადამიანს სხვადასხვაგვარად გამოაჩნდება, მაგრამ არსებობს ერთნაირ სიმპტომთა წყებაც. დაავადების პირველ გამოვლინებას ხშირად უკავშირებენ ასაკს ან სტრესს. მეხსიერების დაქვეითება ყველაზე მეტად ადრეულ სტადიაში ვლინდება (მაგალითად, ახლახან მიღებული ინფორმაციის დავიწყებით). ალცჰაიმერზე ეჭვის შემთხვევაში დიაგნოზის დასაზუსტებლად უნდა გაანალიზდეს ადამიანის ქცევა, ჩატარდეს კოგნიტური (შემეცნებითი) ტესტების მთელი სერია და თუ შესაძლებელია, მაგნიტურ-რეზონანსული ტომოგრაფიაც. არსებობს დაავადების წარმოშობის სამი ძირითადი ჰიპოთეზა. ძველი, ქოლინერგული ჰიპოთეზის თანახმად, რომელსაც ემყარება მკურნალობის სადღეისოდ არსებული მეთოდების უმრავლესობა, ალცჰაიმერის დაავადებას იწვევს ნეირომედიატორ აცეტილქოლინის სინთეზის დაქვეითება, მაგრამ, როგორც ჩანს, ეს ჰიპოთეზა არცთუ მართებულია, რადგან აცეტილქოლინის დეფიციტის მაკორექტირებელ პრეპარატებს არცთუ ისე ძლიერი ეფექტი აქვთ.
1991 წელს შემუშავებულ იქნა ამილოიდური ჰიპოთეზა, რომლის თანახმადაც დაავადების ძირითადი მიზეზი ბეტა-ამილოიდების დაგროვებაა. APP (ამყლოიდ პრეცურსორ პროტეინ) ცილების მაკოდირებელი გენი, რომლისგანაც იწარმოება ბეტა-ამილოიდი, განლაგებულია 21-ე ქრომოსომაში. ამილოიდური ჰიპოთეზის სასარგებლოდ მეტყველებს ის ფაქტი, რომ დაუნის სინდრომის (21-ე ქრომოსომის დამატებითი ასლი) მქონე 40 წელს მიღწეულ ადამიანებში ალცჰაიმერის მსგავსი პათოლოგია იქნა აღმოჩენილი. გარდა ამისა, გენ APOE4-ის (APP-ს მუტაციური გენი) არსებობა, რომელსაც უკავშირდება ალცჰაიმერის დაავადებისადმი წინასწარი განწყობა, ტვინის ქსოვილში ამილოიდის ჭარბ დაგროვებას იწვევს. მეტიც: ტრანსგენურ თაგვებს, რომელთა ორგანიზმშიც გამომუშავდება ადამიანის APP გენის მუტაციური ფორმა და აღინიშნება ტვინში ამილოიდური ფოლაქების დაგროვება, ალცჰაიმერის სხვა პათოლოგიური ნიშნებიც აღმოუჩინეს. უნდა ითქვას, რომ არსებობს ექსპერიმენტული ვაქცინა, რომელსაც შესწევს ამილოიდური ფოლაქებისგან ტვინის გასუფთავების უნარი, მაგრამ დემენციაზე გავლენას ვერ ახდენს.
არსებობს კიდევ ერთი ჰიპოთეზა - ტაუ-ჰიპოთეზა, რომლის თანახმადაც ტაუ-ცილების (Microtubule-associated protein) სტრუქტურაში ხდება გადახრები, რაც განაპირობებს ნერვულ უჯრედებს შორის სიგნალების ბიოქიმიური გადაცემის დარღვევას და შემდეგ თვით ამ უჯრედების სიკვდილს. აუცილებლად უნდა ითქვას ისიც, რომ ახლახან მანჩესტერის უნივერსიტეტის მეცნიერებმა მოიპოვეს მტკიცებულება, რომელიც ალცჰაიმერის დაავადების განვითარებაში პირველი ტიპის მარტივი ჰერპესვირუსის როლს ადასტურებს. მათ ალცჰაიმერით დაავადებულთა თავის ტვინში არსებულ ამილოიდურ ფოლაქებში ვირუსის დნმ აღმოაჩინეს. ამჟამად ტარდება კვლევა, რომელიც ალცჰაიმერის დაავადების დროს ანტივირუსული საშუალებების ეფექტურობას დაადგენს.
რა ხდება ტვინში
რამდენიმე სიტყვით აღვწეროთ, რა ცვლილებებს იწვევს თავის ტვინში ალცჰაიმერის დაავადება. ამ დროს ხდება ტვინის ატროფია - მოცულობისა და წონის შემცირება, ასევე - ქერქის ხვეულების განლევა, ქერქის ღარებისა და პარკუჭების გაფართოება. ატროფიას ყველაზე მეტად განიცდის თხემის, საფეთქლისა და შუბლის წილები. მიკროსკოპიული კვლევისას ჩანს თავის ტვინის ნეირონების, ჰიპოკამპის, ბაზალური ბირთვების ნეირონებისა და სინაფსების მასიური დეგენერაცია. ნევროლოგიური სიმპტომების მრავალფეროვნება თავის ტვინის სხვადასხვა უბანში დისპროპორციული ნეირონული დეგენერაციით არის განპირობებული. ალცჰაიმერის დაავადების დროს დიდი მნიშვნელობა აქვს აცეტილქოლინერგულ დეფიციტს, რაც დაკავშირებულია ფუძის კვანძების ბირთვებში აცეტილქოლინმაწარმოებელი ნეირონების შემცირებასთან. ბევრს ჰგონია, რომ ალცჰაიმერის დაავადების ჩამოყალიბებაზე ან გამოვლენაზე მოქმედებს გონებრივი შრომის ხარისხი. ეს მცდარი შეხედულებაა და აი რატომ: როგორც ზემოთ აღვნიშნეთ, ალცჰაიმერის დაავადების დროს ხდება ტვინის ატროფია და ამ პროცესზე გონებრივ შრომას არავითარი, არც დადებითი და არც უარყოფითი გავლენის მოხდენა არ შეუძლია. უბრალოდ, მაღალი ინტელექტის მქონე ადამიანებში ამ დაავადებისთვის დამახასიათებელი ცვლილებები უფრო ადვილად და ადრიანად ხდება შესამჩნევი.