ფსიქოლოგიური დახმარება
თქვენ ვერ შეძლებთ, მთელი სიცოცხლე დაიცვათ გოგონა ბებიის გავლენისგან. ყველას თავისი შეხედულება აქვს ბავშვის აღზრდის შესახებ. ალბათ თქვენი და თქვენი მეუღლის აზრიც კი არ ემთხვევა ერთმანეთს, რომ არაფერი ვთქვათ საბავშვო ბაღსა და სკოლაზე: ყველა დაწესებულებას სწავლების საკუთარი მეთოდები აქვს. ასე რომ, ნუ წაართმევთ გოგონას სხვებთან ურთიერთობის საშუალებას - ასეთი მიდგომა მას სამყაროზე ცალმხრივ შეხედულებას ჩამოუყალიბებს, სხვადასხვა ტრადიციასა და შეხედულებასთან ზიარება კი დამოუკიდებელი აზროვნების განვითარებაში დაეხმარება. კიდევ ერთი: ვერც ერთი ძიძა ვერ აჩუქებს ბავშვს იმდენ სითბოსა და სიყვარულს, რამდენსაც ღვიძლი ბებია.
ჩემი ქმარი სახლში სამსახურის საქმეებზე არ ლაპარაკობს, თითქოს რაღაცას მალავს... უკვე სამი წელია ერთად ვართ და ისიც კი არ ვიცი, რამდენი აქვს ხელფასი, რა თანამდებობა უკავია... მე მიმაჩნია, რომ ეს სწორი არ არის, მაგრამ ჩემი ქმარი ყველა კითხვაზე ასე მპასუხობს: "ფული გვყოფნის, ჩემი სამსახურის საქმეები კი შენ არ გეხება. სახლში მე დასასვენებლად მოვდივარ!" თინიკო, 24 წლის
საქმე ის არ არის, რომ თქვენს ქმარს სახლში სამსახურის შესახებ საუბარი არ უყვარს; პრობლემა გაცილებით ღრმაა: სამუშაო მისი ცხოვრების საკმაოდ დიდი ნაწილია და არ სურს, მასში ჩაგახედოთ. თუ მიგაჩნიათ, რომ მეტს იმსახურებთ, დაიცავით თქვენი პოზიცია. გამოიყენეთ ამისათვის სხვადასხვა საშუალება, ხანგრძლივი მოლაპარაკებით დაწყებული, ულტიმატუმით დამთავრებული. შეგიძლიათ უთხრათ, რომ მზად ხართ, ქოხში იცხოვროთ, ოღონდაც ქმარი ყველაფერში გენდობოდეთ. ნუ ეცდებით მისთვის თვალყურის დევნებას, ნურც მის ამბებს გამოჰკითხავთ ნაცნობებს. თქვენი ამოცანა ინფორმაციის მიღება კი არ არის, არამედ ის, რომ ძირფესვიანად შეცვალოთ თქვენი ურთიერთობა.
დავიწყე კბილების მკურნალობა, მაგრამ მოულოდნელად ეს უზარმაზარ ფსიქოლოგიურ პრობლემად მექცა. რაც უფრო ხშირად დავდივარ სტომატოლოგთან, მით უფრო მიძლიერდება შიში. მთრგუნავს მტკივნეული შეგრძნებები, სამედიცინო პრეპარატების სუნი, სტომატოლოგიური იარაღების ხმაური... მალე ალბათ თავს ვერაფრით ვაიძულებ ექიმთან წასვლას. არადა მკურნალობა ჯერ შუა გზაშია... როგორ დავაღწიო თავი ამ განწყობას? ნინო, 38 წლის
ხანგრძლივი მკურნალობა მართლაც დამღლელია და ხშირად ფიტავს ადამიანს, მაგრამ ექიმთან ვიზიტის გადადებით თქვენ უფრო მეტად გაახანგრძლივებთ მას. ექიმთან ყოველი ვიზიტი აღიქვით როგორც ამ პროცესის დამთავრებისკენ გადადგმული მორიგი ნაბიჯი. წარმოიდგინეთ, რომ მალე იდეალური ღიმილი გექნებათ. კალენდარზე სხვადასხვა ფერით მონიშნეთ დღეები, როცა ექიმთან იყავით და მომავალი პროცედურის თარიღები. როცა დაინახავთ, რომ განვლილი გზა გასავლელზე გრძელია, უფრო მეტად გაგიადვილდებათ უსიამოვნო შეგრძნებების ატანა. ნუ დაიტანჯავთ თავს არასასიამოვნო სუნებისა თუ ხმების მუდმივი გახსენებით. და საერთოდ, ეცადეთ, მეტისმეტად არ ჩაერთოთ მკურნალობის პროცესში; უბრალოდ შედით კაბინეტში, მოთავსდით სავარძელში, გააღეთ პირი და სულ სხვა რამეზე იფიქრეთ.
ჩემი მეგობრის შეყვარებული არ მომწონს. ვუთხრა თუ არა მას ეს? შეხვედრა ახლახან დაიწყეს, ამიტომ ჩემი მეგობარი ხშირად მეკითხება, რა აზრისა ვარ მის შეყვარებულზე. არადა ეს ახალგაზრდა ჩემს სიმპათიასაც კი არ იმსახურებს. მიმაჩნია, რომ მასა და ჩემს მეგობარს არაფერი აქვთ საერთო, რომ მათ ურთიერთობას მომავალი არ გააჩნია. როგორ მოვიქცე? ანასტასია, 21 წლის
ახალგაზრდა კაცის გაკრიტიკებით თქვენ საფრთხეს შეუქმნით თქვენსა და თქვენი მეგობრის ურთიერთობას. გამორიცხული არ არის, მან თქვენი გულწრფელობა არ დაიჯეროს და ბრალად დაგდოთ, რომ გშურთ მისი. თუმცა ისიც სათქმელია, რომ მისთვის ძვირფასია თქვენი აზრი, ამიტომ შესაძლოა ყურიც მიუგდოს მას. ასეა თუ ისე, მისი შეყვარებულის შესახებ საუბრისას იყავით თავშეკავებული, ხაზი გაუსვით იმას, რომ გიხარიათ, რაკი მეგობარს ბედნიერს ხედავთ. თუ მისი შეყვარებულის საქციელი გაშფოთებთ, გამოხატეთ გაკვირვება მისი ქცევის გამო. ეს საკმარისია, რომ დაქალს ამა თუ იმ სიტუაციის დამოუკიდებელი ანალიზისკენ უბიძგოთ. მის კითხვებზე პასუხის გაცემისას შეიძლება გამოიყენოთ უნივერსალური არგუმენტი: შეყვარებულთა ურთიერთობის შეფასება გარეშე ადამიანისთვის ძნელია.
მე და ჩემი ქმარი ყოველთვის აქტიური ცხოვრებით ვცხოვრობდით, მაგრამ რაც გოგონა შეგვეძინა, მე სახლში ჩავჯექი. ბავშვი ხშირად ავადმყოფობს, მისთვის კლიმატისა და საკვების შეცვლა მაშინებს, ამიტომ მოგზაურობისგან თავს ვიკავებ. ჩემმა ქმარმა კი გართობაზე უარის თქმა ვერ შეძლო და ახლა შვებულებას მარტო ატარებს - მეგობრებთან ერთად დადის ზღვაზეც, ლაშქრობაშიც... მე ეს ძალიან მწყინს, თუმცა ისიც მესმის, რომ მას დასვენება სჭირდება. ალბათ უსამართლობა იქნება, ვაიძულო, რომ ჩვენთან ერთად იჯდეს აგარაკზე... ია, 33 წლის
იმისთვის, რომ ოჯახში სიმშვიდე შეინარჩუნოთ, ცდილობთ, არ გაკიცხოთ ქმარი - ალბათ იმედი გაქვთ, რომ საკუთარ შეცდომას თვითონ მიხვდება. ის კი სარგებლობს თქვენი სიჩუმით და აკეთებს იმას, რაც მისთვის მოხერხებული და სასიამოვნოა. უკმაყოფილების გამოთქმით თქვენ მას მოგზაურობის უფლებას კი არ წაართმევთ, არამედ ეცდებით, სამართლიანობა აღადგინოთ. ბავშვის დაბადება უდავოდ ცვლის წყვილის ცხოვრების წესს. თუ მეუღლეთაგან ერთ-ერთი ძველებურად აგრძელებს ცხოვრებას, ეს იმას ნიშნავს, რომ ის არ ასრულებს თავის მოვალეობათა ნაწილს, რომელიც ავტომატურად გადადის მეორე პარტნიორზე. გამოდის, რომ თქვენ მთელი დღეების განმავლობაში უვლით ბავშვს, ქმარი კი ისვენებს.... აუხსენით, რომ ეს უსამართლობაა და ეძებეთ ისეთი ადგილი, სადაც შეიძლება ერთად გაემგზავროთ. როცა მშობლების მოვალეობებს თანაბრად გაინაწილებთ, ორივე დაისვენებთ.
მე აღარ მჯერა მამაკაცების... რამდენიმე წლის წინ საყვარელმა მამაკაცმა მიღალატა. მას შემდეგ მამაკაცებთან ნორმალურ ურთიერთობას ვეღარ ვახერხებ, ყველგან ღალატსა და ტყუილს ვეძებ. მეგობრებიც ცეცხლზე ნავთს მისხამენ - ყველა კაცი ერთნაირიაო. ნუთუ წესიერი მამაკაცები აღარ არსებობენ?! ნატო, 28 წლის
სიფრთხილე გაიძულებთ ყურადღებით შეარჩიოთ პარტნიორი და ეს სრულიადაც არ არის ცუდი, თუმცა ძნელია იცხოვრო მუდმივ დაძაბულობაში და დაიკავო დისტანცია მასთან, ვინც მოგწონს. მიეცით მამაკაცებს ერთგვარი გამოსაცდელი პერიოდი. ამ ხნის განმავლობაში მეტისმეტად ნუ მიენდობით, დააკვირდით მის ქცევას, ოღონდ ეცადეთ, უნდობლობა არ გამოამჟღავნოთ, რათა თაყვანისმცემელი არ დააფრთხოთ. ემოციური რეაგირება მოახდინეთ მის ნაამბობზე, გაუღიმეთ, არ მისცეთ საბაბი, გულგრილობა გისაყვედუროთ. თუ იღბალმა ისევ გაქციათ ზურგი, გული მაინც არ გაიტეხოთ. ნუ გაკიცხავთ საკუთარ თავს იმის გამო, რომ მიმნდობი ხართ. გულღიაობა თქვენი ღირსებაა, უსინდისო საქციელისა შერცხვეთ მათ, ვინც ამას სჩადის. წესიერი მამაკაცები უთუოდ არსებობენ, უბრალოდ კარგად უნდა მოძებნოთ.