ფსიქოლოგიური დახმარება
ჩემს უმცროს დაზე მეგობარი ცუდ გავლენას ახდენს. ისინი მოზარდები არიან და ისევე, როგორც ყველა მათი თანატოლი, გამომწვევად იქცევიან - ხმამაღლა იცინიან, მკვეთრად იღებებიან, ექსტრავაგანტულად იცვამენ... ეს არაფერი, მათ ასაკში მეც მქონდა თვითდამკვიდრების სურვილი, მაგრამ ახლახან ყური მოვკარი, რომ მეგობარი ჩემს დას უყვებოდა, რა მოხერხებულად აწაპნა დახლიდან კოსმეტიკა. მეშინია, ჩემს დასაც არ აიძულოს იმავეს გაკეთება... ანა, 27 წლის
მოზარდებთან ურთიერთობა მარტივი არ არის. თქვენს დას ალბათ მრავალჯერ შეუტანია ეჭვი თქვენს ავტორიტეტში. ასაკის შეხსენებას - "მე უფროსი ვარ და უფრო მეტი მესმის!" - აზრი არ აქვს, საშიშიც კია - პროტესტის ნიშნად შესაძლოა გოგონამ ავანტიურასაც კი მიმართოს. მოეპყარით დას არა როგორც გულუბრყვილო ბავშვს, რომელსაც ცხოვრება უნდა ასწავლო, არამედ როგორც ახლობელს, რომლის ბედიც გაღელვებთ. აგრძნობინეთ, რომ გსურთ, ის არასწორი ნაბიჯისგან დაიცვათ. უშურველად გამოხატეთ მისდამი მზრუნველობა და სიყვარული.
ჩემი მეგობარი ჰომეოპათიით, არატრადიციული მედიცინით არის გატაცებული. ხშირად მოაქვს ჩემთვის რაღაც ქილები... როგორ ავუხსნა, რომ ეს ყველაფერი არ მჭირდება? ლიკა, 27 წლის
აირჩიეთ ურთიერთობის სხვა ენა, გადადით მოქმედებაზე. როცა ქილებს დაგიტოვებთ - უკანვე, ჩანთაში ჩაუწყვეთ. თუ ბევრი ქილა დაგიგროვდათ, მოაგროვეთ და უკან წაუღეთ. ოღონდ გაითვალისწინეთ, რომ ასეთი მოქმედებით შესაძლოა მეგობარი გაანაწყენოთ და ურთიერთობა გაგიფუჭდეთ. ასე რომ, იყავით ძალიან გულისხმიერი, ალერსიანი, კეთილგანწყობილი, მიახვედრეთ მეგობარი, რომ ძველებურად გიყვართ, მხოლოდ მის გატაცებას არ იზიარებთ.
ვგრძნობ, რომ თანდათან ეჭვიან ფურიად ვიქეცი. როცა ჩემი შეყვარებული რომელიმე ნაცნობ ქალიშვილზე მიამბობს რამეს, მაშინვე იმაზე ვიწყებ ფიქრს, რომ მათ შორის რაღაც ხდება. როგორ დავძლიო ეს განცდა? ქეთი, 20 წლის
როგორც ჩანს, პრობლემა ის არის, რომ თქვენსა და თქვენს საყვარელ მამაკაცს შორის გულახდილი და წრფელი ურთიერთობა ვერ შედგა. შეგიძლიათ მასთან თქვენს გრძნობებზე საუბარი? გითქვამთ მისთვის, რომ მისი დაკარგვისა გეშინიათ? ესაუბრეთ ამაზე და იმედი გქონდეთ, რომ საპასუხოდ ისიც გადაგიშლით გულს. დაძაბულობაც უკვალოდ გაქრება.
მე და ჩემს მეუღლეს გოგონა გვყავს. ქმარი მეორე შვილის გაჩენას მთხოვს - ბიჭი უნდა, მე კი მიჭირს გადაწყვეტილების მიღება... ძალიან მსიამოვნებს, როცა ვხედავ, როგორ აცმევს მამა გოგონას ყოველ დილით, ვარცხნის თმას და საბავშვო ბაღში მიჰყავს. როცა ბიჭი დაიბადება, ვშიშობ, მისი ყურადღება მთლიანად მასზე გადაინაცვლებს... სალომე, 25 წლის
არავინ იცის, რა მოხდება მომავალში. რუსთველისა არ იყოს, შიში ვერ იხსნის სიკვდილსა... თავად თუ გსურთ მეორე შვილი? თუ არა, გულახდილად უთხარით ამის შესახებ მეუღლეს. თუ მზად ხართ, კიდევ ერთხელ გახდეთ დედა, გაუზიარეთ მეუღლეს თქვენი შიში და ეჭვი... შესაძლოა, გოგონას იმდენივე დრო ვეღარ დაუთმოს, მაგრამ მშობლიური სიყვარული ხომ ამით არ იზომება...
ადამიანებთან ახლო კონტაქტის დამყარება მიჭირს. ეს ყველას ეხება: მეზობლებს, თანამშრომლებს, ოჯახის წევრებსაც კი. ასე მგონია, ჩემს მიმართ ყველა მტრულად არის განწყობილი. მიზეზებს უკვე საკუთარ თავში ვეძებ. ვიცი, რომ ურთიერთობისას ერთგვარი დიპლომატიაა საჭირო. როგორია ეს დიპლომატიური გზები? ნათია, 32 წლის
უსიამოვნო და მტრულ დამოკიდებულებასაც კი ხშირად გაუგებრობა უდევს საფუძვლად. სცადეთ, პრობლემები მშვიდობიანი გზით მოაგვაროთ. უწინარეს ყოვლისა, შეაფასეთ საკუთარი ქცევა: იქნებ თავად იძლევით საბაბს, რომ ამგვარად მოგეპყრონ? იქნებ თავად არ ესალმებით მეზობლებს? როცა შეატყობთ, რომ მათ თქვენთან საუბარი სურთ, კარს ხომ არ მიუხურავთ ხოლმე? დაამყარეთ კონტაქტი მათთან, ვინც ცდილობს, ყველა ცოდვაში დაგადანაშაულოთ. ხშირად მტრულ განწყობას ის იწვევს, რომ პიროვნება ამოუცნობი, ამოუხსნელი რჩება. შესაძლოა, ძველმოდური ადამიანებისთვის თქვენი თანამედროვე ვარცხნილობა ეჭვის საბაბად იქცეს, მაგრამ თუ მათ გულისხმიერად დაელაპარაკებით, ისინი თქვენს "უცნაურ" ვარცხნილობას თქვენი შემოქმედებითი პიროვნების გამოვლინებად ჩათვლიან და ლმობიერად შეხედავენ. გამოიჩინეთ ყურადღება გარშემო მყოფთა მიმართ, გამოჰკითხეთ ამბები მეზობლებსა და თანამშრომლებს, დაინტერესდით მათი პრობლემებით, აგრძნობინეთ ახლობლებს, ოჯახის წევრებს, რომ ყოველთვის შეუძლიათ, თქვენი დახმარების იმედი ჰქონდეთ.
მყავს 16 წლის ქალიშვილი. ის ცოტა ხნის წინ სიცოცხლით სავსე და უშუალო მოზარდი იყო, ახლა კი ვეღარ ვცნობ - ძალიან დაბნეული, გაფანტული დადის, აღარ აქვს მადა, დიდხანს საუბრობს ტელეფონით. ჩემი აზრით, ყველაფერი იმაზე მეტყველებს, რომ ის შეყვარებულია.... მაღიზიანებს მისი ქცევა და ხშირად ვაძლევ შენიშვნებს, ის კი მტკივნეულად რეაგირებს. როგორ მოვიქცე? ნანა, 37 წლის
პირველი სიყვარული საკმაოდ რთული გამოცდაა. გაიხსენეთ საკუთარი თავი ამ ასაკში. დღეს თქვენს ქალიშვილს ისე სჭირდება თქვენი თანადგომა, როგორც არასდროს. თქვენი რჩევები მას ძალიან გამოადგება. ყველაზე რთული დელიკატურ თემაზე საუბრის დაწყებაა. თავდაპირველად უამბეთ თქვენს ქალიშვილს თქვენი პირველი სიყვარულის შესახებ. ის აუცილებლად დაინტერესდება თქვენი ისტორიით, განსაკუთრებით იმით, როგორ დასრულდა იგი. ბავშვისთვის ნამდვილი აღმოჩენა იქნება ის, რომ თქვენი გრძნობები ძალიან ჰგავს ერთმანეთს. ამის შემდეგ აუცილებლად გკითხავთ ხოლმე რჩევას. თუ ვერაფრით იპოვეთ ხელსაყრელი წუთი საუბრის დასაწყებად, შესთავაზეთ გოგონას, ერთად უყუროთ რაიმე მსუბუქ და სასიამოვნო მელოდრამას. ფილმის ყურებისას სიყვარულზე, ქალისა და მამაკაცის ურთიერთობაზე სიტყვა თავისთავად ჩამოვარდება. კიდევ ერთი ხერხი გულახდილი საუბრისთვის: ერთად შეავსეთ ტესტი, როგორი ტიპის მამაკაცი შეეფერება თითოეულ თქვენგანს (ასეთ ტესტს ადვილად იპოვით ინტერნეტში). ვერც კი შეამჩნევთ, როგორ დაიწყებს თქვენი გოგონა თავის რჩეულზე საუბარს. აქტიურად ჩაერთეთ ამ საუბარში, იქეცით მის უახლოეს მეგობრად, დაეხმარეთ მას, გადადგას პირველი ნაბიჯები ზრდასრული ცხოვრებისკენ.
როგორ მოვიქცე, თუ იმ ადამიანებთან, ვინც ჩემს გვერდით ცხოვრობს, ნორმალურ ურთიერთობას ვერ ვახერხებ? ჩემი კარის მეზობელი, მოხუცი ქალი, ჩემს შესახებ ჭორებს ავრცელებს, ხოლო ზედა სართულის მეზობელი ჩემს კართან ნაგვის პაკეტებს ტოვებს (მავნებლობის გამო! ამას სხვა სახელს ვერ დავარქმევ!). როგორ მოვიქცე, იერიშზე გადავიდე, ნეიტრალიტეტი შევინარჩუნო თუ სამშვიდობო მოლაპარაკებები გავმართო? სალომე, 30 წლის
კონფლიქტში შესვლა გამოსავალი არ არის - ამის შედეგად წვრილმანმა გაუგებრობამ შესაძლოა კოსმოსურ მასშტაბს მიაღწიოს. გარდა ამისა, გამორიცხული არ არის, თქვენი ოპონენტები ასეთ ავანტიურებში უფრო მეტად იყვნენ გამოცდილნი და ისეთი პირობები შეგიქმნან, რომ თვითონვე ინანოთ საომარი მოქმედებების დაწყება. უმჯობესია, პროფესიონალი სკანდალისტების პროვოკაციებზე რეაგირება არ მოახდინოთ. დაიცავით დისტანცია, მაგრამ უპატივცემულობას აშკარად ნუ გამოხატავთ. როცა დარწმუნდებიან, რომ კერკეტი კაკალი ხართ, ალბათ თავს დაგანებებენ და სხვა მსხვერპლის ძებნას დაიწყებენ, რომელსაც უფრო სუსტი ნერვული სისტემა ექნება.