პრობლემები და ფსიქოლოგიური დახმარება
ნუთუ ნორმალურმა დედამ საკუთარი შვილის მიმართ ასეთი რამ შეიძლება განიცადოს? ელენე, 22 წლის
შეიძლება და თანაც როგორ! თქვენ ხომ არა მხოლოდ დედა, არამედ ქალიც ხართ და საყვარელი მამაკაცის ყურადღება გჭირდებათ. უბრალოდ, თქვენგან განსხვავებით, სხვა ქალები ამას არ აღიარებენ, საკუთარ თავსაც კი არ უმხელენ. ნუ დამალავთ წყენას, უთხარით ქმარს, რომ გსურთ, მასთან ერთად მეტი დრო გაატაროთ. გარდა ამისა, ეცადეთ, დამკვირვებლის როლში არ დარჩეთ და მამა-შვილის თამაშებში ჩაერთოთ.
- ვხვდები ადამიანს, რომელიც საერთოდ არ მიყვარს, მაგრამ მისთვის ამის თქმას ვერ ვახერხებ, მას კი ძალიან ვუყვარვარ და მეუბნება, რომ ჩემზე დაქორწინება სურს. ის ძალიან მზრუნველი, ალერსიანი, ყურადღებიანია, მაგრამ მე მის მიმართ გულგრილი ვარ. რამდენჯერმე გადავწყვიტე მისთვის ამის თქმა, მაგრამ ბოლო წუთს გადავიფიქრე. არ ვიცი, ასე რატომ ვიქცევი. საკუთარ თავს გაუბედავს ნამდვილად ვერ ვუწოდებ. მაშ, რაშია საქმე და როგორ მოვიქცე? ვერიკო, 25 წლის
თავდაპირველად პასუხი გაეცით კითხვას: თუ სრულიად არ გიყვართ ეს მამაკაცი და გულგრილი ხართ მის მიმართ, მაშ, რა გაიძულებთ მის გვერდით ყოფნას? იქნებ ხელში "კარგი ვარიანტი" ჩაგივარდათ და არ გინდათ, ხელიდან გაუშვათ? იქნებ გარშემო მყოფნი, მშობლები ან მეგობრები, უნებურად ახდენენ თქვენზე ზეწოლას, როცა გეუბნებიან, რომ ასეთი მამაკაცები ქუჩაში არ ყრია?თუ ეს ვერსიები სწორია, მაშინ უმჯობესია, დაშორდეთ. არ მოატყუოთ ის და იმედი არ გაუცრუოთ. ნუ დაამსგავსებთ საკუთარ ცხოვრებას ბანალურ საპნის ოპერას.
- ვიცი, რომ ბიჭებს მოვწონვარ, მინდა, გავიცნო კიდეც ვინმე, მაგრამ... როცა ბიჭი მომიახლოვდება, მაშინვე ვიბნევი, ვწითლდები და ვცდილობ, სწრაფად გავეცალო იქაურობას. დარწმუნებული ვარ, ბიჭები ჩემთან მოიწყენენ. მე კოცნაც კი არ ვიცი! ანა, 17 წლის
/* (c)AdOcean 2003-2021, Advertline.https:mkurnali.ge.mkurnali zones.________ _____ */
ado.slave('adoceanadvertlinegelpmmhkfobb', {myMaster: 'gC_g7BxQlx9UWDeCK7yaEdkgIoxg2l6o6JUmNs2rvgn.i7' });
როგორც ჩანს, საპირისპირო სქესთან ურთიერთობის, თუნდაც მეგობრობის ძალიან მცირე გამოცდილება გაქვთ. კარგად არც კი გაქვთ წარმოდგენილი, რას უნდა ელოდეთ ბიჭებისგან. იმისთვის, რომ დამშვიდდეთ და საკუთარი თავის რწმენა დაიბრუნოთ, ესაუბრეთ მეგობრებს, ჰკითხეთ, როგორ ჩაიარა მათმა პირველმა პაემანმა: სად იყვნენ, რას აკეთებდნენ და რაზე საუბრობდნენ ბიჭებთან. ნუ დაივიწყებთ, რომ პირველი პაემანი, როგორ წესი, უბრალო გასეირნება და საუბარია. გარდა ამისა, პირველი შეხვედრა არავითარ პასუხისმგებლობას არ გაკისრებთ. ნურც იმის გამო ინერვიულებთ, რა თემაზე ისაუბროთ. ბიჭებს უყვართ საუბარი მათთვის საინტერესო თემებზე და ძალიან გაახარებთ, თუ თქვენი სახით ყურადღებიან მსმენელს იპოვიან.
- ერთი წლის წინ შეყვარებულს დავშორდი. უფრო სწორად, მან მიმატოვა. ოთხი თვის ორსული ვიყავი, მაგრამ იძულებული გავხდი, აბორტი გამეკეთებინა. ცოტა ხნის წინ შევიტყვე, რომ ცოლი მოიყვანა და უკვე ბავშვსაც კი ელოდებიან. ძალიან მინდა, დავურეკო იმ ქალს და ვუთხრა, რომ მისი ქმარი ნაძირალაა, ვუამბო, რაც გამიკეთა, მაგრამ დედა ყველანაირად ცდილობს, გადამათქმევინოს. როგორ მოვიქცე? ნათია, 26 წლის
დავუშვათ, დარეკეთ და გამოააშკარავეთ ის გარეწარი, შემდეგ რა მოხდება? გაიგებს ის საცოდავი ქალი, რომ მისი ქმარი წესიერებით არ გამოირჩევა, დაიწყებს ნერვიულობას, დაიტანჯება. სახლში დაიწყება უსიამოვნება და ჩხუბი, ურთიერთობების გარკვევა. მამაკაცი დაიწყებს თავის მართლებას და სახლიდან გაქცევით უშველის თავს, ცოლს კი თავის პრობლემებთან მარტო დატოვებს. გამოვა, რომ მთავარ დარტყმას მიიღებს სრულიად უდანაშაულო ადამიანი. არა მგონია, მისმა ტანჯვამ თქვენი შეამსუბუქოს. გარდა ამისა, ამით მომავალ ბავშვსაც მიაყენებთ ზიანს, ეს კი ნამდვილად არ იქნება ლამაზი - მას ხომ თქვენთვის არაფერი დაუშავებია! ასე რომ, ყური უგდეთ დედის რჩევას და შურისძიებაზე უარი თქვით.
- შეყვარებულს დავშორდი და ჰორიზონტზე მაშინვე გამოჩნდა სხვა ადამიანი - ჩემი ძველი კარგი მეგობარი. მან სიყვარული ამიხსნა, მაგრამ ისიც მითხრა, რომ თუ ერთმანეთს არ შევხვდებოდით, ჩემთან ურთიერთობას საერთოდ გაწყვეტდა. როგორც მამაკაცი, არ მიყვარს, მაგრამ არ მინდა, მეგობარი დავკარგო. როგორ მოვიქცე? ლიზი, 18 წლის
სამწუხაროდ, ამ შემთხვევაში მეგობრობის შენარჩუნება შეუძლებელია. ძნელია, გამუდმებით იყო საყვარელი ადამიანის გვერდით, როცა იცი, რომ ის სიყვარულითვე არ გპასუხობს. მასთან ყოფნა მხოლოდ იმისთვის, რომ მეგობარი არ დაკარგოთ, არასწორია და კარგს არაფერს მოიტანს. საუკეთესო გამოსავალია, ერთხანს ერთმანეთს არ შეხვდეთ, ტელეფონითაც კი არ ისაუბროთ. ამ ხნის განმავლობაში თქვენი მეგობარი დამშვიდდება, ყველაფერს კარგად გაიაზრებს და საბოლოოდ გადაწყვეტს, მზად არის, მეგობრად დარჩეს თუ უფრო ახლო ურთიერთობა სურს და ნაკლებზე არ დათანახმდება.
- მეგობრები ხშირად მეუბნებიან, რომ ადვილად ვბრაზდები, ყველაფერი მწყინს, ჩემთან საუბრისას იძულებულნი არიან, სიტყვები შეარჩიონ. როცა საკუთარ თავზე ასეთი რამ მესმის, მწყინს, მაგრამ, გულახდილად რომ ვთქვა, ვეთანხმები მათ. მირჩიეთ, როგორ შევიცვალო ხასიათი. თიკო, 22 წლის
ხასიათის მთლიანად შეცვლა შეუძლებელია, თუმცა მასში გარკვეული კორექტივების შეტანას ალბათ მოახერხებთ. უპირველეს ყოვლისა, თავის ხელში აყვანა უნდა ისწავლოთ. მაგალითად, თუ გრძნობთ, რომ რამემ გაგაღიზიანათ, ეცადეთ, ყურადღება სხვა საგანზე გადაიტანოთ. მაგალითად, დაიწყეთ ოთახის დალაგება, რეცხვა, შეგიძლიათ, ირბინოთ კიდეც ან ივარჯიშოთ, ვიდრე თქვენი ორგანიზმი ზედმეტი ადრენალინისგან არ გათავისუფლდება. როცა დამშვიდდებით, დაფიქრდით, ასე რამ გაგაღიზიანათ და სამომავლოდ ეცადეთ, თავი არიდოთ ასეთ სიტუაციებს. კიდევ ერთი მნიშვნელოვანი მომენტი: ეცადეთ, ურთიერთობა გქონდეთ გაწონასწორებულ, პოზიტიურ ადამიანებთან და არასოდეს შეხვიდეთ კონფლიქტში ქუჩაში ან ტრანსპორტში ყოფნისას.
- ჩემი ვაჟი გარდატეხის ასაკშია, ყველაფერს გაზვიადებულად აღიქვამს და განიცდის. უყვარს გოგონა, რომელიც მასზე ორი წლით უფროსია და გამუდმებით მთხოვს ფულს, რათა შეყვარებულს ყვავილები და სხვა საჩუქრები მიუძღვნას ან სადმე დაპატიჟოს. გოგონა სიამოვნებით იღებს საჩუქრებს, მაგრამ ჩემს შვილს სიყვარულით არ პასუხობს. ბიჭი ძალიან იტანჯება და განიცდის. როგორ დავეხმარო? ინგა, 33 წლის
ვშიშობ, აქ დახმარება შეუძლებელია. პირველი სიყვარული ხშირად რჩება უპასუხოდ, მაგრამ ის მაინც ძალიან მნიშვნელოვანია. როგორც ჩანს, თქვენ და თქვენს ვაჟს ახლო ურთიერთობა გაქვთ და ის თავის განცდებს გიზიარებთ. ეს ძალიან კარგია. თქვენ შეგიძლიათ, მას უდიდესი თანადგომა გაუწიოთ და აუხსნათ, რას ნიშნავს გოგონას საქციელი, რომელიც მას ზოგჯერ არ ესმის. ნურც იმას დაივიწყებთ, რომ თქვენი ვაჟი ახლა სწავლობს გოგონებთან ურთიერთობას, მათ პატივისცემას, ეს კი სასარგებლო გამოცდილებაა.
- რატომ არის, რომ მამაკაცებს ყოველთვის ვაჟი სურთ? ორსულად ვარ. ბავშვის სქესის გარკვევა ჯერ ადრეა, მაგრამ ვიცი, რომ როგორც ბიჭის, ასევე გოგონას დაბადება ერთნაირად გამახარებს. ქმარიც მეუბნება, რომ ბავშვის სქესი მისთვის მნიშვნელოვანი არ არის, მაგრამ ახლახან ყური მოვკარი, როგორ ეუბნებოდა მეგობარს, თუ გოგონა გაჩნდა, "კიდევ ერთხელ უნდა ვცადოო". იქნებ ეს უბრალოდ მამაკაცური ხუმრობაა, მაგრამ არ მინდა, წინასწარ შეიქმნას განწყობა, რომ ბიჭი ეყოლება. იქნებ გოგო გაჩნდეს... როგორ გადავარწმუნო? ეკა, 27 წლის
შესაძლოა, ეს მართლაც ხუმრობა იყო. ან თქვენი მეუღლე საკუთარ იმიჯზე ზრუნავდა - ჩვენში ხომ მიღებულია, რომ მამებს ყოველთვის ბიჭების მოლოდინი აქვთ. პრაქტიკა კი სხვა რამეს გვიჩვენებს: მამების უმრავლესობა უფრო მეტად გოგონებს ანებივრებს. გარდა ამისა, მამობრივი სიყვარული უფრო გვიან იღვიძებს, ვიდრე დედობრივი. ასე რომ, ნუ აღელდებით. თუ გსურთ, შეარჩიეთ შესაფერისი დრო და პირდაპირ ჰკითხეთ მეუღლეს, რას ფიქრობს სინამდვილეში.
- მყავს შეყვარებული. ის არაჩვეულებრივი ბიჭია. ძალიან ვუყვარვარ, კარგად მეპყრობა, მაგრამ არსებობს ერთი პრობლემა - ის ელიტური, მდიდარი ოჯახიდან არის. მშობლები საგანგებოდ ურჩევენ შვილს ნაცნობებს. ისინი არასოდეს დაუშვებენ, რომ მათი ვაჟი ჩემზე დაქორწინდეს. მე ნაკლებად უზრუნველყოფილი ოჯახი მაქვს, ვერც უმაღლესი განათლების მიღება მოვახერხე. ასე რომ, არც ქონება გამაჩნია და არც დიპლომი. ალბათ, ჩვენი ურთიერთობა დიდხანს არ გაგრძელდება... ნატა, 25 წლის
თქვენი შეყვარებული უკვე ზრდასრული და დამოუკიდებელი მამაკაცი უნდა იყოს, ეს კი იმას ნიშნავს, რომ მას თავად უნდა შეეძლოს გადაწყვეტილების მიღება და არ უნდა იყოს დამოკიდებული მშობლების სურვილზე. თუ მან თქვენ აგირჩიათ, ესე იგი, გაქვთ რაღაც ისეთი, რაც "ქონებასა" და "დიპლომზე" ძვირი ღირს. მშობლებს ისღა დარჩენიათ, რჩევა მისცენ, მოიწონონ ან არ მოიწონონ მისი არჩევანი. მაგრამ თუ დედ-მამა მართლა აუკრძალავს მას თქვენთან შეხვედრას და ისიც დაემორჩილება, მაშინ ჩათვალეთ, რომ ძალიან გაგიმართლათ - "დედიკოს ბიჭთან" ცხოვრება ძალიან მძიმეა. მომავლის შიში ჩრდილავს აწმყოში განცდილ სიხარულს, ამიტომ ეცადეთ, წინასწარ არ იფიქროთ მოსალოდნელ პრობლემებზე, ჯობს, კონცენტრირება მოახდინოთ იმაზე, რაც ახლა ხდება და მიიღოთ სიამოვნება ამჟამად არსებული ურთიერთობისგან.
