ნანა კალანდაძე

.

• "ცოტა ხნის წინ თმა შევიღებე და ვარცხნილობა შევიცვალე. ახლა გაცილებით უკეთ გამოვიყურები, მაგრამ მეჩვენება, რომ ჩემს მეგობარს, ცოტა არ იყოს, შურს ჩემი. როცა კომპლიმენტებს მეუბნებიან, მკბენს და ენამწარობს. ძალიან მტკივა გული, როცა ვხედავ, როგორ ინგრევა ჩვენი ურთიერთობა."

ელენე, 19 წლის

- მეგობრის რეაქცია აჩვენებს, რომ მას არც მანამდე ჰქონია მეგობრული გრძნობა შენს მიმართ, მხოლოდ თანამგზავრის, თანამოსაუბრის როლს ასრულებდა. მეგობრის დაკარგვა გულსატკენია, მაგრამ კარგია, რომ თვალი აგეხილა. ამიერიდან უფრო მეტი ყურადღებით დააკვირდები ხალხს და დაუმეგობრდები გოგონებს, რომლებიც შენში არა პოტენციურ მეტოქეს, არამედ ახლობელს დაინახავენ.

• "როგორც ჩანს, დედაჩემისგან არასასიამოვნო თვისებები გამომყვა, მე კი სწორედ იმას ვცდილობდი, მას არ დავმსგავსებოდი. ნუთუ ვერ შევიცვლები?"

  ნატო, 27 წლის

- ნატო, ვფიქრობ, შენი მთავარი პრობლემა არასასიამოვნო თვისებები კი არა, ის არის, რომ ცდილობ, საკუთარი თავიდან დედის ხატი ამოიკვეთო. თავი ანებე იმაზე ფიქრს, რით ჰგავხარ დედას და რით - არა. მოიქეცი ისე, როგორც გსურს, როგორც გული გიკარნახებს. თუ ამას მოახერხებ, დედის ხატისგანაც გათავისუფლდები.

• "სტუმრების მოწვევის მერიდება, რადგან ცუდი მზარეული ვარ. თუ რომელიმე კერძი შემიქეს, სულ მგონია, რომ ამას ზრდილობის გამო აკეთებენ. უამრავი რეცეპტი ვიცი, არც ფანტაზიას ვუჩივი, მაგრამ თავდაჯერება მაინც მაკლია. როგორ მოვიქცე?"

  ქეთი, 33 წლის

- მეტისმეტად ნუ ჩაუღრმავდებით საკვების მომზადების ტექნიკურ მხარეს - სტუმრები აფასებენ არა მხოლოდ საკვების ხარისხს, არამედ დიასახლისის ყურადღებას და მონდომებას, შექმნას მყუდრო და სასიამოვნო ატმოსფერო. თქვენ ნაცნობებს იმისთვის კი არ იწვევთ, რომ კარგად დაანაყროთ, არამედ ურთიერობისთვის, ახლობლებთან შესახვედრად და სასიამოვნო საღამოს გასატარებლად.

• "ინტერნეტით ერთი ახალგაზრდა გავიცანი. ჩვენი ვირტუალური რომანი ნახევარ წელიწადს გრძელდებოდა, მაგრამ ნამდვილმა პაემანმა იმედი გამიცრუა. ჭკვიანი, ფაქიზი პიროვნება მეგონა, შეხვედრისას კი სულ სხვანაირი მომეჩვენა. დაბნეული ვარ, არ ვიცი, რა გზას დავადგე..."

ეკა, 24 წლის

- თუ განშორება მტკიცედ არ გადაგიწყვეტია, მაშინ მიეცი მას კიდევ ერთი შანსი და ერთხელ მაინც შეხვდი. შენ გიყვარდა საკუთარი წარმოსახვით შექმნილი ხატი, ახლა კი სცადე, მის მიღმა ნამდვილი ადამიანი დაინახო. შესაძლოა, ის წარმოსახვითი სიყვარული არ დაგიბრუნდეთ, მაგრამ თუ ერთმანეთისადმი სულიერი სიახლოვე იგრძენით, რა გიშლით ხელს, რომ მეგობრებად დარჩეთ?

• "მეუღლემ მიმატოვა - სხვა ქალთან წავიდა. განცხადება შევიტანე განქორწინებაზე, მაგრამ აღმოჩნდა, რომ ჩემი ყოფილი ქმარი... ამისთვის მზად არ ყოფილა! სასამართლო უკვე ორჯერ დაინიშნა, მაგრამ ის პროცესზე არ მოვიდა - ამბობს, რომ დრო სჭირდება, რათა საკუთარ თავში გაერკვეს და სწორი გადაწყვეტილება მიიღოს. აქეთ მე დავიტანჯე, იქით - მისი საყვარელი. რამდენ ხანს უნდა ველოდოთ, ჩვენც ხომ გვაქვს ნერვები?!"

  ნინო, 35 წლის

- როგორც ჩანს, თქვენს ქმარს სურს, ყველაფერი ძველებურად დარჩეს. პროცესი რომ დააჩქაროთ, მოახდინეთ სიტუაციის დესტაბილიზაცია, შესთავაზეთ ქმარს, თვითონვე დაასახელოს თარიღი, როცა მზად იქნება გადაწყვეტილების მისაღებად ან კვლავ შეიტანეთ განცხადება. თქვენს ქმარს შეუძლია, კიდევ რამდენჯერმე არ გამოცხადდეს სასამართლოზე, მაგრამ ბოლოს და ბოლოს მისი თანხმობის გარეშეც განგაქორწინებენ.

• "ვიშოვე სამსახური, მაგრამ არ ვიცი, როგორ შევეგუები ახალ ოფისს. უცხო ადგილას თავს ყოველთვის უხერხულად ვგრძნობ, მეჩვენება, რომ იქაურობას მყუდროება აკლია, სამუშაო მაგიდაზეც კი ყველაფერი უცხოა, სხვისია. როგორ შევეჩვიო ახალ გარემოს?"

  მაკო, 29 წლის

-უწინარეს ყოვლისა, სამუშაო კუთხე ისე დაალაგე, რომ თავი რაც შეიძლება მოხერხებულად იგრძნო: ადგილი შეუცვალე საგნებს, კომპიუტერს, შეცვალე გამოსახულება ეკრანზე, შიგნიდან წაიღე შეჩვეული ნივთები: ფინჯანი, ოჯახის წევრების ფოტო, მოხერხებული კალამი. ეს წვრილმანები საკუთარი ბინის ასოციაციას აღგიძრავს და მყუდროების განცდას მოგგვრის.

• "ჩემი შეყვარებულის საქციელი ცოტა არ იყოს მაშინებს. სანამ ფხიზელია, არაჩვეულებრივად მეპყრობა, მაგრამ საკმარისია, ერთი ყლუპი დალიოს, რომ მაშინვე ცოფდება, ღალატს მაბრალებს, იხსენებს ძველ წყენას... როგორ მოვიქცე?"

ლალიკო, 24 წლის

- ალკოჰოლის ზემოქმედების ქვეშ ადამიანს უჭირს საკუთარი საქციელის კონტროლი. ამ ვითარებაში ის კი არ უნდა გაღელვებდეს, რომ შენი შეყვარებული იცვლება, არამედ ის, რომ შეუძლია, შეურაცხყოფა მოგაყენოს. გამორიცხული არ არის, ელოდეს კიდევაც ღალატს, რათა სამაგიერო გადაგიხადოს.

აუცილებლად უნდა იმსჯელოთ ამ პრობლემაზე. დროა, არჩევანი გააკეთოს - ან შენ, ან ალკოჰოლი. ისე კი, შენს ადგილას კარგად დავფიქრდებოდი - ფაქტია, შენი შეყვარებული სიმთვრალეში არაადეკვატური ხდება, რაც მომავალში უთუოდ შეგიქმნის პრობლემებს.

• "ნოტარიუსის თანაშემწედ ვმუშაობ და, მერწმუნეთ, ეს ადგილი იოლად არ ჩამვარდნია ხელში, ჩემი დედამთილი და მისი ნათესავები კი მიიჩნევენ, რომ ვალდებული ვარ, ყველა საქმე განზე გადავდო და მათი პრობლემები ვაგვარო. უხერხულ მდგომარეობაში ვვარდები - მე ხომ, სხვა კლიენტებს რომ თავი დავანებოთ, უფროსიც მყავს! როგორ ავუხსნა ნათესავებს ეს ისე, რომ არ გავანაწყენო?"

  მარინა, 25 წლის

- რაკი ამ სანოტარო ბიუროს ხელმძღვანელი შენ არ ხარ, გამოსავლის პოვნა არ გაგიჭირდება: აუხსენი ნათესავებს, რომ განსახილველი საქმეების თანმიმდევრობას შენი უფროსი წყვეტს. ამასთანავე, შეეცადე, ისეთი შთაბეჭდილება შექმნა, თითქოს მათ აქტიურად ეხმარები, რეგულარულად მიაწოდო ინფორმაცია მათი საქმეების შესახებ, იმეორო, რომ პირადად ადევნებ თვალს მათ მსვლელობას.

• "მე და ჩემმა მეუღლემ გადავწყვიტეთ, სხვა ქალაქში გადავსახლდეთ, სადაც ჩემს ქმარს კარგი სამსახური შესთავაზეს, მაგრამ არ ვიცით, როგორ შეხვდება ამ ამბავს ჩვენი სამი წლის ბიჭუნა _ ის ძალიან არის მიჯაჭვული ჩემს მშობლებს, კვირაში სამ დღეს მათთან ატარებს. ვაითუ მათთან განშორებას ვერ შეეგუოს? ეს მისთვის სერიოზული ტრავმა იქნება..."

  ნათია, 31 წლის

- ცვლილებების აღქმისას ბავშვი უმთავრესად მშობლების რეაქციაზეა ორიენტირებული. რაც უფრო მშვიდად იქნებით თქვენ და თქვენი მეუღლე, მით უფრო იოლად გადაიტანს ახლობლებთან განშორებას თქვენი პატარა. აუხსენით, სად იცხოვრებთ მომავალში, რატომ მიიღეთ ასეთი გადაწყვეტილება, რამდენად ხშირად შეხვდება ბებიასა და ბაბუას. მნიშვნელოვანია, თქვენი მშობლებიც მშვიდად შეხვდნენ თქვენს გამგზავრებას და არ იმეორონ: ”რა გეშველება უჩვენოდ?” ”არ მოგენატრებით?”. პირველ ხანებში ეცადეთ, უქმეებზე ხშირად ესტუმროთ ბებიასა და ბაბუას. მიეცით ბავშვს საშუალება, ხშირად ესაუბროს მათ ტელეფონით.

• "ბებია ხუთი წლის წინ გარდაიცვალა, მაგრამ ამ ტკივილს დღემდე ვერ მოვერიე. მე ბებო მზრდიდა, უერთმანეთოდ ვერ ვძლებდით. ობოლი არ გეგონოთ - მშობლებიც მყავს, დაც, მაგრამ სულ ბებიაზე ვფიქრობ. როგორ დავძლიო დეპრესია?"

თეონა, 21 წლის

- საყვარელი ადამიანის გარდაცვალება ყველას გვაყენებს ტკივილს, მაგრამ, როგორც ჩანს, შენ მხოლოდ ბებიის დაკარგვას არ განიცდი. ალბათ, ის რაღაც ისეთს გაძლევდა, რასაც სხვა ვერავინ მოგცემს. როგორც არ უნდა იყოს, გახსოვდეს: მისი სითბო, მისი სიყვარული მუდამ შენთან იქნება, როგორც ნათელი მოგონება, რომელსაც ვერავინ წაგართმევს.