მარიამ ფოლადაშვილი

სამკურნალო მიზნით გამოიყენება ცხენისწაბლას ყვავილიც და ნაყოფიც. თუმცა გასათვალისწინებელია, რომ არ შეიძლება მათი შეგროვება სამანქანო გზებთან ახლოს. აუცილებელია მათი ტყეში მოკრეფა. არსებობს ცხენისწაბლას როგორც ყვავილის, ისე ნაყოფის გამოყენების სხვადასხვა მეთოდი.

ცხენისწაბლას სასარგებლო თვისებები:

• დადებითი გავლენა აქვს სისხლძარღვებზე - ითვლება კარგ ვენომატონიზებელ საშუალებად ვენების ვარიკოზული გაგანიერებისას, ვენების პოსტ-ტრავმული დაზიანებისას, სისხლძარღვთა სპაზმის შემთხვევაში;
• აქვს სისხლდენის შემაჩერებელი,შეშუპების საწინააღმდეგო მოქმედება;
• გამოიყენება თრომბოზისა და ჰიპერტონიის საწინააღმდეგოდ;
• გააჩნია ანტიბაქტერიული მოქმედება;
• მას შეუძლია აღადგინოს ცილოვანი სტრუქტურები

რა უნდა გავითვალისწინოთ ცხენისწაბლას მიღებისას:

დოზის გადაჭარბებამ შესაძლოა გამოიწვიოს კრუნჩხვები, არ შეიძლება მისი მიღება ჰიპოტონიის (დაბალი წნევის) დროს. მისი მიღებისას აუცილებელია სისხლის შედედების უნარის კონტროლი.

ახლა კი რამდენიმე ხალხურ რეცეპტს შემოგთავაზებთ:

• ვენების ვარიკოზული გაგანიერებისას ცხენისწაბლას ნაყოფის ან ყვავილის ნახარშის აბაზანას იყენებენ. ნახარში შემდეგნაირად მზადდება: 50 გრამი ხმელი დაქუცმაცებული ნედლეული ერთ ლიტრ წყალში ნახევარი საათი ადუღეთ, შემდეგ გადაწურეთ, ოდნავ გააგრილეთ და ფეხების აბაზანა გაიკეთეთ.
• ჰემოროის სამკურნალოდ ნაყოფისა და ქერქის ნახარშს იყენებენ. 5 გრ. დაქუცმაცებულ ნაყოფსა და ამდენივე ქერქს დაასხით ერთი ჭიქა ადუღებული წყალი, ადუღეთ 30 წუთის განმავლობაში, ცხელივე გადაწურეთ და ადუღებული წყლით საწყის მოცულობამდე შეავსეთ. დალიეთ ერთი სუფრის კოვზი დღეში 2-3-ჯერ, ჭამის შემდეგ.
• გამწვავებული ქრონიკული დაავადებებისას ერთი მწიკვი ძალიან წვრილად დაჭრილი ფოთლებისა და ქერქის ნაზავს დაასხით ერთი ჭიქა ცივი ანადუღარი წყალი და დატოვეთ მთელი ღამის განმავლობაში. დილით გადაწურეთ, დალიეთ 2-3 სადილის კოვზი 5-6-ჯერ დღეში საკვების მიღების შუალედებში. ნაყენი კარგი საშუალებაა ხველების დროს, განსაკუთრებით მწეველთათვის.
• გულის არეში ტკივილების დროს შემდეგი რეცეპტი გიშველით: 3 სადილის კოვზ დაქუცმაცებულ ცხენისწაბლას დაასხით 2 ჭიქა არაყი, გააჩერეთ 2 კვირა. გადაწურვა არ არის საჭირო. დალიეთ 30-35 წვეთი დღეში 3-ჯერ ჭამის დროს.