ნანა კალანდაძე

სიბერის შესახებ

სიბერე ადამიანის ბუნებრივი მდგომარეობა არ არის. მეცნიერების უმრავლესობის აზრით, ეს ავადმყოფობაა და ჩვენ თავადვე ვიწვევთ მას საკუთარი გაუაზრებელი კვებითი მოქმედებებით. მსოფლიოში ადამიანების 70% სწორედ საკვებისადმი დამნაშავეობრივი დამოკიდებულების გამო იღუპება. პოდაგრა (ნიკრისის ქარი), დიაბეტი, წყლული, ინფარქტი, ინსულტი, სხვადასხვა სახის სიმსივნე – ეს ყველაფერი ჩვენი ცივილიზაციის უბედურებაა.

სხეულის დაბერების შემაფერხებელი პროდუქტები

სიბერემ უკან რომ დაიხიოს, საკმარისია კვების უმარტივესი წესების დაცვა: ყველაზე მთავარი – ზომიერებაა. ხოლო სიბერის შემაფერხებელი სასარგებლო პროდუქტებიდან უმთავრესია: ბოსტნეული, ხილი, იოგურტი, რძე და ღვინო.

დიახ, ღვინო, მაგრამ ნამდვილი და მცირე რაოდენობით! მაგ., საფრანგეთში, ტრადიციულად, ხორცს წითელი ღვინით ამზადებენ და იქ სიცოცხლის ხანგრძლივობა უფრო მაღალია, ვიდრე ლამანშის გადაღმა, ბრიტანეთში.

სასარგებლო პროდუქტებს შორის ყველაზე მთავარი იოგურტია. მაგრამ არა რძის ფხვნილისგან მომზადებული, არამედ ნამდვილი რძის. ფხვნილით გაკეთებულ იოგურტს სამკურნალო ეფექტი არ გააჩნია. ნატურალური იოგურტი ყველაზე ადვილად ასათვისებელი პროდუქტია, რომელიც ორგანიზმს კუჭის და სწორი ნაწლავის სიმსივნისგან იცავს და აფერხებს ოსტეოპოროზის განვითარებას.

ყველაზე ეფექტური გაწმენდა და მარტივად გახდომა

ერთმანეთს შეურიეთ 500 გ ნატურალური იოგურტი, 1 ს. კ. თაფლი, 1 ს. კ. ვაშლის ძმარი, 1 ჩ. კ. დარიჩინი და 40 წვეთი 30%-იანი პროპოლისის ნაყენი. დესერტს შეგიძლიათ დაამატოთ მოცვი, ბანანი. კენკრა, ნიგოზი – 1 მუჭა, ხოლო ბანანი – მხოლოდ მთელის 1/4.

ეს გემრიელი დესერტი შეგიძლიათ ჭამოთ საუზმესა და ვახშამზე. იმ შემთხვევაში, თუ ამ დესერტის 2 სუფრის კოვზს ყოველ 2 საათში ერთხელ ჭამთ 20 დღის განმავლობაში, შეამჩნევთ, რომ წელის გარშემოწერილობა შეგიმცირდებათ, სიმხნევე მოგემატებათ, ხოლო თქვენს თმას ბზინვარება შეემატება და საერთოდ, ორგანიზმი მთლიანად გაჯანსაღდება.

ნატურალური ვიტამინები სილამაზისთვის

სილამაზისთვის საუკეთესო ვიტამინებს სტაფილოსა და ნივრის სალათი შეიცავს. მსგავსი ეფექტი პროპოლისსაც აქვს. ის კლავს გრიპის ვირუსს, ებრძვის გასტრიტს, ყაბზობას, დისბაქტერიოზს, საუკეთესო პროფილაქტიკური საშუალებაა კიბოს წინააღმდეგ. დაამატეთ 50 მლ წყალს 20-30 წვეთი პროპოლისი და მიიღეთ 2-ჯერ დღეში.

ქალებს შეუძლიათ მოამზადონ სილამაზის დესერტი, რომელიც აჯანსაღებს ფრჩხილებს, კანს და თმას.

მინის ჭყრჭელში თანაბარი რაოდენობით შეურიეთ თაფლი, მანქანაში გატარებული ნიგოზი, კურკუმა, ქიშმიში, ლიმონი და მიიღეთ დღეში 3 ს. კ.

შხამები საკვებში

მთელ მსოფლიოში 200-მდე ქიმიური ნივთიერებაა შექმნილი გასაყიდი პროდუქტისთვის სასაქონლო იერის და სასიამოვნო არომატის მისაცემად. დადგენილია, რომ ამ ნივთიერებებს კონცენტრირებული სახით სიკვდილის გამოწვევა შეუძლია. როდესაც რამეს ყიდულობთ, ყურადღებით წაიკითხეთ შეფუთვაზე ყველაზე პატარა შრიფტით მოცემული ინფორმაცია. ნატრიუმის ნიტრატის და ნიტრიტის სინთეტიკური დანამატები ახალგაზრდობისა და ჯანმრთელობის ყველაზე დიდი მტერია. დიდი რაოდენობით ამ ნივთიერებებს შეიცავს: ძეხვი, სოსისი, ლორი, თევზის კონსერვები. მას უსვამენ გაყინვის წინ თევზს და ხორცს.

ძალიან სახიფათოა ჯანმრთელობისთვის ისეთი კონსერვანტები, როგორებიცაა: ჰიდროკსიტოლუოლის და ჰიდროკსიანიზოლის ბუტილატები. ამ ნივთიერებებს ჩიფსების მომზადებისას უმატებენ ზეთში. მას ასევე შეიცავს მზა კრემიანი ნამცხვრები, რომლებსაც შენახვის ვადა 1 ან მეტი წელი აქვს, საღეჭი რეზინები და მაკარონი. თუ შეამჩნიეთ, ეს ის პროდუქტებია, რომლებიც ყველაზე მეტად უყვართ ბავშვებს.

პატარებისთვის ნაკლებად სახიფათო არც მზა წვენებია. იმისთვის, რომ წვენს ნალექი არ გაუჩნდეს და სითხის აშრევება არ მოხდეს, მასში სპეციალურ ეთერზეთებს ამატებენ. ამ შემთხვევაში გამოსავალი მხოლოდ ერთია – სვით ნატურალური, ახალგამოწურული წვენები.

მარილიანი და ტკბილი საკვები – ადამიანის ორგანიზმის მტრები

გასული საუკუნის დასაწყისში ადამიანების უმრავლესობა 5-ჯერ ნაკლებ შაქარს მოიხმარდა, ვიდრე ახლა. შაქარს ზიანი მოაქვს გულის, ფილტვების, თირკმელებისა და კუჭისთვის. დაივიწყეთ გაზიანი სასმელები და ლიმონათი.

ადამიანებს, რომლებიც მაღალი წნევით იტანჯებიან, წარმოდგენაც არ აქვთ, რომ მათი ავადმყოფობის მთავარი მიზეზი დიდი რაოდენობით მოხმარებული მარილია. განსაკუთრებით სახიფათოა ჩიფსები და მარილიანი თხილი მშიერ კუჭზე. ეს თვითმკვლელობის ტოლფასია.

დღეგრძელობის რეცეპტი

1. იმაზე მეტ კალორიას ნუ მიიღებთ, ვიდრე დახარჯვას შეძლებთ.

2. ყოველდღიურად ჭამეთ თუნდაც 1 ვაშლი.

3. სვით განაყინი წყალი (საყინულეში შედგით მინის ჭურჭლით, რომ გაიყინება, ოთახის ტენპერატურაზე გააჩერეთ) და მცენარეული ნაყენები.

4. იმუშავეთ აქტიურად.

5. ყოველდღე მიიღეთ შხაპი.

6. იძინეთ გრილ ოთახში.

7. დასვენების დღეებში ისეირნეთ სუფთა ჰაერზე. ფეხით ან ველოსიპედით გაიარეთ 10-15 კმ.

8. საკუთარ თავში ნუ ჩაიკეტებით. ეკონტაქტეთ მეგობრებს, იხალისეთ, იცინეთ, უარს ნუ იტყვით დასვენებასა და განტვირთვაზე.

9. არასდროს იფიქროთ და ისაუბრობთ იმაზე, რომ ბერდებით.