დევი დევიძე

პირველ ადგილზეა ძეხვეული - სოსისები, სარდელები, ძეხვები და ასე შემდეგ. მათში ბევრია მავნე ნივთიერება - კონსერვანტები, გემოს გამაძლიერებლები, მარილები და მავნე ცხიმი. ონკოლოგიური კვლევების ინსტიტუტის (აშშ) სპეციალისტები მივიდნენ იმ დასკვნამდე, რომ თანამედროვე ძეხვეულში იშვათად თუ აღმოაჩენთ ორგანიზმისთვის სასარგებლო ნივთიერებებს, სამაგიეროდ, ამ “სასუსნავმა” შეიძლება სწორი ნაწლავის კიბომდე მიგიყვანოთ.

მომდევნო ადგილი გაყინულ ნახევარფაბრიკატებსა და მზა პროდუქტებს უკავია. ბლინები, კატლეტები, პელმენები და სხვა მადის აღმძვრელად გამოიყურება და სწრაფადაც მზადდება, მაგრამ მათი თითოეული ულუფა დაახლოებით 1000 კალორიას და 60 გრამ ცხიმს შეიცავს, ეს კი ადამიანის ორგანიზმისთვის საკმაოდ მავნეა. ამ პროდუქტების დიეტური, ცხიმის მცირე შემცველობის მქონე ვარიანტებიც არსებობს, თუმცა მათში ბევრია მარილი და მავნე კონსერვანტი.

კრემიანი ფუნჩულა ფქვილის, შაქრისა და ტრანსცხიმების კონცენტრაციაა. ორგანიზმისთვის ყველა მათგანი საკმაოდ მავნეა, მათი ერთობლიობა - მით უმეტეს. დამტკიცებულია, რომ ერთი ცალი ფუნჩულა 10-20 გრამ ცხიმს და დაახლოებით სამას უსარგებლო კალორიას შეიცავს.

მაიონეზსა და კეტჩუპს - ამ ჯადოსნურ სოუსებს, რომლებიც, ტრადიციულად, თან ახლავს ფასტფუდის კერძების უმრავლესობას, შეუძლია, სასარგებლო საკვები ნამდვილ შხამად აქციოს. კეტჩუპი სტაბილიზატორებთან, ემულგატორებსა და კონსერვანტებთან ერთად ქიმიურ საღებავებსაც შეიცავს, ხოლო მისი დაახლოებით მეხუთედი შაქარია. ასეთი დრესინგი არაჩვეულებრივად ფარავს უგემური და, უბრალოდ, გაფუჭებული საკვების ბუნებრივ გემოს.

მაიონეზი კი ეგრეთ წოდებული ტრანსცხიმების - ცხიმმჟავების იზომერების - მატარებელია, რომლებიც ატყუებენ ორგანიზმს და ნატურალური ომეგა-3 და ომეგა-6 ცხიმჟავების ნაცვლად სხდებიან უჯრედების ბიომემბრანებში. ტრანსკონფიგურაციებს ონკოგენეზამდე, ათეროსკლეროზამდე მივყავართ, იზრდება შაქრიანი დიაბეტის განვითარების რისკი და ქვეითდება იმუნიტეტი.

კიდევ ერთი საფრთხეა პლასტიკური შეფუთვა, რომელშიც ხშირად ეკონომიის მიზნით ინახება მაიონეზი, - სოუსში არსებულ ძმართან ურთიერთქმედებისას მისგან კანცეროგენული ნივთიერებები გამოიყოფა. გამოიცანით, სად ხვდებიან ისინი.