მედიკამენტები და დიეტა
ასევე არ შეიძლება მედიკამენტის მიღებიდან მოკლე ხანში რძის ან მისი რომელიმე პროდუქტის მიღება. რძე და მისი ნაწარმი მდიდარია კალციუმით, რომელთან ურთიერთქმედებაც ამცირებს ანტიბიოტიკების სამკურნალო ეფექტს. სამაგიეროდ, სიცხის დამწევი, ანთების საწინააღმდეგო და ჰორმონული პრეპარატებისთვის სწორედ რძის მიყოლებაა რეკომენდებული, რათა მაქსიმალურად შემცირდეს საყლაპავი მილის ლორწოვან გარსზე მათი გამაღიზიანებელი ზემოქმედება. გრეიპფრუტისა და შტოშის წვენი აფერხებს ორგანიზმიდან მედიკამენტების გამოყოფას და ხელს უწყობს დოზის გადაჭარბებას. კრაზანას ნაყენი ანეიტრალებს მრავალი მედიკამენტის, მაგალითად, ორალური კონტრაცეპტივების მოქმედებას. ჩაიმ და ყავამ წამლებთან კომბინაციაში შესაძლოა ჰიპერაქტივობის, უძილობისა და ქრონიკულად გამოუძინებლობის პროვოცირება მოახდინოს. წამლის დალევა ნებისმიერ შემთხვევაში უმჯობესია ოთახის ტემპერატურის 1/2-1 ჭიქა ანადუღარი წყლით.
გასათვალისწინებელია ისიც, რომ საჭმლის მომნელებელ ტრაქტში საკვების არსებობამ შესაძლოა ხელი შეუწყოს ზოგიერთი მედიკამენტის სწრაფად შეწოვას, ზოგიერთისა კი შეაფერხოს. ის წამლები, რომელთა ინსტრუქციაში მითითებულია "ჭამამდე", მიღებულ უნდა იქნეს საკვების მიღებამდე 15 წუთით ადრე, ხოლო ისინი, რომლებსაც აწერია "ჭამის შემდეგ" - საკვების მიღებიდან 15 წუთის შემდეგ. უზმოზე დასალევად განკუთვნილი მედიკამენტები (ჭიების საწინააღმდეგო პრეპარატები, საფაღარათო საშუალებები) უნდა მიიღოთ საუზმემდე 20-60 წუთით ადრე. ზოგიერთი დაავადების მკურნალობისას განსაზღვრული დიეტის დაცვა არ არის საჭირო, მაგრამ ამა თუ იმ მედიკამენტის მიღების გამო კვების რაციონისა და რეჟიმის შეცვლა ხდება აუცილებელი. ასე, მაგალითად: პარკინსონის დაავადების დროს სპეციალური დიეტის დაცვა საჭიროდ არ მიიჩნევა, მაგრამ ზოგჯერ L-დოფას პრეპარატების საფუძველზე დანიშნული მკურნალობა სასურველ ეფექტს არ იძლევა.
ეს უმეტესად მაშინ ხდება, როდესაც პაციენტი მედიკამენტებს უშუალოდ ჭამის დროს ან ჭამის შემდეგ იღებს, ან კიდევ მისი საკვები რაციონი მეტისმეტად მდიდარია ცილებით. ცილები აფერხებენ ნაწლავებში L-დოფას პრეპარატების შეწოვას. ეს ეფექტი დაავადების შედარებით გვიანდელ სტადიებზე ვლინდება. ასეთ შემთხვევაში პაციენტებს ურჩევენ, დანიშნული მედიკამენტები ჭამიდან ჭამამდე არსებულ შუალედში მიიღონ, ხოლო საკვებ რაციონში ცილებით მდიდარი პროდუქტების, განსაკუთრებით ხორცისა და თევზის წილი შეამცირონ. ასეთ პაციენტებს ეკრძალებათ ყავა, მაგრამ კათხა ლუდი, ცოტაოდენი ღვინო ან შამპანური მათთვის ნებადართულია. რაც მთავარია, პარკინსონით დაავადებულებმა, ისევე როგორც, საზოგადოდ, ხანდაზმულებმა, აუცილებლად უნდა სვან სათანადო ოდენობის წყალი.
გახსოვდეთ, მედიკამენტური თერაპიის პარალელურად აუცილებლად უნდა დაიცვათ კვების შესაბამისი რეჟიმი, რათა მიღებულმა წამალმა მაქსიმალურად გარგოთ და მინიმალურად გავნოთ. ამიტომ შესაბამისი დანიშნულების მიღებისას აუცილებლად ჰკითხეთ მკურნალ ექიმს საკვები რაციონის ცვლილებისა და კვების რეჟიმის თავისებურების შესახებ. კონკრეტული დაავადების მკურნალობის დროს რომელი პროდუქტებია რეკომენდებული თქვენთვის, ექიმი განსაზღვრავს, თუმცა მათი ქიმიური შედგენილობის ცოდნა არც თქვენთვის იქნება ურიგო. ეს დაგეხმარებათ, თავი არიდოთ არასასურველ საკვებს და ორგანიზმს განკურნებაში შეუწყოთ ხელი.
იცით თუ არა, რომ საკვებს მეცნიერები ექვს ძირითად ჯგუფად ყოფენ?
I ჯგუფი - რძე და რძის ნაწარმი (ხაჭო, ყველი, არაჟანი, მაწონი...)
II ჯგუფი - ცხოველისა და ფრინველის ხორცი, თევზი, კვერცხი
III ჯგუფი - პურ-ფუნთუშეული, შაქარი, მარცვლეული, მაკარონისა და საკონდიტრო ნაწარმი, კარტოფილი
IV ჯგუფი - ცხიმები
V ჯგუფი - ბოსტნეული
VI ჯგუფი - ხილი და კენკრა.