სიელმე და ამბლიოპია - ბავშვთა ასაკის გავრცელებული დაავადებები
გარდა ამისა, მიოპიის გავრცელება ეკრანდამოკიდებულებითაც არის განპირობებული. თუ ბავშვები დროის უმეტეს ნაწილს შენობებში ატარებენ, ხოლო დღეში საშუალოდ 8 საათს ეკრანებთან, მიოპიის განვითარების რისკი უფრო მაღალია. ახლომხედველობის განვითარებისა და პროგრესირების ხელშემწყობი ფაქტორი მზის სინათლის უკმარისობაცაა. ამიტომ, უმჯობესია თუ ბავშვები დროის უმეტეს ნაწილს გარეთ გაატარებენ.
სიელმე და ამბლიოპია არაკორეგირებული რეფრაქციის ანომალიების გართულებებია. თუ რეფრაქციის ანომალიები კორეგირებულია, უმეტესად, გართულებები არ ვითარდება
სიელმე თვალის მამოძრავებელი კუნთების დისბალანსია, რომლის დროსაც ერთი თვალი მუდმივად ან პერიოდულად გადახრილია საფიქსაციო წერტილიდან, ხოლო ამბლიოპია(ზარმაცი თვალი) მხედველობის ისეთი დაქვეითებაა, რომლის დროსაც მხედველობა არ კორეგირდება შესაბამისი ლინზებით და ამავე დროს თვალის ფსკერზე და მხედველობის გზებში შესაბამისი ცვლილებები არ ჩანს.
სიელმე არ არის მხოლოდ კოსმეტიკური დეფექტი, სიელმის დროს ისეთი მნიშვნელოვანი ფუნქცია ზიანდება, როგორიცაა ბინოკულური მხედველობა.
სიელმე შესაძლებელია იყოს თანდაყოლილი ან შეძენილი. თანდაყოლილი სიელმე 1 წლამდე ასაკში ვითარდება. გამომწვევ მიზეზებს შორისაა (ჰიდროცეფალია, ცენტრალური ნერვული სისტემის პათოლოგიები) ხოლო შეძენილი - ძირითადად არაკორეგირებული რეფრაქციის ანომალიებითაა გამოწვეული.
მკურნალობა
სიელმის დადგენის შემდეგ ხდება სათვალის მოთხოვნილების შემოწმება და საჭიროების შემთხვევაში სათვალის დანიშვნა. ასევე ტარდება აპარატურული მკურნალობა-ვარჯიშები. თუ ეს ყველაფერი საკმარისი არ აღმოჩნდება სიელმის მკურნალობისთვის, ხდება ქირურგიული ჩარევა.
დაგვიანებული მკურნალობა ნაკლებ ეფექტურია. ამიტომ, ბავშვის რეფრაქციის ანომალიების პრევენციისა და ასევე თვალის სხვა დაავადებების დროული გამოვლენისთვის თვალი ერთ წლამდე ასაკში, 3 წლის და 5 - 6 წლის ასაკში უნდა შემოწმდეს.
აუცილებელია შემოწმება ცალმხრივ-უნილატარელურ თანდაყოლილ კატარაქტაზე, რომელიც თუ დროულად არ დადგინდა და ქირურგიული მკურნალობა არ ჩატარდა, უნილატერალური ამბლიოპია ვითარდება. ეს კი ცალმხრივი-უნილატერალური სიელმის გამომწვევი მიზეზი შეიძლება გახდეს და მისი მკურნალობა საკმაოდ რთულია.
დროულად დაწყებული მკურნალობის შემთხვევაში სრულიად გამოჯანმრთელება შესაძლებელია.
