გვესაუბრება კლინიკა „ოფთალმიჯის“ ოფთალმოლოგი სოფიო იმედაშვილი:

–როგორ უნდა იყოს ოთახი განათებული მაცადინეობის/კითხვის პროცესში?

–სამეცადინო ოთახისთვის საჭიროა სამუშაო ზედაპირების და ოთახის ზოგიერთი ნაწილის ლოკალურად განათება. სასურველია, ასეთი ლოკალური ნათება ისე იყოს მიმართული, რომ სხივების არეკვლა არ მოხდეს ზედაპირიდან და ჰქონდეს ნეიტრალური ან თბილი ფერი, რათა თვალი არ გადაიღალოს.

–რა უნდა გავითვალისწინოთ განათების შერჩევისას?

–პირველ რიგში, უნდა გავითვალისწინოთ, რომ არ დავეყრდნოთ მხოლოდ ერთ, ცენტრალურ განათების წყაროს. განსაკუთრებით სამეცადინო ოთახში საჭიროა მაგიდის სანათები, ბრები ან წერტილოვანი განათებები, რაც უშუალოდ მიმართულია მაგიდისკენ. ეს თქვენ შვილს დაეხმარება ყურადღების კონცენტრაციაში და, ამასთან ერთად, თავიდან აარიდებთ მხედველობის დაზიანებას.

ასევე საყურადღებოა განათების დონეც(ვატობა). საჭიროა სწორად განვსაზღვროთ რა სიმძლავრის სინათლე სჭირდება ბავშვს სამეცადინო ოთახში, რადგან ძალიან კაშკაშა ნათება ცუდად აისახება თვალის საცრემლე აპარატზე და ხშირ შემთხვევაში იწვევს თვალის სიმშრალეს, ცრემლდენას, წვის და ქავილის შეგრძნებას. ასევე, არასასურველია ზედეტად დაბალი ინტენსივობის ნათება, რადგან ამ დროს, განსაკუთრებით კითხვისას ან მეცადინეობისას, თვალი იძაბება და სწრაფად იღლება.

–როგორ მოქმედებს მხედველობაზე თეთრი და ყვითელი განათება?

–ცივი ნათება უფრო ინტენსიურად და კაშკაშად აღიქმება, ვიდრე თბილი, ანუ მას სინათლის შედარებით მაღალი ტემპერატურა აქვს, რაც ზოგჯერ თვალს ძაბავს.

ყვითელი განათება ყველაზე უსაფრთხო და კომფორტულია თვალებისთვის. ცივი ნათებიგან განსხვავებით, ის არ იწვევს გადაღლას და, ამავე დროს, სიბნელეში ნათებისას თვალისთვის ყველაზე სასიამოვნოა. სწორედ ამიტომ, სასურველია ბავშვის ოთახში თბილ განათებაზე შევაჩეროთ არჩევანი. თუმცა, გასათვალისწინებელია, რომ ლოკალურად ცივი განათებაც საჭიროა, რათა სამუშაო ოთახი ნათელი იყოს.

–რა საფრთხის წინაშე დგება ბავშვის მხედველობა, როცა ელექტონული მოწყოილობიდან ინტენსიურად კითხულობს?

–კომპიუტერი გამოსცემს ლურჯ ნათებას, რომელიც მხედველობისთვის საშიშია. ლურჯი განათების ხანგრძლივმა ზემოქმედებამ შეიძლება გამოიწვიოს ძილის დარღვევა და კომპიუტერული ასთენოპია(დაღლილობის სინდრომი). სინდრომის ძირითადი პრობლემებია თვალის სიმშრალე და დაძაბვა, თავის ტკივილი და კისრის, ზურგის დაძაბულობა.

ამ პრობლემების თავიდან აცილება შესაძლებელია კომპიუტერთან გატარებული დროის შემცირებით, 10წუთიანი შესვენებებით, მსუბუქი თვალის ვარჯიშით და სპეციალური დამცავი სათვალის ხმარებით.

იმედი გვაქვს, რომ ექიმი ოფთალმოლოგის რჩევები თქვენთვის სასარგებლო იყო და ახალი სასწავლო წლისთვის მზადებისას აქტიურად გამოიყენებთ.