რა ნიშნები მიუთითებს ბრონქიოლიტზე
ბრონქიოლიტი უარყოფითად მოქმედებს ქვედა სასუნთქ გზებზე და იწვევს მცირე სასუნთქი გზების ობსტრუქციას.
ბრონქიოლიტს სეზონურობა ახასიათებს. ავადობის სეზონი ნოემბრიდან იწყება და აპრილამდე გრძელდება, პიკს კი იანვარ-თებერვალში აღწევს.
რესპირატორულ-სინციტიური ვირუსი (RSV) ყველაზე ხშირი გამომწვევი აგენტია.
ვირუსული ბრონქიოლიტი ქვედა რესპირატორული ტრაქტის მწვავე ვირუსული ინფექციაა. ბრონქიოლებს ხრტილოვანი ქსოვილი არ გააჩნია და ადვილად იხშობა. ინფექციური აგენტის ზემოქმედების შედეგად ბრონქიოლებში ვითარდება ანთება - ბრონქიიოლიტი. მას ეპითელიური უჯრედების დესტრუქცია, უჯრედული შეშუპება და ანთებითი ნარჩენებითა და ლორწოთი სასუნთქი გზების ობსტრუქცია ახასიათებს. გარდა ამისა, ირღვევა აირთა ცვლა და ორგანიზმი საჭირო რაოდენობით ჟანგბადს ვეღარ იღებს.
კლინიკურ გამოვლინებებია: ხველა, მსტვინავი სუნთქვა, სუნთქვის გაძნელება.
სუნთქვის გახშირების გამო ორგანიზმი ბევრ სითხეს კარგავს, ამიტომ საჭიროა ბავშვს რაც შეიძლება მეტი სითხე მისცეთ.
შემთხვევათა უმრავლესობში გამომწვევი არის რესპირატორულ-სინციტიური ვირუსი (RSV), თუმცა დაავადების მიზეზი ასევე შეიძლება გახდეს რინოვირუსი, ადამიანის მეტაპნევმოვირუსი, ბოკავირუსი, გრიპი, პარაგრიპი და ადენოვირუსი.
ბრონქიოლიტის განვითარების რისკს-ფაქტორებია:
- დღენაკლულობა;
- ხელოვნური კვება;
- ფილტვის დაავადებები;
- იმუნოდეფიციტური მდგომარეობები;
- გულის თანდაყოლილი დაავადებები
დაავადების საინკუბაციო პერიოდი 2-5 დღეა. პირველ დღეებში კი თავს იჩენს შემდეგი სიმპტომები:
- უმადობა;
- ცხელება;
- ცხვირიდან სეროზული გამონადენი;
- ხველა
დაავადების პროგრესირებასთან ერთად კი ინფექცია ქვედა სასუნთქ გზებში ვრცელდება და ვლინდება შედარებით მძიმე სიმპტომები: გახშირებული, მსტვენავი სუნთქვა, გახანგრძლივებული, მუდმივი ხველა.
თუკი, ამ სიმპტომების გარდა აღინიშნება აპნოე, ჰიპოქსია, ციანოზი აუცილებელია მიმართოთ სასწრაფო გადაუდებელ დახმარებას.