გულის არითმია - საყურადღებო პრობლემა
არითმიის დროს პულსი შეიძლება იყოს აჩქარებული, შენელებული ან რითმიდან ამოვარდნილი შეკუმშვებით.(მოსვენებულ მდგომარეობაში გული უნდა იკუმშებოდეს წუთში 60-85-ჯერ).
არსებობს რამდენიმე ტიპის არითმია:
- ბრადიკარდია (გულის ნელი ცემა);
- ტაქიკარდია (გულის სწრაფი ცემა);
- არარითმული არითმია (მოციმციმე არითმია)
არითმიების უმეტესობა არ საჭიროებს სერიოზულ მკურნალობას, თუმცა ხშირ შემთხვევაში შეიძლება სერიოზული გართულებები მოჰყვეს, რაც დამოკიდებულია არითმიის ფორმაზე.
გულის რითმის ცვლილების მაპროვოცირებელი ფაქტორებია:
- მაღალი არტერიული წნევა;
- გულის იშემიური დაავადებები;
- კარდიომიოპათიები;
- ფარისებრი ჯირკვლის პათოლოგიები;
- შაქრიანი დიაბეტი;
- ძლიერი სტრესი;
- ზოგიერთი მედიკამენტის ჭარბი დოზით მიღება;
- დიდი რაოდენობით თამბაქოს, ალკოჰოლისა და კოფეინის მოხმარება
არითმიის დროს გულის არეში იგრძნობა არარეგულარულად გულის შეკუმშვა(გულის ფრიალი) ან შენელებული გულისცემა, ჩხვლეტის შეგრძნება, ჰაერის უკმარისობა, ზოგადი სისუსტე და დაღლილობა. შეიძლება, თავი იჩინოს სხვა სიმპტომებმაც, როგორიცაა: ქოშინი, ხიხინი, თავბრუსხვევა, გაბრუება და გულისწასვლის შეგრძნება, დისკომფორტი გულის არეში. ერთ-ერთი სიმპტომის არსებობის შემთხვევაშიც აუცილებელია ექიმთან ვიზიტი.
არითმიათა მნიშვნელოვანი ნაწილი გულის დაავადებასთან არის ასოცირებული, ამიტომ რეკომენდებულია ცხოვრების ჯანსაღი წესი, რაც გულისხმობს აქტიურ ცხოვრებას, ჯანსაღ კვებას, მოწევისა და ალკოჰოლისგან თავის შეკავებას.