ზოონოზური საფრთხე - ექინოკოკი
დაბინძურებული გარემოდან, ბალახიდან, საკვებიდან შესაძლოა მოხდეს მსხვილფეხა საქონლის (ცხვრის, ღორის, ძროხის) დაავადებაც.
ადამიანი საჭმლის მომნელებელ სისტემაში ექინოკოკის გამომწვევი პარაზიტი დაბინძურებულ საკვებთან ერთად ხვდება. ლიმფური სადინარისა და სისხლძარღვების გავლით ღვიძლში ან სხვა ორგანოში(ფილტვებში, ძვალში, თავის ტვინში) გადადის. ყალიბდება ექინოკოკური ბუშტი(კისტა), რომელიც თანდათან იზრდება.
საინკუბაციო პერიოდი თვეობით ან წლობით შესაძლოა გაგრძელდეს და ექინოკოკური ბუშტის ლოკაციაზეა დამოკიდებული. თავის ტვინში ლოკალიზაციისას კლინიკური ნიშნები უფრო ადრე ვლინდება.
ღვიძლის ექინოკოკისას საწყის ეტაპზე შეიმჩნევა:
- სიმძიმისა და ტკივილის შეგრძნება მარჯვენა ფერდის ქვეშ;
- ღვიძლის გადიდება;
- საერთო სისუსტე;
- ადვილად დაღლა.
ნაღვლის ბუშტზე ექინოკოკური ბუშტის ზეწოლის გამო შესაძლოა განვითარდეს სიყვითლე.
ფილტვის ექინოკოკს საწყის ეტაპზე არ აქვს კლინიკური გამვლინება. კისტის გადიდებისა და ირგვლივ მდებარე ქსოვილებზე ზეწოლის შემთხვევაში თავს იჩენს:
- ტკივილი გულ-მკერდის არეში;
- ხველა(შესაძლოა სისხლიანი ნახველი);
- ქოშინი
ექინოკოკების მიერ თავის ტვინის დაზიანებისას ვლინდება შემდეგი სიმპტომები:
- თავბრუსხვევა;
- თავის ტკივილი;
- ღებინება
მძიმე შემთხვევაში, კისტის დაჩირქებამ და გასკდომამ შესაძლოა გამოიწვიოს პარაზიტების მთელ ორგანიზმში მიგრაცია და რთული ალერგიული რეაქცია - ანაფილაქსიური შოკი.
როგორ დავიცვათ თავი:
- ბოსტნეული, მწვანილი, ხილი დაალბეთ მარილიან წყალში და შემდეგ გულდასმით გარეცხეთ გამდინარე წყალში;
- შინაური ცხოველების ჰიგიენა(დამუშავება ჭიებზე);
- ხელების ხშირი დაბანა;
განსაკუთერებით საყურადღებო არიან ბავშვები, რომლებიც ხშირად თამაშობენ ქვიშით, მიწით და ყოველი ასეთი კონტაქტის შემდეგ აუცილებელია ჰიგიენის მაქსიმალური დაცვა, ხელების კარგად დაბანა.
ექინოკოკს უმთავრესად ქირურგიული ჩარევით მკურნალობენ.