რატომ შეიძლება დაირღვეს ხანდაზმულებში საჭმლის მონელება
ამ ცვლილებების შედეგად ხანდაზმულებსა და მოხუცებულებში თავს იჩენს მალდიგესტიის სიმპტომები (საჭმლის მონელების დაქვეითება).
ინვოლუციური მალდიგესტია წარმოადგენს ნაწლავური მონელების დაქვეითებას საჭმლის მომნელებელი ფერმენტებისა და ნაღვლის ასაკოვანი შემცირების გამო. ინვოლუციური მალდიგესტიის მიზეზია საჭმლის მომნელებელ ორგანოთა ასაკობრივი ფიზიოლოგიური ცვლილებები. ხანდაზმულ ადამიანებს დაავადებათა არარსებობის შემთხვევაშიც კი აწუხებთ მეტეორიზმი, დისკომფორტი მუცლის არეში, შეკრულობა და სხვა. ეს სიმპტომები საჭმლის მონელებისა და მოტორიკის დარღვევის მანიშნებელია.
ხანდაზმული ადამიანის ორგანიზმი ძნელად იტანს რძეს, ცხიმს, ხორცსა და თევზს.
ინვოლუციური მალდიგესტიის სიმპტომებია:
- მუცლის შებერვა;
- საკვების აუტანლობა;
- დიარეა (ფაღარათი);
- წონის კლება
ფერმენტული უკმარისობა და დისბაქტერიოზი იწვევს მეტეორიზმს.
ასაკოვან ადამიანებს ხშირად ერთდროულად რამდენიმე ქრონიკული დაავადება აქვთ, მათ შორის - გულ-სისხლძარღვთა სისტემის პათოლოგიები, კუჭ-ნაწლავის ტრაქტთან დაკავშირებული პრობლემები. მოხუცებულებს ხშირად აქვთ გენერალიზებული ათეროსკლეროზი, მიკროცირკულაციური დარღვევები, რაც, თავის მხრივ, ორგანოების ქრონიკულ იშემიას განაპირობებს, ხოლო იშემია - სისხლნაკლებობა არტერიული სისხლის მიწოდების შემცირების გამო - შეუქცევად ცვლილებებს და ორგანოთა ძირითადი ფუნქციების დაქვეითებას იწვევს.
განსაკუთრებულ ყურადღებას იპყრობს საჭმლის მომნელებელ ორგანოთა ცვლილებები გულ-სისხლძარღვთა სისტემის პათოლოგიის მქონე 60 წელს გადაცილებულ ადამიანებში.
პანკრეასი ერთ-ერთი ორგანოა, რომლის აქტივობაც ფუნქციაც ხანგრძლივი იშემიის შედეგად მცირდება. ამ დროს კუჭუკანა ჯირკვალში შესაძლოა თავი იჩინოს დარღვევებმა, რომლებიც პანკრეასის უკმარისობას განაპირობებს. აღნიშნულ მდგომარეობათა წარმოქმნაში შესაძლოა დიდი როლი შეასრულოს ჯორჯლის არტერიებში მიმდინარე ათეროსკლეროზულმა ცვლილებებმა, რომლებიც, თავის მხრივ, ჯირკვლის სისხლნაკლებობას, ჰიპოქსიას და მისი ფუნქციის დათრგუნვას იწვევს. ამ პროცესების დროს ცილების, ცხიმებისა და ნახშირწყლების მონელებაში მონაწილე ფერმენტების გამოყოფა მცირდება, რის გამოც ირღვევა შესაბამის ნივთიერებათა მონელება. ზოგჯერ ფერმენტთა უკმარისობა განპირობებულია წვრილ ნაწლავში მათი აქტივაციის დარღვევით.
ასაკოვნები ახალგაზრდებზე გაცილებით ხშირად ზღუდავენ რაციონს, ნაკლებად მიირთმევენ ხორცს, ცხიმიან საკვებს, ამჯობინებენ ხილსა და ბოსტნეულს. ეს დადებითად აისახება ქოლესტერინის შემცირებაზე, ათეროსკლეროზულ პროცესთა განვითარებისა და გულ-სისხლძარღვთა სისტემის დაავადებათა პროფილაქტიკის თვალსაზრისით, მაგრამ საყურადღებოა, რომ ხორცისა და რძის პროდუქტების, აგრეთვე ცხიმიანი საკვების მნიშვნელოვანი შეზღუდვის შედეგად მცირდება ორგანიზმში ვიტამინების შეღწევა, ვიტამინები კი ნივთიერებათა ცვლის რეგულირებას უწყობენ ხელს. აქედან გამომდინარე, მათი ნაკლებობის პირობებში ყველა ეს პროცესი ირღვევა.