მარიამ ფოლადაშვილი

ალერგიული რეაქციების სიხშირე ხელთათმანების გამოყენების სიხშირესთან ერთად იმატებს. რაც უფრო ხშირი და ხანგრძლივია ლატექსთან შეხება, მით უფრო იზრდება ლატექსის ალერგიის განვითარების ალბათობა.

ხელთათმანების გარდა, სამედიცინო დაწესებულებებში ლატექსის შემცველი სხვა ნივთებიც გამოიყენება, მაგალითად წნევის გასაზომი მანჟეტები, სტეტოსკოპები, შპრიცები, და ლეიკოპლასტირი. ხელთათმანის ფხვნილიდან ლატექსის ცილები შესაძლოა ჰაერში გავრცელდეს. მასზე მგრძნობიარე პირის მიერ მათ ინჰალაციას, შესაძლოა, რეაქცია მოყვეს. რეკომენდებულია, რომ ყველა სამედიცინო დაწესებულებაში გამოყენებულ იქნას ხელთათმანები, რომლზეც არა არის ფხვნილი. ეს ამცირებს ლატექსის ცილების კონტაქტს სასუნთქ გზებთან.

ლატექსის მიმართ ორი სახის ალერგია არსებობს:

კონტაქტური დერმატიტი და I ტიპის ალერგიული რეაქცია.

კონტაქტური დერმატიტი - ლატექსის ხელთათმანების წარმოების პროცესში გამოყენებული ქიმიური ნივთიერებებითაა გამოწვეული. ეს დაყოვნებითი ტიპის რეაქციაა, რომელიც კონტაქტიდან 6-დან 48 საათში ვითარდება. კლასიკურ შემთხვევებში, თავდაპირველად ვითარდება კანის სიმშრალე, ქავილი და ნახეთქები, რასაც 24-48 საათის განმავლობაში სიწითლე, შეშუპება და ფუფხის წარმოქმნა მოსდევს. ქრონიკული კონტაქტის შედეგად ვითარდება აქერცვლა და ჰიპერპიგმენტაცია.

I ტიპის ალერგიული რეაქცია - ბუნებრივი რეზინის ლატექსის ცილების მიმართ რეაქციაა, რომელიც ცილებთან კონტაქტიდან რამდენიმე წუთის განმავლობაში ვითარდება.ამ ტიპის ალერგიულ რეაქციებს ახასიათებთ სიმპტომების სპექტრი: კანის სიწითლე, ჭინჭრის ციება, რინიტი და კონიუნქტივი(ან ანაფილაქსიური შოკი). ლატექსის ცილების მიმართ სისტემური რეაქცია შესაძლოა განვითარდეს ლატექსის კანთან და ლორწოვან გარსებთან კონტაქტის, ინჰალაციის ან სისხლში მოხვედრის შედეგად.

ლატექსი-საკვების სინდრომი

გამომდინარე იქიდან, რომ რეზინაში შემავალი ზოგიერთი ცილა საკვების ცილებს ჰგავს, ლატექსზე ალერგიის მქონე ადამიანებში ალერგიული რეაქცია ზოგიერთმა საკვებმაც შეიძლება გამოიწვიოს. ამ მოვლენას ლატექსი-საკვების სინდრომი ეწოდება. ყველაზე ხშირი ასეთი საკვებია: ბანანი, ავოკადო, კივი, ატამი, ყურძენი, გარგარი, პომიდორი,კარტოფილი, წაბლი, თხილი.

პრევენციისათვის:

• გაიგეთ ხართ თუ არა ალერგიული ლატექსზე;
• გაეცანით ლატექსის ალერგიის სიმპტომებს: მათ შორისაა, გამონაყარი; წამოწითლება; ქავილი; ცხვირის, თვალისა და წიაღების სიმპტომები; ასთმა. თუ აღინიშნება ლატექსზე ალერგიის სიმპტომები, მოერიდეთ ლატექსის ხელთათმანების გამოყენებას და ლატექსის შემცველ სხვა ნივთებთან და პროდუქტებთან კონტაქტს;
• გამოიყენეთ ხელთათმანები, რომელშიც არ შედის ფხვნილი და შემცირებულია ცილის შემცველობა;
• ხელთათმანის ტარებისას არ გამოიყენოთ ზეთზე დაფუძნებული ხელის კრემები და ლოსიონები;
• ხელთათმანების მოხსნის შემდეგ დაიბანეთ ხელები მსუბუქი საპნით და გულმოდგინედ გაიშრეთ;
• ხშირად გაასუფთავეთ სამუშაო სივრცე, რომელიც დაბინძურებულია ლატექსის შემცველი მტვრით